ආසන සංවිධායකවරුන් විසින් පක්ෂයේ ප්රතිපත්තියට අනුකූලව පත් කරගෙන, පක්ෂ නායකත්වයේ අනුමැතිය මත අපේක්ෂක ලයිස්තු ඉදිරිපත් කර, එම අපේක්ෂකයින් සමග සාකච්ඡාවක ද නිරත වූ පසු ගමේ දේශපාලකයින්ගේ දේශපාලන ජීවිතය වෙනස් කරමින් තමන්ට හිතවත් පිරිස් අපේක්ෂක ධූරවලට ගෙනා නායකත්වයට විරෝධය පලකරමින් මේ වනවිට සමගි ජන බලවේගයේ ආසන සංවිධායකයින් 7 දෙනෙක් සිය ධූරවලින් ඉවත් වී තිබේ.
ඒ අනුව, බණ්ඩාරවෙල ආසන සංවිධායක සහ පාර්ලිමේන්තු මන්ත්රී චමින්ද විජේසිරි දින දෙකකට පෙර සිය ධූරයෙන් ඉවත් වූයේය. මුලින්ම ඉවත් වූ ආසන සංවිධායකවරයා ඔහුය.
අනතුරුව රත්තොට ආසන සංවිධායක සහ නියෝජ්ය ජාතික සංවිධායක රංජිත් අලුවිහාරේ සිය තනතුරු දෙකෙන්ම ඉල්ලා අස් වූයේය. ඒ ඊයේ (24) දිනයේ දීය.
එදිනම මාතලේ ආසන සංවිධායක හිටපු රාජ්ය අමාත්ය වසන්ත අලුවිහාරේ, දඹුල්ල ආසන සංවිධායක නීතිඥ චම්පික විජයරත්න සිය ඉල්ලා අස්වීම ප්රකාශ කළේය.
අද (25) දින හොරොව්පොතාන ආසන සංවිධායක අනුර බුද්ධික, නුවරඑළිය දිස්ත්රික් සම සංවිධායක අනගිපුර අශෝක සේපාල සහ ගාල්ල ආසන සංවිධායක බන්දුලාල් බණ්ඩාරගොඩ සිය සංවිධායක තනතුරුවලින් ඉල්ලා අස් වූහ.
පෙරේදා මාතලේ දිස්ත්රික් පාර්ලිමේන්තු මන්ත්රී රෝහිනී කවිරත්න පවසන්නී තමන්ට දැඩි කළකිරීමක් ඇති වී තිබෙන බවත් ඇති වී තිබෙන තත්ත්වය පක්ෂයේ අභ්යන්තර සාකච්ඡාවකින් විසඳා ගන්නා බවත්ය.
එස්.එම්. මරික්කාර් පවසන්නේ පක්ෂයේ කටයුතු සම්බන්ධව තමන්ට විවේචනයක් පවතින බවය. කොළඹ දිස්ත්රික් මන්ත්රීවරයෙක් වශයෙන් ද පක්ෂයේ නියොජජ්ය ජාතික සංවිධායකවරයා වශයෙන් ද, සමගි ජන බලවේගය නිර්මාණය කරන්නට පැමිණි මුල්ම 15 දෙනාගෙන් කෙනෙක් වශයෙන් ද තමන්ට කිසිම අවස්ථාවක කොළඹ නගර සභාව හැදීමේ කටයුතු සඳහා ආරාධනා නොකළ බවය. ඒ සම්බන්ධව ගැටලුවක් තිබේ නම් මුජබර් රහුමාන් මන්ත්රීවරයාගෙන් විමසා දැන ගත හැකි බව ඔහු කීවේය.
මේ ඇති වී තිබෙන තත්ත්වය සම්බන්ධව විමසූ විට සමගි ජන බලවේගයේ කළුතර දිස්ත්රික් පාර්ලිමේන්තු මන්ත්රි ජගත් විතාන පැවසුවේ ඔය ෂෝ සති දෙකකින් ඉවර බවත් නැවත ඔවුන් එපා කී තනතුරු ඉල්ලාගෙන පැමිණෙන බවත්ය. මේ පෙන්වන්නේ තමන්ගේ කණ්ඩායමට කියන්නට දෙයක් නැති නිසා කරන රංගනයක් බව ද මන්ත්රීවරයා පැවසුවේය.
“මේ ප්රශ්නය සති දෙකෙන් විසඳෙනවා… ඇයි එපා කියලා කොහෙට යන්නද? එන්.පී.පී එකට යන්න ද?. යන්න තැනක් නෑ. මුහුදේ පනින්නයැ. ආපහු ඔය අය එනවා…”
