තහනම් උත්තේජක නියාමනයන් උල්ලංඝණය කිරීමේ චෝදනාව මත ක්රිකට් ක්රීඩක නිරෝෂන් දික්වැල්ලට ශ්රී ලංකා ක්රිකට් ආයතනය විසින් තරග තහනමක් පනවා තිබේ.
නිවේදනයක් නිකුත් කරමින් ශ්රී ලංකා ක්රිකට් ආයතනය සඳහන් කළේ තහනම් උත්තේජක නීති උල්ලංඝනය කිරීමේ චෝදනාව මත ක්රිකට් ක්රීඩක නිරෝෂන් දික්වැල්ලට සියලු ආකාරයේ ක්රිකට් තරගවලට සහභාගි වීම අත්හිටුවා ඇති බවය.
අත්හිටුවීම වහාම ක්රියාත්මක වන අතර නැවත දැනුම් දෙන තුරු ක්රියාත්මක වේ.
ලංකා ප්රිමියර් ලීග් (LPL) 2024 අතරතුර ශ්රී ලංකා තහනම් උත්තේජක මර්දන නියෝජිතායතනය (SLADA) විසින් පවත්වන ලද මෙම පරීක්ෂණය ශ්රී ලංකා ක්රිකට් ආයතනයේ මැදිහත් වීමෙන් පවත්වාගන්නේ තහනම් උත්තේජක සහ ඒ හා බැඳුන මත්ද්රව්ය බලපෑමෙන් ක්රිකට් ක්රීඩාව නිදහස්ව පවතින බව සහතික කිරීම අරමුණු කර ගෙනය.
ක්රීඩා අමාත්යාංශයේ සහයෝගීතාවයෙන් සහ ලෝක තහනම් උත්තේජක මර්දන නියෝජිතායතනයේ මාර්ගෝපදේශයන්ට අනුව කරන ලද අහඹු මුත්රා සාම්පල පරික්ෂණයකින් නිරෝෂන් දික්වැල්ල තහනම් උත්තේජක භාවිතා කර ඇති බව තහවුරු කිරීමෙන් පසු ශ්රී ලංකා ක්රිකට් ආයතනය මෙම තහනම පනවා ඇත.
ශ්රී ලංකා ක්රිකට් ආයතනය නිවේදනයක් නිකුත් කරමින් පවසන්නේ ක්රීඩා අමාත්යාංශය සහ ශ්රී ලංකා තහනම් උත්තේජක මර්දන නියෝජිතායතනය සමඟ එක්ව, තහනම් උත්තේජක භාවිතයන්ගෙන් ක්රීඩාව ආරක්ෂා කර ගැනීම සඳහා අහඹු ලෙස දේශීය තරඟාවලි අතරතුර මෙම පරීක්ෂණ පවත්වන බවය.
පිරිසිදු හා සාධාරණ ක්රීඩාවක් සඳහා කැපවීම ශ්රී ලංකා ක්රිකට් ආයතනයට අතිශයින් වැදගත් වන බවත්, එම නීති උල්ලංඝනය කිරීම් පිළිබඳ ඕනෑම චෝදනාවක් ඉහළම මට්ටමින් සහ බැරෑරුම් ලෙස සලකන බවත් එම නිවේදනයේ දැක්වේ.
