මනම්පිටිය නිමල් ජයරත්න –
පොළොන්නරුව කන්දකාඩු පුනරුත්ථාපන මධ්යස්ථානයේ රැඳවියන් දෙපිරිසක් අතර විසි හතරවෙනිදා රාත්රියේ හටගත් ගැටුම අතරතුර පලා ගොස් තිබිය දී අත් අඩංගුවට ගත් රැඳවියන් 34 දෙනෙකු පොලොන්නරුව පොලිසිය මගින් පොලොන්නරුව මහේස්ත්රාත් අධිකරණයට ඉදිරිපත් කිරිමෙන් පසු මේ මස 31 වෙනිදා දක්වා රක්ෂිත බන්ධනාගාර ගත කරන ලෙස එහි වැඩ බලන මහේස්ත්රාත් රුවන් කුමාර ගුණසේකර නියෝග කර තිබේ.
හිගුරක්ගොඩ පොලිසිය මගින් අත් අඩංගුවට ගෙන ඇති සෙසු රැදවියන්ගෙන් 25 වෙනිදා සවස් වන විටත් කරුණු සටහන් කරමින් පැවති අතර ඔවුන් හිගුරක්ගොඩ මහේස්ත්රාත් අධිකරණය වෙත ඉදිරිපත් කිරිමට නියමිතව ඇත.
එමෙන්ම විසි දෙදෙනෙකු හැර සියලු රැඳවියන් මේ වනවිට බාර වී හෝ අත්අඩංගුවට ගෙන ඇති බව වැලිකන්ද පොලිසිය කියයි..
කන්දකාඩු පුනරුත්ථාපන මධ්යස්ථානයෙන් පලා ගොස් සැඟව සිටි රැඳවියන්ගෙන් විසි දෙදෙනකු පුලස්තිපුර පොලිසිය මගිනුත්, විසි පස්දෙනෙකු හිඟුරක්ගොඩ පොලිසිය මගිනුත් අත්අඩංගුවට ගෙන තිබිණි. .
කන්දකාඩු පුනරුත්ථාපන මධ්යස්ථානයේ රැඳවියන් හාරසිය අටදෙනකු පුනරුත්ථාපනය වෙමින් සිට ඇති අතර මෙම දෙපිරිස අතර ඇතිවූ ගැටුමෙන් දෙසීයක් පමණ පළා ගොස් සිටි අතර ඔවුන්ගෙන් පිරිසක් 25 වෙනිදා දහවල් වනවිට වරින් වර ආරක්ෂක අංශ වෙත බාර වූහ.
පලාගිය රැඳවියන්ගෙන් විසිදෙදෙනකු මේ වෙනවිට අතුරුදහන් වී ඇති බවද පරීක්ෂණ පවත්වන වැලිකන්ද පොලිස් ස්ථානාපති පොලිස් පරීක්ෂක සමන්ත රත්නායක සඳහන් කළේය.
මෙම ගැටුමෙන් තුවාල ලැබූ දෙදෙනෙකු පොළොන්නරුව මහ රෝහලේ ප්රතිකාර ලබමින් සිටින බවද කන්දකාඩු පුනරුත්ථාපන මධ්යස්ථානයේ ආරක්ෂක අංශයේ නිලධාරියෙකු සඳහන් කළේය.
පුනරුත්ථාපන මධ්යස්ථානයෙන් පලා ගොස් සැඟව සිටියදී අත්අඩංගුවට ගැනීමෙන් අනතුරුව රැඳවියන් කිහිපදෙනෙකු සඳහන් කළේ තමන්ට මධ්යස්ථානයට මුලින් පැමිණ සිටින රැඳවියන් විවිධ අඩත්තේට්ටම් සිදු කරන බවත්, ආහාර ලබාදීමේදී විසිපහක, තිහක, පමණ කල්ලියක් අලුතින කඳවුරට යොමු කරන පිරිස්වලට පහර දීමට කටයුතු කරන බවත්ය.
මෙම තත්ත්වය උඩ තමන්ගේ ආරක්ෂා පතා කන්දකාඩු පුනරුත්ථාපන මධ්යස්ථානයෙන් පැන යන බවත්, ඇතැම් අවස්ථාවලදී තමන්ට ආහාර සහ අනෙකුත් පහසුකම් ලබාදීමේදී ආරක්ෂක අංශ මගින් අඩු සැලකිලි දක්වන බවත් පලා යෑමෙන් අනතුරුව අත්අඩංගුවට පත් රැඳවියන් පොලිසියට ප්රකාශ කර තිබිණි.
ආහාර හා පහසුකම් ලබාදීමේදී එම පහසුකම් සමානව ලබාදෙන නමුත් අලුත පැමිණි පිරිස් සහ පැරණි කණ්ඩායම් අතර නිතර ගැටුම් ඇතිවීමෙන් මෙම රැඳවියන් කඳවුරෙන් පලායාමට උත්සාහ කරන බවත් කන්දකාඩු පුනරුත්ථාපන මධ්යස්ථානයේ ආරක්ෂක අංශයේ උසස් නිලධාරියකු අප කළ විමසීමකදී සඳහන් කළේය..
කන්දකාඩු පුනරුත්ථාපන මධ්යස්ථානයේ තත්ත්වය මේ වන විට සම්පූර්ණයෙන්ම පාලනය කර ඇති බව වැලිකන්ද පොලිසිය පවසයි.
කන්දකාඩු පුනරුත්ථාපන මධ්යස්ථානයේ රැඳවියන් දෙපිරිසක් අතර පසුගිය ජනවාරි 12 වැනිදා ඇතිකරගත් ගැටුමකින් 29 දෙනෙකු වැලිකන්ද හා පොළොන්නරුව රෝහල්වලට ඇතුළත් කෙරුනු අතර එම ගැටුම අතරතුර අනූදෙදෙනකු ද පලා ගියහ.
