චතුර රුවන් වීරක්කොඩි-
කොරෝනා ව්යාප්තිය හේතුවෙන් රටරටවල් අතර ගමනාගමනය අඩාල වී තිබෙන මොහොතක විවාහ උත්සවයක් සදහා විදෙස් නෑදෑ හිතවතුන්ගෙ පැමිණීම අසීරු කටයුත්තකි. නමුත් කැනේඩියානු ජාතික ලින්ඩ්සේ ක්ලොව්ස් සහ ඇලෙක්ස් ලෙකී නැමැති යුවල එයට විසඳුමක් සොයාගෙන තිබිණ.
ඇලෙක්ස් සහ ලින්ඩ්සේ දෙදෙනාම 29 හැවිරිදි වියේ පසුවන්නෝය. වසර හයක පෙම් සබඳතාවකින් පසු ඔවුන් දෙදෙනා විවාහ ගිවිසගත්තේ 2019 නොවැම්බර් මාසයේදීය. විවාහය සිදුවීමට නියමිතව තිබුණේ පහුගිය අගෝස්තු මාසයේදී වුවත් කොවිඩ්-19 වසංගතය නිසා පාසල්, ව්යාපාරික ස්ථාන, හෝටල් පමණක් නොව දේශසීමාද වසා දමන්නට විය. නමුත් එම වාරණවල අවසානයක් නිශ්චිතව කිව නොහැකි බැවින් තව දුරටත් විවාහය කල්දැමීම තේරුමක් නැති බව ඔවුහු වටහා ගත්හ.
නමුත් විවාහය සදහා ඇමෙරිකාවේ හිතවතුන්ට සහභාගි වීමට නොහැකි වීම ගැටලුවක් විය. මාස හයකට වැඩි කාලයක් පුරා දෙරට අතර ගමනාගමනය තහනම් කර තිබීම ගැටලුවට හේතුවය. ඊට විසඳුමක් වශයෙන් ලින්ඩ්සේ හා ඇලෙක්ස් තීරණය කලේ ඔවුන්ගේ විවාහ උත්සවය දෙරටේම නෑදෑ හිතවතුන්ට සහභාගි විය හැකි පරිදි කැනඩා – ඇමෙරිකා දේශ සීමාවේදී පැවැත්වීමටයි.
ඔක්තෝම්බර් 10 වෙනිදා ඇමෙරිකාවත් කැනඩාවත් වෙන් කෙරෙන සෙන්ට් ක්රොයික්ස් නදියේ මැදට වන්නට ලීයෙන් තනවා ඇති පාවෙන ඵලකයක් මත ඔවුන්ගේ විවාහය පැවැත්වුණි. චාම් හා සරල ආකාරයට නෑදෑ හිතවතුන් මධ්යයේ වූ විවාහය බොහෝ දෙනාගෙ අවධානයට ලක්විය. පවුල් දෙකේ සමහරෙක් බෝට්ටු මත ද තවත් සමහරෙක් ඵලකය මත ද සිටිමින් විවාහයට මෙතෙක් නොවූ විරූ අපූර්වත්වයක් එක් කරන්නට වූහ.
කොරෝනා තත්වය හේතුවෙන් කැනඩාවෙන් 50 දෙනෙකුට සහ ඇමෙරිකාවෙන් 15 දෙනෙකුට වඩා සහභාගි නොවන සේ විවාහ උත්සවය සංවිධානය කරන්නට විවාපත් යුවල සමත් වී තිබූ අතර සහභාගි වූවන් සියල්ලෝ කොරෝනා මර්දන නීතිරීතිවලට අනුකූලව මාස්ක් පැළදීමටත් සමාජ දුරස්ථභාවය පවත්වාගැනීමටත් වගබලාගෙන තිබුණි.
|
