මනම්පිටිය නිමල් ජයරත්න
පොලොන්නරුව වැලිකන්ද කන්දකාඩු යුද හමුදා කඳවුරේ ගොවිපල තුළදී අද (26) අලුයම 2.10 ට පමණ වන අලියෙකු පහරදීමෙන් එම කඳවුරේ ලාන්ස් කෝප්රල් වරයෙකු මියගොස් ඇති බව වැලිකන්ද පොලීසිය කියයි.
මෙලෙස මියගොස් ඇති හමුදා නිලධාරියා 34 වියැති පී.ඒ.ලලිත් නැමැති දෙදරු පියකු බව පරීක්ෂණ සිදුකරන වැලිකන්ද පොලීිසිය සඳහන් කරයි.
ඔහු ආනමඩුව ප්රදේශයේ පදිංචි පුද්ගලයෙකි.
රාජකාරිය අතරතුර මෙම වන අලි ප්රහාරය එල්ල වී තිබේ. ගොවිපලේ අඹ ගස් පිහිටි ප්රදේශයට වන අලියා වැටෙන් ඇතුළු වී ඇති බවද පොලිසිය පවසයි.
මියගිය ලාන්ස් කෝප්රල්වරයාගේ සිරුර වැලිකන්ද රෝහලේ තැන්පත් කර තිබෙන අතර මේ පිළිබඳ පශ්චාත් මරණ පරීක්ෂණය අද දහවල් සිදුකිරීමට නියමිත බව වැලිකන්ද පොලිස් ස්ථානාධිපති පොලිස් පරීක්ෂක සමන්ත රත්නායක අප කළ විමසීමකදී සඳහන් කළේය.
පොලොන්නරුව ජේෂ්ඨ පොලිස් අධිකාරි නිශාන් ද සිල්වාගේ උපදෙස් පරිදි වැලිකන්ද ප්රදේශය භාර සහකාර පොලිස් අධිකාරී සුදත් අස්මඩලගේ මැදිහත් වීමෙන් වැලිකන්ද පොලිස් ස්ථානාධිපති පොලිස් පරීක්ෂක සමන්ත රත්නායක ඇතුළු පොලිස් නිලධාරීන් කණ්ඩායමක් මේ පිළිබද වැඩිදුර පරීක්ෂණ සිදුකරයි.
