කීර්ති ප්රනාන්දු –
පාකිස්ථානයේ සියල්කොට් හිදී අන්තවාදීන් විසින් කුරිරු ලෙස ඝාතනය කළ ප්රියන්ත කුමාර දියවඩන ගේ දේහයට අවසන් ගෞරව දැක්වීම පිණිස කොළඹ අගරදගුරු මැල්කම් කාදිනල් රංජිත් හිමිපාණෝ ප්රියන්ත කුමාර ගේ නිවසට අද පෙරවරුවේ පැමිණියාහ.
මෙම අවස්ථාවට අගරදගුරු තුමන් ප්රධාන තවත් පියතුමන්ලා විශාල පිරිසක් එක්වූ අතර දේහයට අවසන් ගෞරව දැක්වූ රදගුරුතුමා ප්රධාන පියතුමන්ලා විනාඩි කිහිපයක් දේහය අසල නිහඬ යාඥාව ක නිරත වූහ.
අනතුරුව ප්රියන්ත කුමාර ගේ බිරියට දරුවන් හා ඥාතීන්ට සිය ශෝකය ප්රකාශ කළ රදගුරුතුමන් ඔවුන් සමඟ කතාබහක නිරතවී වී සිටියහ.
අනතුරුව මාධ්යයට අදහස් දැක්වූ අග රදගුරුතුමෝ මෙසේ පැවසූහ:-
“ආගමක් හරියට අදහනවා නම් තවත් මනුෂ්යයෙකුට විරුද්ධව අත උස්සන්න බැහැ කවදාවත්. අපිට ධර්මය තුළින් කියාදෙන්නේ උගන්වන්නේ එයයි.“
“මෙම සිදු වීම ඉතාමත්ම අවාසනාවන්ත සිදු වීමක්. අවස්ථාවේදී අපගේ කණගාටුව ප්රකාශ කරනවා. හිතනවා මේ වගේ දේවල් කරන අයට නිසි දඩුවම් ලැබෙයි කියලා. මේවා පිටුපස තියෙන්නේ දේශපාලනයයි. ආගම හා දේශපාලනය කියන්නේ දෙකක්. මේ දෙක වෙන් වෙන්ව තියාගන්න ඕනෑ. විශ්වාස කරනවා පාකිස්ථානය මේ සිද්ධිය පිළිබඳව හරියාකාරව පරීක්ෂණ කරලා මේ අපරාධය කරපු අයට නිසි දඬුවම් ලබා දෙයි කියලා.“
“ඒ වගේම මේ ගෞරවනීය පවුලට සිද්ධ වුණු හානිය අඩු කරන්න රජය තුළින් සහයෝගයක් ලැබිය යුතුයි. එය ලබාදෙන්න කියලා අපි ඉල්ලා සිටිනවා“ යැයි කීහ.
