අද (08) උදේ වරුවේ පුරා පැය 03ක් අධ්යාපන අමාත්යාංශය ඉදිරිපිට මහා මාර්ගය අවහිර කරමින් ගුරු අධ්යාපනඥයන් විසින් දියත් කළ දැවැන්ත විරෝධතා ව්යාපාරයෙන් පසු අධ්යාපන අමාත්ය දිනේෂ් ගුණවර්ධන විසින් හෙට (09) දහවල් 12ට සමස්ථ ලංකා ගුරු අධ්යාපනඥ සේවා නිලධාරීන්ගේ වෘත්තීය සංගමය වෙත විශේෂ සාකච්ඡාවක් ලබා දී තිබේ.
රජයේ ප්රතිපත්ති ප්රකාශනය වූ සෞභාග්යයේ දැක්මට අනුව ජාතික ගුරු අධ්යාපන විද්යා පීඨ පිළිගත් විශ්වවිද්යාල පද්ධතියට එක් කරගැනීමේ වැඩපිළිවෙළ ක්රියාත්මක කර ගුණාත්මක ගුරුවරයෙක් නිර්මාණය කිරීමට අවශ්ය පරිසරය සාදාදෙන ඉල්ලමින් විද්යාපීඨ 19ක සහ ගුරු විද්යාල 8ක හා ගුරු වෘත්තිය සංවර්ධන මධ්යස්ථාන 112ක සේවය කරන පීඨාධිපතිවරුන් ඇතුළු සියලුම ගුරු අධ්යාපනඥ නිලධාරීහු අද ( 08) කොළඹට පැමිණ මෙම විරෝධතා ව්යාපාරය දියත් කළහ
ගුරු අධ්යාපනඥ සේවයේ වෘත්තිකයන් අද උදේ 8.30ට පමණ පාර්ලිමේන්තු වටරවුම අසලින් විරෝධතාවය අරඹා තිබිණි. එතැන උද්ඝෝෂණයක නිරත වූ ඔවුහු අනතුරුව එතැන සිට පා ගමනින් විරෝධතා පුවරු රැගෙන ඉසුරුපාය දක්වා මහ වැසි මැද ගමන් කළහ. ඉසුරුපාය අසල විරෝධතා ව්යාපාරය ආරම්භ වීමත් සමග ප්රධාන දොරටුව අගුළු ලා වසා දැමීමට බලධාරීන් කටයුතු කර තිබුණු බව වාර්තා විය.
අනතුරුව ඉසුරුපාය අසලින් ප්රධාන මාර්ගය අවහිර කර දියත් කළ පැය 03ක විරෝධතාවයෙන් අනතුරුව අධ්යාපන අමාත්යාංශ ලේකම් මහාචාර්ය කපිල ගුණවර්ධන සමග සාකච්ඡාවකට වෘත්තීය සමිති නායකත්වයට අවකාශ සැලසිනි. පැයකට අධික කාලයක් කළ සාකච්ඡාවෙන් අනතුරුව දෙපාර්ශවය අතර අවබෝධාත්මක එකඟතාවයක් ඇති වූ බව වෘත්තීය සමිති නායකත්වය ප්රකාශ කළේය.
.තමන් රජයෙන් ඉල්ලා සිටින්නේ වැටුප් වැඩිවීම් හෝ වෙනත් වරදාන නොව, අධ්යාපන ප්රතිසංස්කරණ අමාත්යාංශ ලේකම්වරයාගේ පටු අවශ්යතාවය මත රජයේ ප්රතිපත්තිය වෙනස් කරමින් අවරගණයේ ආයතනයක් වූ ජාතික අධ්යාපන ආයතනය යටතට ගුරු අධ්යාපන විද්යාපීඨ අනුයුක්ත නොකර විශ්විද්යාල ප්රතිපාදන කොමිසම යටතේ විධිමත් විශ්විද්යාලයක් පිටුවන ලෙස බව සමස්ථ ලංකා ගුරු අධ්යාපනඥ සේවා නිලධාරීන්ගේ වෘත්තීය සංගමය ප්රකාශ කළේය.
අධ්යාපන අමාත්යවරු දෙදෙනෙක් යටතේ පවත්වාගෙන පැමිණි සාධනීය සාකච්ඡා මාලාවකින් අනතුරුව ගුරු විශ්වවිද්යාල පිහිටුවීම විෂයෙහි සෞභාග්යයේ දැක්ම ප්රතිපත්ති ප්රකාශනයේ හරය ක්රියාත්මක කිරීම සඳහා හිටපු අධ්යාපන ඇමති ජී එල් පීරිස් විසින් 2020 .12 .14 දින ඉදිරිපත් කළ කැබිනට් පත්රිකාව ක්රියාත්මක කරන ලෙස ඉල්ලා සිටින්නට තමන්ට මහ මගට බැස සටන් කිරීමට සිදුවී ඇති බව ඔවුහු කීහ.
“ කෙසේ වෙතත් හෙට අධ්යාපන අමාත්යාවරයා සමග අපට සාකච්ඡා වාරයක් ලැබී තියෙනවා. අප දන්නවා අධ්යාපන අමාත්ය දිනේෂ් ගුණවර්ධන මේ රටේ ඉන්න පරිණත දේශපාලඥයෙක්. සාධනීය වෘත්තීය අරගල ගණනක් ජනතාව සහ රට වෙනුවෙන් ජයග්රහණය කර දෙන්නට කැප වුණු ඉතිහාසයක් සහිත ප්රභූ වාමාංශක දේශපාලන නායකයෙක්. අප මේ ඉල්ලා සිටින්නෙ එක් එක් පුද්ගලයන්ගේ විකෘති පටු අරමුණුවලට ඉඩ නොදී රජයේ ප්රතිපත්ති ප්රකාශනයේ අන්තර්ගතය ක්රියාත්මක කරන්න කියන යෝජනාව. ඉන් මේ රටේ අනාගතය ශක්තිමත් වෙනවා මිසක් රටට, රටේ අධ්යාපනයට කිසිම අගතියක් වෙන්නෙ නෑ. “
“ජාතික අධ්යාපන ආයතනය වගේ දුර්වල ආයතනයක් යටතට ගුරු අධ්යාපන විද්යා පීඨ පත් කර ගුරු අධ්යාපනය විනාශ නොකර ගුණාත්මක ගුරුවරයෙක් බිහි කරගත හැකි පිළිගත් විශ්විද්යාල පදනමක් මත ගුරු විශ්විද්යාලය පිහිටුවන්න කියන කාරණාව අප දිගින් දිගටම ඉල්ලා සිටියා. අප විශ්වාස කරනවා එතුමා මේ කරුණුවලට සාධනීය ප්රතිචාර දක්වයි කියලා.“ සමස්ථ ලංකා ගුරු අධ්යාපනඥ සේවා නිලධාරීන්ගේ වෘත්තීය සංගමයේ ප්රකාශකයෙක් පැවසීය.
