කපිල එම් හීනටියන –
ලෝක ක්රිකට් පිටියේ උද්වේගකරම සටනවන ඉන්දියාව සහ පකිස්ථානය අතර හෙට (පෙබරවාරි 15) කොළඹ ආර්. ප්රේමදාස ජාත්යන්තර ක්රීඩාංගණයේදී පැවැත්වීමට නියමිත T20 ලෝක කුසලාන තරගය වටා මේ වන විට දැඩි අවිශ්වාසයක සෙවනැලි පැතිර තිබේ.
එයට හේතුව හෙට දිනයේ කොළඹ අහසේ සැරිසරන වැහි වලාකුළු තරගයේ තීරකයා වීමට ඇති ඉඩකඩ වැඩි වීමය. මේ තත්ත්වය සම්බන්ධව ජාත්යාන්තර මාධ්යය ද ස්වකීය අවධානය යොමු කර ඇති අයුරු දුටුවෙමි.
බෙංගාල බොක්කේ කැළඹීම සහ කාලගුණ අනාවැකිය
ශ්රී ලංකා කාලගුණ විද්යා දෙපාර්තමේන්තුවේ නවතම දත්ත වාර්තාවලට අනුව, බෙංගාල බොක්ක මුහුදු ප්රදේශයේ වර්ධනය වෙමින් පවතින අඩු පීඩන කලාපයක් හේතුවෙන් දිවයින පුරා වැසි තත්ත්වයක් වර්ධනය වෙමින් තිබේ.
පස්වරු 7:00 ට ආරම්භ වීමට නියමිත මෙම තීරණාත්මක තරගයට පෙර සහ තරගය අතරතුර කාලගුණයේ ස්වභාවය සම්බන්ධ පුරෝකථනයන් ක්රීඩා ලෝලීන්ගේ බලාපොරොත්තු හෝදා දමන සුළුය.
කාසිය වාසය බැලීමට නියමිත හෝරාවේදී එනම් පස්වරු 5-6 අතර වර්ෂාව ලැබීමේ සම්භාවිතාව 50% – 70% දක්වා ඉහළ මට්ටමක පවතී. මේ කාලය තුළ අපේක්ෂා කරන්නේ තද ගිගුරුම් සහිත දැවැන්ත වර්ෂාවකි. මේ තත්ත්වය තුළ තරගය ආරම්භ කිරීම ප්රමාද වීමට ඇති ඉඩකඩ බෙහෙවින්ම වැඩිය.
කෙසේ වෙතත් තරගය අතර තුර, එනම් පස්වරු 7 – 11 අතර රාත්රී කාලයේදී වර්ෂාපතන සම්භාවිතාව 25% දක්වා අඩු වී යයි. ‘AccuWeather’ වැනි ඇතැම් කාලගුණ අනාවැකි ප්රකාශ කරන පිළිගත් වෙබ් අඩවි අනුව එම කාලය තුළ වැසි ඇති වීමේ සම්භාවිතාව 9%-20% දක්වා අඩු වීමේ ප්රවණතාවක් ඇත.
කෙසේ වෙතත්, වලාකුළින් බර වූ අහස සහ අධික ආර්ද්රතාවය (70%-74%) හේතුවෙන් අතරින් පතර වැසි තත්ත්වයන් බලාපොරොත්තු විය හැකි බව අවසාන පුරෝකථනය ය.
කෙසේ වෙතත් ශ්රී ලංකා ක්රීඩාංගනවල ක්රීඩාංගන සේවක මණ්ඩලවල කාර්යය සම්බන්ධව ලොව පුරා විශිෂ්ට ඇගයීමක් පවතී. ඔවුහු විනාඩි කීපයකින් මුළු ක්රීඩාංගනයම ආවරණය කරමින් ආවරණ අතුරා ඕනෑම වැසි සහිත තත්ත්වයක් තුළ භූමිය නොතෙමී ආරක්ෂා කිරීමේ විශිෂ්ට හැකියාව පිළිබඳ සහතික කර තිබේ.
එමෙන්ම ආර්. ප්රේමදාස ක්රීඩාංගණය සතුව විශිෂ්ට ජල අපවහන පද්ධතියක් තිබේ. මේ තත්ත්වය තුළ වර්ෂාව නැවතුණු විගස මිනිත්තු 30ක් වැනි කෙටි කාලයකින් තරගය යළි ඇරඹීමට බලධාරීන් සියල්ල සම්පාදනය කර ඇත.
නීති සහ තීරණ
මෙය මූලික වටයේ තරගයක් බැවින් මේ සඳහා අතිරේක දිනයක් (Reserve Day) වෙන් කර නොමැත. ICC රෙගුලාසි අනුව තරගයේ ප්රතිඵලයක් ලබා ගැනීමට නම් කණ්ඩායම් දෙකම අවම වශයෙන් පන්දු වාර 5 බැගින් ක්රීඩා කළ යුතුය.
