ලලිත් චාමින්ද –
ජාතික ඖෂධ තත්ත්ව ආරක්ෂණ පර්යේෂණාගාරයේ ප්රධාන අංශවල ඖෂධ විශ්ලේෂණ කටයුතු සුමටව පවත්වාගෙන යාම සඳහා අත්යවශ්ය වන උපකරණ අයිතම 18 ක හිඟයක් පවතින බව ජාතික විගණන කාර්යාලය මගින් නිකුත්කොට ඇති විගණන වාර්තාවක සඳහන් වේ.
එමෙන්ම ඖෂධ විශ්ලේෂණ කටයුතු සඳහා භාවිතා කරනු ලබන සංකීර්ණ උපකරණ බොහෝමයක් ඉතා පැරණි උපකරණ වන අතර ඇතැම් උපකරණ අක්රීයව සහ අලුත්වැඩියා කිරීමට නොහැකි තත්ත්වයේ පවතින බව ද එම වාර්තාවේ සඳහන් වේ.
එමෙන්ම භාවිතා කළ හැකි මට්ටමේ පවතින උපකරණ අයිතම 29 ක අලුත්වැඩියා කටයුතු අවසන් කර නොමැති අතර ඇතැම් ඒවා වසරකටත් වඩා වැඩි කාලයක් පුරා භාවිතයෙන් බැහැර කර තිබී ඇත.
මෙම තත්ත්වය හේතුවෙන් ඖෂධ නියාමනය කෙරෙහි ඉවහල් වන වැදගත් පරීක්ෂණ වාර්තා නිකුත් කිරීමේ දී, අහිතකර බලපෑම් ඇතිවිය හැකි ආකාරයේ වාතාවරණයක් ජාතික ඖෂධ තත්ත්ව ආරක්ෂණ පර්යේෂණාගාරය තුල නිර්මාණය වී ඇති බව රසායනාගාර පරිශ්රයන් සම්බන්ධයෙන් සිදුකළ පරික්ෂාවේ දී අනාවරණය වී තිබේ.
ජාතික ඖෂධ නියාමන අධිකාරිය සතුව ප්රමාණවත් මූල්ය ශක්යතාවයක් පැවතිය ද වසර ගණනාවක් පුරා පවතින මෙකී අඩුපාඩු සපුරා ගැනීමට කටයුතු කර නොතිබෙන බවද විගණනය මගින් අනාවරණය කොටගෙන ඇත.
