ඉම්රාන් ගිය පසු ඇමෙරිකාව යළිත් පකිස්තානය දෙසට හැරෙයි

පාකිස්ථානයේ හිටපු අග්‍රාමාත්‍ය ඉම්රාන් ඛාන් නිසා විනාශ වූ ඇමරිකා පාකිස්ථාන ද්විපාර්ශවික සබඳතා යළි ගොඩ නැංවීමට තමා සූදානම් බව එක්සත් ජනපදයේ සෙනෙට් බහුතර නායක චාර්ල්ස් ඊ ෂූමර් පවසයි. ඉම්රාන් ඛාන්ගේ එක්සත් ජනපදයට විරුද්ධ ප්‍රකාශනය දෙරට අතර සබඳතාවය බිඳ හෙලන්නට ප්‍රධාන හේතුව වූ බව ඔහු පැවසුවේ ඇමරිකා පාකිස්ථාන උපදේශන කණ්ඩායම නිව්යෝර්ක්හි දී හමු වූ අවස්ථාවේදීය. වර්තමාන පාකිස්ථාන අග්‍රාමාත්‍ය ෂබ්බාස් ෂරීෆ් හා තමන් දෙරට අතර ද්විපාර්ශවික බැඳීම් යළි ගොඩ නංවා ගැනීමට බලාපොරොත්තු වන බව ද ෂූමර් පැවසීය. මෙහිදී වැඩිදුරටත් අදහස් පළ කළ සෙනෙට් සභික නායක පැවසුවේ ප්‍රජාතන්ත්‍රවාදී සම්මතයන් සහ වටිනාකම් විශ්වාස කරන අතර ප්‍රජාතන්ත්‍රවාදී සම්මතයන්ට හා වටිනාකම්වලට ගරු කරන බවයි. ඒ නිසා දෙරටට යළි සබඳතා ගොඩ නංවා ගැනීම අපහසු නොවන බව ද ඔහු පෙන්වා දුන්නේය. ඊළඟ මැතිවරණයේදී යළිත් ඉම්රාන් ඛාන් බලයට පත් වුවහොත් එක්සත් ජනපද ප්‍රතිපත්තියට කුමක් සිදුවේවිදැයි නැඟූ පැනයකට පිළිතුරු දුන් ෂූමර් සඳහන් කළේ ආණ්ඩුවේ තේරී පත් වූ ප්‍රධානියෙකු සමඟ දිගින් දිගටම සංවාද පවත්වන නිසා එක් පුද්ගලයෙකු විරුද්ධ වූ පමණින් ගැටළුවක් ඇති නොවන බවයි. දිගටම සංවාද පැවැත්වීමෙන් ගැටළු නිරාකරණය කර ගත හැකි බව ද ඔහු සඳහන් කළේය.