යම් හෙයකින් වර්ෂාව නිසා තරගය සම්පූර්ණයෙන්ම අතහැර දැමීමට සිදුවුවහොත් කණ්ඩායම් දෙකටම එක් ප්රසාද ලකුණ බැගින් හිමි වනු ඇත. එහෙත් තරගය නැරඹීමට පැමිණෙන ලක්ෂ සංඛ්යාත ප්රේක්ෂකයින් මෙන්ම ලොව වටා සිටින ක්රිකට් ලෝලීන්ගේ එකම ප්රාර්ථනාව වී ඇත්තේ, වර්ෂාවෙන් තොර උද්යෝගිමත් ක්රිකට් තරගයක් හෙට රාත්රියේ දැක ගැනීමට ලැබීමය
කෙසේ වෙතත් මේ තත්ත්වය ක්රීඩාවේ පූර්ව සැලසුම සහ තරග රටාවන් වෙනස් කරනු ඇත. තෙතමනය සහිත තණතීරුව ආරම්භක පන්දු යවන්නන්ට වාසිදායක විය හැකි බව ක්රීඩා විචාරකයෝ පවසති. විශේෂයෙන්ම වර්ෂාව නිසා පන්දු වාර සංඛ්යාව අඩු වුවහොත්, හර්දික් පාණ්ඩ්යා වැනි තුන් ඉරියව් ක්රීඩකයින්ගේ සහ ඉෂාන් කිෂාන් වැනි ප්රහාරාත්මක පිතිකරුවන්ගේ භූමිකාව ඉන්දියාවට තීරණාත්මක වනු ඇත.
ක්රීඩා ලෝලීන්ගේ උන්මාදය සහ වැය කළ මහා ධනස්කන්ධය
කාලගුණය කුමන බාධා පැමිණවුවද, මෙම තරගය වෙනුවෙන් ලොව පුරා ක්රීඩා ලෝලීන් දරා ඇති පිරිවැය සහ කැපවීම අතිමහත්ය. පෙබරවාරි මස මුල් දින 12 තුළ පමණක් මෙරටට විදේශිකයින් 124,000 ක් පැමිණ ඇති අතර ඉන් සැළකිය යුතු පිරිසක් ඉන්දු – පකිස්ථාන තරගය වෙනුවෙන්ම පැමිණි අය වෙතැයි ගණන් බලා තිබේ. තක්සේරුව අනුව ඉන් සියයට විස්සක්ම මේ තරගය වෙනුවෙන්ම ලංකාවට පැමිණි ක්රීඩා ලෝලීන්ය. ඔවුන්ගේ සංඛ්යාව 24 000කට ආසන්නය.
ආර් ප්රේමදාස ක්රීඩාංගනය ලංකාවේ ඇති විශාලතම ක්රිකට් ක්රීඩාංගනය ය. එහි එක්වර ප්රේක්ෂකයින් 35000කට තරගය නැරඹිය හැකිය. ඉන් 24000ක්ම පිරෙනු ඇත්තේ මේ සංචාරක ප්රේක්ෂකයින්ගෙන් වීම සැලකිය යුතුව තිබේ. ඔවුන් අතර ඉන්දියා – පකිස්ථාන ප්රේක්ෂකයින් පමණක් නොව, ඔස්ට්රේලියාව, එක්සත් රාජධානිය, මැද පෙරදිග රටවල පිරිස් ද වෙති. මෙම සුවිශේෂී උන්මාදය හේතුවෙන් ඉන්දියාවේ ප්රධාන නගරවල සිට කොළඹ දක්වා වන ගුවන් ටිකට්පත් මිල ද සාමාන්ය අගයට වඩා තුන් ගුණයකින් පමණ ඉහළ ගොස් ඇත.
මේ තත්ත්වය තුළ තරගයේ ප්රවේශපත්ර සඳහා අපේ රටේ ක්රීඩා ලෝලීන්ගෙන් ඇත්තේ අතිශය විශාල ඉල්ලුමකි. මේ වනවිට කළු කඩයේ ඉන්දු – පකිස්ථාන තරගයේ ප්රවේශ පත්රයක් රුපියල් ලක්ෂයකට, VIP ප්රවේශ පත්රයක් ලක්ෂ 02ක දක්වා මිලකට අලෙවි වන බවට සමාජ මාධ්ය වාර්තා පලවී ඇත.
කොළඹ නගරයේ ප්රධාන පෙළේ හෝටල් සියල්ලම පාහේ මේ වන විට අතුරු සිදුරු නැතිව පිරී පවතින අතර, සාමාන්යයෙන් ඇමරිකානු ඩොලර් 150 ක් පමණ වන කාමරයක මිල මේ වන විට ඩොලර් 660 (රුපියල් ලක්ෂ දෙකකට ආසන්න) දක්වා ඉහළ ගොස් තිබේ. විදේශිකයෙකු මෙම තරගය නැරඹීම සඳහා ගුවන් ටිකට්පත් සහ නවාතැන් ඇතුළු සියලු පහසුකම් වෙනුවෙන් සාමාන්යයෙන් රුපියල් ලක්ෂ 5 ත් 7 ත් අතර පිරිවැයක් දරා ඇත.
මේ වනවිට ලෝක ක්රිකට් ලෝලීන්ගේ බලාපොරොත්තුවේ දෑස් කොළඹ දෙසට යොමු වී ඇති බව ලියා තබමු. කෝටි සංඛ්යාත ප්රේක්ෂක පිරිසකගේ බලාපොරොත්තුව වී ඇත්තේ සොබාදහම තත්පරයකට හෝ නිහඬ වී, ලෝක ක්රිකට් පිටියේ මෙම මහා සටන නැරඹීමට අවස්ථාව සලසා දෙනු ඇති බවය.
