මාර්ගගත ක්රමවල සුරක්ෂිතභාවය පිළිබඳ පනත අඩුපාඩු සහිත බවත්, තමන් ද ඒ අඩුපාඩු නිරීක්ෂණය කළ බවත් අධිකරණ ඇමති විජේදාස රාජපක්ෂ අද පාර්ලිමේන්තුවේ දී පැවසුවේය.
අධිකරණය විසින් ලබා දුන් නියෝගවලටට අදාල සියලුම කරුණු සලකා බලා නීතිපතිවරයාගේ පූර්ණ අනුමැතියට යටත්ව ඉදිරිපත් කර ඇති පනත සම්මත වී ඇතිබැවින් දැන් ඒ පිළිබඳ සංවාද පැවැත්විය නොහැකි වුව ද අවශ්ය සංශෝධන ඇතිනම් යෝජනා කරන ලෙසත් එම සංශෝධන පාර්ලිමේන්තුවට ගෙනැවිත් අවශ්ය වෙනස් කම් කරගැනීමට පාර්ලිමේන්තුවට බලය ඇති බවත් අධිකරණ ඇමතිවරයා වැඩිදුරටත් කීවේය.
“මාර්ගගත ක්රමවල සුරක්ෂිතභාවය පිළිබඳ පනත් කෙටුම්පතට අභියෝග කරන පෙත්සම් 40කට වැඩි ප්රමාණයක් තිබුණා. සති ගණනක් මේ පිළිබඳව විභාග පවත්වලා අධිකරණය ලබාදුන් නියෝගය… ශ්රේෂ්ඨාධිකරණය නඩු තීන්දුවෙන් සඳහන් කරපු සියලු කරුණු සැලකිල්ලට භාජනය කරලා අවසානයේදී ඒවා සංශෝධන හදලා නීතිපතිවරයාගෙන් සහතිකයක් අරගෙන තමයි අපි පාර්ලිමේන්තුවට සංශෝධන ඉදිරිපත් කරන්නේ.”
“අධිකරණයට කියන්න බැහැ මේක ගේන්නද? ගේන්න එපා කියන්න අධිකරණයට බලයක් නැහැ. අධිකරණයට තිබෙන එකම බලය තමයි යම් වගන්තියක් ආණ්ඩුක්රම ව්යවස්ථාවට අනුකූලද අනනුකූලද කියලා තීරණය කරන එක.”
“එතකොට මේ පනතට ඇතුළත් කළ සියලු සංශෝධන පිළිබඳව නීතිපතිවරයා ගැඹුරින් අධ්යයනය කරලා සහතිකයක් දීලා තියෙනවා. මේක සම්මත වෙච්ච පනතක්. මේක ගැන විවාද කරන්න දැන් බැහැ. හැබැයි මේ පනතේ සංශෝධනය වියයුතු තැනක් තියෙනවා නම් ඒකට බාධාවක් නැහැ. ඒවා සංශෝධනය කරන්න පුළුවන්.”
මේ නීතියේ අඩුපාඩු තියෙනවා. අපිත් සමහර ඒවා නිරීක්ෂණය කරලා තියෙනවා. ඒ නිසා අපි විවෘතයි. මේකේ අවශ්ය සංශෝධන මොනවද කියලා විපක්ෂයත් යෝජනා කරන්න. අපි සාකච්ඡා කරමු. ඒ බලය තියෙන්නේ පාර්ලිමේන්තුවට.”
