කිරින්ද ධීවර වරායේ රාජිතගේ වැලි කෙළිය දැන් පත්තු වී තිබේ. මේ වනවිට හිටපු ඇමතිවරයා ලොවෙත් නැත. හැංගී ඉන්න තැනකින් හොයා ගන්නට අපරාධ විමර්ශන නිලධාරීන්ට ද තවමත් පුලුවන් වී නැත. කෙරුමෙක් උසාවියට ගෙන්නා ගන්නට යන විට විමර්ශන අංශවලට අප්රමාණ ගැහැට විඳන්නට සිදුවන්නේය. ගමේ අපට දාන තග දාන්නට බැරිය. උන් උසාවියට ඉදිරියට ගෙන යන්නට අවශ්ය මල නොතලා රොන් ගන්නා ආකාරයටය.
දිගින් දිගටම අල්ලස් කොමිසම මග හරිමින් සිටින රාජිතට අද කොළඹ මහේස්ත්රාත් අධිකරණයෙන් නොතිසි නිකුත් කරන්නේ ඒ අතරය. ඒ අගෝස්තු 29 වැනි දින අධිකරණයේ පෙනී සිටින ලෙස දන්වමිනි.
අල්ලස් කොමිසම විසින් මෝසමක් ගොනුකරමින් සිදුකළ කරුණු දැක්වීම සලකා බැලූ කොළඹ ප්රධාන මහේස්ත්රාත් තනුජා ලක්මාලි ජයතුංග එම නොතීසි නිකුත් කරනු ලැබුවේ අපරාධ නඩු විධාන සංග්රහයේ 61 වගන්තිය ප්රකාරවය.
අල්ලස් කොමිසම අධිකරණයට දැන්වූ තර්කය
මෝසම කැඳවූ අවස්ථාවේ දී අල්ලස් කොමිසම වෙනුවෙන් අධිකරණයේ පෙනී සිටියේ සහකාර නීති අධ්යක්ෂ සුලෝචනා හෙට්ටිආරච්චිය. ඇය පෙන්වා දුන්නේ අපරාධ නඩු විධාන සංග්රහයේ 61 වගන්තිය ප්රකාරව නියෝගයක් ලබා ගැනීමට අවශ්ය නම් සාක්ෂි මෙහෙයවීමක් සිදුකළ යුතු බවය.
එබැවින් කිරින්ද ධීවර වරායේ වැලිගොව්වා ධීවර නෞකාව යොදා ගනිමින් සිදුකරන ලද අවිධිමත් ව්යාපෘතිය සම්බන්ධව විමර්ශනය සිදුකරන විමර්ශන නිලධාරන් දෙදෙනා සාක්ෂි ලබා ගැනමට කැඳවන බව ඇය අධිකරණය හමුවේ කියා සිටියාය.
ඒ අනුව අල්ලස් කොමිසමේ දූෂණ විමර්ශන අංශයේ ස්ථානාධිපති ප්රධාන පොලිස් පිරීක්ෂක තුෂාර සම්පත් පුෂ්පකුමාර සහ එම අංශයේ පොලිස් පරික්ෂක එම් විමරලරත්න යන අයගෙන් සාක්ෂි ලබා ගැනීම සිදුකළේය. ඔවුන් සාක්ෂි ලබා දෙමින් පැවසුවේ සිද්ධියට අදාලව ලද නිර්ණාමික පැමිණිල්ලක් අනුව විමර්ශන ආරම්භ කළ බවය.
රජයට පාඩුව රුපියල් ලක්ෂ 262යි.
මෙම විමර්ශනයෙන් කිරින්ද ධීවර වරාය තුළ සිදුවූ එම අවිධිමත් ව්යාපෘතිය හේතුවෙන් රුපියල් ලක්ෂ 262ක මුදලක් ලංකා රජයට පාඩු වී ඇති බවට අනාවරණය වූ බව ද එම නිලධාරීහු කියා සිටියහ.
ඔවුන් සඳහන් කළේ මූලික විමර්ශනවලින් පසුව සිද්ධියේ සැකකරුවන් ලෙස ධීවර සංස්ථාවේ හිටපු සභාපති උපාලි ලියනගේ සහ එවකට හිටපු ධීවර අමාත්ය රාජිත සේනාරත්න නම් කළ බවය.
අදාල සිද්ධියේ පළමුවෙනි සැකකරුවන උපාලි ලියනගේ අත් අඩංගුවට ගැනීමෙන් පසු අධිකරණ නියෝග අනුව ඇප මත මුදා හැර තිබිණි. දෙවැනි සැකකරුවන හිටපු ධීවර අමාත්ය රාජිත සේනාරත්න අල්ලස් කොමිසම මග හරිමින් සිටින බව විමර්ශන අංශ අද අධිකරණයට කීවේය.
ඔවුන් පැවසුවේ හිටපු අමාත්යවරයාට පසුගිය අගොස්තු 07 වැනිදා කොමිසම හමුවේ පෙනී සිට ප්රකාශයක් ලබා දෙන ලෙස නොතීසි නිකුත් කර තිබුණ ද ඔහු කොමිසම හමුවේ පෙනී නොසිටි බවය.
සැකකාර හිටපු අමාත්යවරයා කොමිසම හමුවේ පෙනී නොසිටිමින් ඔහුගේ නීතිඥවරයෙක් ලවා අසනීප බව දක්වමින් වෛද්ය වාර්තාවක් වෙනුවට අල්ලස් හෝ දූෂණ කොමිසමට ඖෂධ වාර්තාවක් යොමු කර ඇති බව ද නිලධාරීහු අධිකරණයට හෙළි කළහ.
විමර්ශන නිලධාරින් කියා සිටියේ අල්ලස් කොමිසම හමුවේ දිගින් දිගටම පෙනී සිටිම මගහරිමින් සිටින හිටපු අමාත්යවරයා සොයා ගැනීම සඳහා සෝදිසි වරෙන්තු ද ලබා ගැනීමට සිදුවූ බවය.
සෝදිසි වරෙන්තු ප්රකාරව අල්ලස් කොමිසමේ විමර්ශන නිලධාරින් ඇමතිවරයා සිටිනු ඇතැයි විශ්වාස කළ ස්ථාන පහක් පරීක්ෂා කළ ද ඔහු එම ස්ථානවල නොසිටි බව ද ඔවුහු අධිකරණයට කරුණු ගොනු කළහ.
ඔවුන් පෙන්වා දුන්නේ සැකකාර ඇමතිවරයාගෙන් ප්රකාශ ලබා ගැනීමට නොහැකිවීම මත අවසන් අදියරේ ඇති විමර්ශනයේ කටයුතු අඩාල වී ඇති බවය.
එබැවින් සැකකාර හිටපු ඇමතිවරයාට අපරාධ නඩු විධාන සංග්රහයේ 61 වගන්තිය ප්රකාරව ප්රකාශයක් ලබා දෙන ලෙස ඉල්ලා සිටිමින් විමර්ශන නිලධාරීහු අධිකරණය ඉදිරියේ සාක්ෂි ලබා දුන්හ.
ඒ අනුව කරුණු සලකා බැලූ මහේස්ත්රාත්වරිය රාජිත සේනාරත්නට ලබන 29 වැනි දින අධිකරණයේ පෙනී සිටීමට නියෝග කළාය. රට බලා සිටින්නේ 29 වැනිදා රාජිත කරන්නට යන දේය.
