ඉන්දියාවේ කොවිඩ් ආසාදිත වූ රෝගීන් අතර දරුණු ප්රතිඵල ඇති කරවන දුර්ලභ ඝනයේ දිලීර ආසාදන රෝගයක් පැතිරෙමින් පවතින බවට නැෂනල් ජියෝග්රැපික් වෙබ් අඩවිය වාර්තා කරයි.
නාසයේ මුලින් ආසාදනය වී පසුව ඇස් සහ මොළය කරා ගමන් කරවිය හැකි මෙම දිලීර රෝගය නිසා ඇස් අන්ධ වීම, මොළයට දරුණු හානි සිදුවීම වැනි තත්ත්වයක් දක්වා දුරදිග යන බවත් මේ වනවිටත් එවැනි සිද්ධීන් කිහිපයක් වාර්තා වී ඇති බවත් මෙම වෙබ් අඩවිය පවසයි.
මේ වනවිට ඉන්දියාවේ සිදු කෙරී ඇති පර්යේෂණවලට අනුව මෙසේ පැතිරෙන දිලීර රෝගය වන්නේ මියුකොමයිකෝසිස් (mucormycosis ) නම් දිලීර ආසාදනයයි.
දිල්ලිය ආසන්න නගරයක් වන ගාෂියාබාද් හි 48 හැවිරිදි කාන්තාවකගේ මෙන්ම පුනේ හි රෝගීන් දෙදෙනකුගේ දෑස් මෙම දිලීර ආසාදන වීමෙන් අන්ධ වී ඇති අතර තවදුරටත් එය මොළය කරා ව්යාප්ත වීම වළක්වා ගැනීම සඳහා ඔවුන්ගේ දෑස් ශල්යකර්මයක් මඟින් ඉවත් කිරිමට කටයුතු කර ඇත.
මෙම දිලීරය ආසාදනය වූ කොවිඩ් ආසාදිත රෝගීන් ගණනාවක්ම ඉන්දියාවේ විවිධ ප්රදේශවලින් වාර්තා වී ඇති බව වෛද්යවරු පවසති. ඔවුන් මෙම රෝගය ව්යාප්තියට හේතුව ලෙසින් සඳහන් කරන්නේ කොවිඩ් ආසාදිත රෝගීන් සඳහා අධික ලෙස ස්ටිරොයිඩ කාණ්ඩයේ ඖෂධ ලබා දීම බවය.
ලෝකයේ බොහෝ රටවල කොවිඩ් ආසාදිත රෝගීන්ගේ ශ්වසන පහසුව වෙනුවෙන් ඩෙක්සාමෙතසොන් නැමති ස්ටීරොයිඩය ලබා දෙන අතර ස්ටීරොයිඩ කාණ්ඩයේ ඖෂධ වැඩි වශයෙන් ලබා ගැනීම හේතුවෙන් ප්රතිශක්තිය දුර්වල වන බවත් රුධිරගත සීනි ප්රමාණය ඉහළ යාමට හේතුවන බවත් පැවසෙන අතර මෙම සාධක දෙක මෙම දිලීරය වර්ධනය වීම සඳහා පසුබිමක් නිර්මාණය කරන බවට ඉන්දීය වෛද්ය පර්යේෂකයෝ විශ්වාස කරති.
කෙසේ වුවද ඉන්දීය වෛද්ය පර්යේෂකයන් පවසන්නේ එරට සිටින කොවිඩ් ආසාදිතයන්ට සාපේක්ෂව මෙම දිලීරය පැතිරී ඇත්තේ ඉතා සුළු රෝගීන් ප්රමාණයකට පමණක් බවයි. කෙසේ වුවද එය තවදුරටත් ව්යාප්ත වීම වළක්වා ගැනිම සඳහා ඔක්සිජන් සැපයුම් උපකරණ ඇතුළු වෛද්ය උපකරණ දැඩි විෂබීජ හරණයකට ලක් කළ යුතු බවට ඔවුහු අවධාරණය කරති.
