“ගණේමුල්ල සංජීව” ඝාතනයේ ප්රධාන සැකකාරියකවන ඉෂාරා සෙව්වන්දි ඇතුළු ශ්රී ලාංකිකයන් පස් දෙනා අද (15) සවස දිවයිනට රැගෙන ඒමට නියමිතව ඇතැයි පොලිස් විමර්ශන අංශ පවසයි.
ඔවුන් දිවයිනට රැගෙන ඒම සඳහා පොලිස් විශේෂ කාර්ය බළකායේ නිලධාරීන් දෙදෙනෙකු නේපාලය බලා පිටත්ව ගොස් තිබේ. දැනටමත් නේපාලයේ සිටින අපරාධ පරීක්ෂණ දෙපාර්තමේන්තුවේ කණ්ඩායමට සහාය වීම සඳහා මේ කණ්ඩායම පිටත් වී ගොස් ඇත.
දැනට අත්අඩංගුවේ පසුවන කෙහෙල්බද්දර පද්මේගෙන් කරන ලද ප්රශ්න කිරීම්වලට අනුව ඉෂාරා සෙව්වන්දි නේපාලයේ රැඳී සිටින බවට අනාවරණය කරගැනීමට හැකිව තිබුණි.
එම තොරතුරු මත පදනම්ව කළ දීර්ඝ තාක්ෂණික සහ බුද්ධි මෙහෙයුමකින් අනතුරුව ඉෂාරා සෙව්වන්දි නැමැත්තියව නේපාලයේදී කොටු කරගෙන අත්අඩංගුවට ගෙන තිබුණේ ඉකුත් 13වැනිදා රාත්රියේය. ඒ ගණේමුල්ලේ සංජීව ඝාතනයෙන් මාස 08කට පසුවය.
මෙම අත්අඩංගුවට ගැනීම සදහා බස්නාහිර උතුරු අපරාධ කොට්ඨාසයේ පොලිස් කණ්ඩායමක් නේපාලය බලා පිටත්ව ගොස් තිබුණි. එම කණ්ඩායම නේපාලයේ ආරක්ෂක අංශ සමග එක්ව කළ විශේෂ මෙහයුමකදී ඇයව මෙලෙස අත්අඩංගුවට ගැනීමට හැකි විය. ඇය සමග තවත් කාන්තාවක් සහ පිරිමි සිවු දෙනෙක් අත් අඩංගුවට ගෙන ඇති බව පොලිස් විමර්ශන අංශ කියයි.
එමෙන්ම ඉෂාරා සෙව්වන්දිට රටින් පලායාමට සහාය දීමේ චෝදනා සම්බන්ධයෙන් තවත් පුද්ගයෙකුද අත්අඩංගුවට ගෙන ඇති බව පැවසේ.
