මනම්පිටිය නිමල් ජයරත්න –
පොලොන්නරුව මාදුරුඔය ප්රධාන මාර්ගයේ සහල් පටවාගත් ලොරියක් සහ වැලි පටවා ගත් ලොරියක් ඊයේ (07) සවස මනම්පිටිය ප්රදේශයේදී මුහුණට, මුහුණ ගැටී සිදුවූ අනතුරෙන්, ලොරි රථ දෙකේ සිරවී සිටි රියදුරන් දෙදෙනා සහ සහල් ලොරියේ සහායකයා ප්රදේශවාසීන් සමග එක්ව මනම්පිටිය පොලිසිය විසින් ගලවාගෙන පොලොන්නරුව මහ රෝහලට ඇතුළත් කර තිබේ.
මේ ගලවා ගැනීම සඳහා පැයක පමණ දැඩි මෙහෙයුමක් කිරීමට සිදුවූ අතර සිවු දෙනාම දිවි ගලවගෙන සිටිති.
අනතුරෙන් ලොරි රථ දෙකේ ඉදිරියේ කොටස දැඩිසේ හානි වී තිබිණි. සහල් ලොරියේ රියදුරු සහ සහායකයාත් වැලි ලොරියේ රියදුරත් ලොරි රථ තුළ සිරවී සිටියහ.
දැඩි ලෙස හානියට පත් ලොරි දෙකේ ඉදිරි කොටස් අතර සිරවී සිටි රියදුරු දෙදෙනා සහ සහායකයාගේ දිවි බේරාගැනීමට ලොරි රථයේ සහල් පැකට් තොගය ඉවත් කිරිමට ප්රදේශවාසීන් කටයුතු කළ අතර ජේ.සී.බී. යන්ත්රයක් මගින් වැලි ටිපරය ආරක්ෂිතව පෙරලීමටද කටයුතු කළහ.
රියදුරන් දෙදෙනා පොළොන්නරුව මහ රෝහලේ දැඩි සත්කාර ඒකකයේ ප්රතිකාර ලබමින් සිටින බව මනම්පිටිය පොලිස් ස්ථානාධිපති පොලිස් පරීක්ෂක අසේල සරත් කුමාර අප කළ විමසීමකදී සඳහන් කළේය.
සහල් පට්වාගත් ලොරි රථය ඉදිරියෙන් නවතා තිබූ පාන් ලොරියක් ඉස්සර කරගෙන යෑමට සූදානම්වීමේදී ඉදිරියෙන් පැමිණ
වැලි ටිපර් රථයේ ගැටී මෙම අනතුර සිදුව ඇති බව මූලික පරීක්ෂණවලින් තහවුරු වී ඇත.
පොලොන්නරුව ජේෂ්ඨ පොලිස් අධිකාරි නිශාන් සිල්වා සහ වැලිකන්ද ප්රදේශය භාර සහකාර පොලිස් අධිකාරී සුදත් අස්මඩලගේ උපදෙස් මත මනම්පිටිය පොලිස් ස්ථානාධිපති පොලිස් පරීක්ෂක අසේල සරත් කුමාර ඇතුළු පොලිස් නිලධාරීන් කණ්ඩායමක් මෙම අනතුර පිළිබඳ වැඩිදුර පරීක්ෂණ සිදුකරයි.
