ශ්රියානි විජේසිංහ –
එන්නත් සිරින්ජරවල උග්ර හිගයක් පවතින බැවින් රෝගීන්ගේ රුධිර පරික්ෂාවන් හා ඖෂධ එන්නත් කිරිමට නොහැකි වී ඇතැයි සෞඛ්ය වෘත්තීයවේදීන්ගේ විද්වත් සංගමය සඳහන් කරයි.
මිලිලීටර් 10 සහ 20 ප්රමාණයේ සිරින්ජර වර්ග කිසිවක් මේ වන විට වෛද්ය සැපයුම් අංශය තුළ නොමැති බව වාර්තා වන්නේ යැයි සංගමයේ සභාපති රවී කුමුදේශ් පැවසුවේය.
තත්ත්වයෙන් බාල වීම හේතුවෙන් අදාල සිලින්ජර් ටෙන්ඩරය අත්හිටුවීමට වෛද්ය සැපයුම් අංශය කටයුතු කර ඇති බැවින් මෙය නැවත ලැබීම සැලකිය යුතු කාලයකින් ප්රමාද වනු ඇති බව වෛද්ය සැපයුම් අංශ දැනුම් දී ඇතැයි රවී කුමුදේශ් සදහන් කරයි.
සිරින්ජර තුල ජලවාෂ්ප හා තෙල් වැනි ද්රව්ය පවතින බවට විශාල වශයෙන් රෝහල්වලින් පැමිණිලි ලැබීමත් සමග මෙම සිලින්ජර් තහනම් කිරිමට සැපයුම් අංශය කටයුතු කර තිබිණි.
එසේම මිලිලීටර් 5ක ප්රමාණයේ සිරින්ජර කුඩා ප්රමාණයක තොගයක් පවතින බැවින් ඒවාද මිලිලීටර් 10 සහ 20 සිලින්ජර් අවශ්යතාව සඳහා ලබා ගැනීම හේතුවෙන් මේවාද ඉදිරි මාසයක පමණ කාලයදි අවසන් වීමට නියමිතව ඇතැයි සභාපතිවරයා කියයි.
මේ හේතුවෙන් රෝගීන්ට නිසි ප්රතිකාරයන් ලබා දීමට පෙර කළ යුතු රුධිර පරික්ෂාවන් සිදුකිරිමට නොහැකි වීමෙන් බරපතල තත්ත්වයන් නිර්මාණය විම වැලැක්විය නොහැකි බවද වෛද්ය සේවා ආරංචි මාර්ග පුරෝකථනය කර ඇත.
වෛද්ය සැපයුම් අංශයේ අධ්යක්ෂකවරයා ඉමියුනෝග්ලොබියුලින් ගනුදෙනුවට අදාලව බන්ධනාගාර ගත කිරීම හේතුවෙන් ඇති වූ බිය මූලික කර ගනිමින් ඇතැම් නිලධාරීන් තීරණ ගැනීම මගහැර තිබේ.
මේ හේතුවෙන් මෙවැනි ගැටලු සදහා පිලියම් යෙදීමට විශාල කාලයක් ගතවනු ඇති බවද සංගමය පෙන්වාදේ.
