සුරාබදු නිලධාරීන් සම්බන්ධව සමාජයේ ඇති ආකල්පය යහපත් එකක් නොවන බවත්, තම බලය භාවිතා කරමින් නීතියට පටහැනිව කටයුතු නොකළ යුතු බවත්, ජනාධිපති අනුර කුමාර දිසානායක අද ප්රකාශ කළේය.
සුරාබදු බලපත්ර ලබාදීමේ දී විධිමත් ක්රමවේදයක් අනුගමනය කරන ලෙස මෙන්ම නිසි වේලාවට බදු අය කර ගැනීමට පියවර ගන්නා ලෙස ද ජනාධිපතිවරයා නිලධාරින්ට උපදෙස් දුන්නේය. රටේ ආර්ථිකයට හිතකර ලෙස එම ආයතන පවත්වා ගෙන යාමේ අවශ්යතාව ද ජනාධිපතිවරයා අවධාරණය කළේ.
ජනාධිපතිවරයා මේ බව ප්රකාශ කළේ සුරාබදු දෙපාර්තමේන්තුවේ ජ්යෙෂ්ඨ නිලධාරීන් සමඟ අද (05) ජනාධිපති කාර්යාලයේ පැවැති සාකච්ඡාවේදීය.
සුරාබදු අය කර ගැනීමේ අපහසුතා සහ එහිදී සිදුවන අක්රමිකතා පිළිබඳ මෙහිදී අවධානය යොමු කෙරුණු අතර අයවිය යුතු බදු ප්රමාණය අය කර ගැනීම, අසාදුගත ආයතන මෙන්ම බදු අය කර ගත නොහැකි ආයතනවල බලපත්ර තහනම් කිරිම වැනි නව ක්රමවේද පිළිබඳව පුළුල් ලෙස සාකච්ඡා කෙරිණි.
එසේම බදු අය කර ගැනීමේ දී පවතින නීති රීති ප්රමාණවත් නොවීම පිළිබඳව ද සාකච්ඡාවට ලක් වූ අතර බදු අය කර ගැනීමේදී මතුව ඇති ගැටලු සහ සුරාබදු නිලධාරීන් බදවා ගැනීමේ ක්රමවේදයේ පවතින දුර්වලතා පිළිබඳවද ජනාධිපතිවරයාගේ අවධානය යොමු කෙරිණි.
එසේම නිෂ්පාදන සහ ඇසුරුම් ක්රියාවලියෙහි මතුව ඇති ගැටලු පිළිබඳව නිලධාරීන් ජනාධිපතිවරයා දැනුවත් කළ අතර කෘත්රීම රා හේතුවෙන් ජනතාවට සිදු වන හානිය සම්බන්ධව ද අවධානය යොමු කෙරිණි.
සුරාබදු කොමසාරිස් රෝහණ සේනාරත්න, නියෝජ්ය සුරාබදු කොමසාරිස් ආර්. වී. එස්. තිස්ස කුමාර, සහකාර සුරාබදු කොමසාරිස් එම්. ජේ. ද සිල්වා, ප්රධාන මූල්ය නිලධාරී ජී. ඒ. චාන්දනී, ප්රධාන ගණකාධිකාරී ඩබ්. ආර්. පරණගම යන ඇතුළු සුරාබදු දෙපාර්තමේන්තුවේ ජ්යෙෂ්ඨ නිලධාරීහු මෙම සාකච්ඡාවට එක්ව සිටියහ.
