මේ වන විට ලංකාවේ වනිඳු හසරංගගේ ක්රිකට් කණ්ඩායමට වඩා ක්රිකට් ලෝලීන් අතර චමරි අතපත්තුගේ කාන්තා ක්රිකට් කණ්ඩායම ජනප්රිය බව අමුතුවෙන් කිව යුතු නැත.
දස්කම් වලින් පමණක් නොව පිටිය මත හැසිරීම හා මාධ්යයට මුහුණ දීමේ පරිණත බවින් ඔවුන් සැමගේ හදවත් දිනාගෙන හමාරය.
රටේ විවිධ ස්ථානවල සිට ශ්රී ලංකා කාන්තා ක්රිකට් කණ්ඩායමේ තරග නැරඹීමට මේ දිනවල දඹුල්ල ක්රීඩාංගණයට ක්රිකට් ලෝලීන් ගලා එන්නේ මේ නිසාය.
ක්රිකට් ලෝලීන්ගේ හදවත් දිනා ගත්තද චමරි ඇතුළු කාන්තා කණ්ඩායම තවමත් ක්රිකට් බලධාරීන්ගේ හදවත් දිනා ගෙන නැති ගානය.
ඒ මෙම ක්රීඩිකාවන්ගේ දස්කම් ඔවුන් තවමත් හරි හැටි අගය නොකරන නිසාය.
කිසිදු වැදගම්මක් නැති ලංකා ප්රිමියර් ලීගයේ අවසන් තරගයේ කෝටි හතළිහක් වියදම් කර ඩ්රෝන් සංදර්ශන පවත්වද්දී මෙම ක්රීඩිකාවන්ගේ තරග දීමනාව වැඩි කර දීමටවත් මොවුන්ට අවශ්යතාවක් නොමැත.
ක්රිකට්වල දියුණුව මෙවන් සංදර්ශන යැයි සිතනා ක්රීඩා ඇමතිවරයාටවත් මේ ගැන වගේ වගක් නැත.
මේ නොබෝදා ඉන්දීය ක්රිකට් පාලක මණ්ඩලයද එහි ජාතික පිලේ ක්රීඩකයන්ට ගෙවන තරග දීමනාව ක්රීඩිකාවන්ටද එලෙසම ගෙවීමට තීරණය කළේය.
ඊට පෙර එංගලන්තය, ඕස්ට්රේලියාව හා නවසීලන්තයත් එසේම දෙගොල්ලන්ටම එකම තරග දීමනාවක් ගෙවන්නට තීරණය කර තිබිණ.
අපේ ක්රීඩිකාවකගේ තරග දීමනාව ඩොලර් 750 කි. තරගයක් දිනුවොත් එය ඩොලර් 1000 කි.
වනිදුලාගේ කණ්ඩායමේ ක්රීඩකයකුගේ තරග දීමනාව ඩොලර් 5000 කි. ටෙස්ට් තරගයක දීමනාව ඩොලර් 10000 කි.
නියුට්රල් අම්පයර්ට අනුව දීමනා සම කළ යුතුම නොවේ. එහෙත් මේ ක්රීඩිකාවන් අද ජාත්යන්තර තලයේ දක්වන කැපී පෙනෙන දස්කම් අනුව ඔවුන්ගේ තරග දීමනාව අඩු තරමින් 25% කින් හෝ වැඩි කර දීම ක්රිකට් බලධාරීන් විසින් කළ යුතුව ඇත.
විශාල වැටුප් ගෙවා පුහුණුකරුවන් , උපදේශකයන් ගනිද්දී මෙය ක්රිකට් ආයතනයට ඇඟටවත් දැනෙන තරමේ වියදමක් නොවේ.
