තුෂාරී කළුබෝවිල –
බෙංගාල බොක්ක ආශ්රිත ව පවතින පීඩන අවපාතය හේතුවෙන් ඉදිරි දින 3 වඩාත් අවදානම් බව කාලගුණ විද්යා දෙපාර්තමේන්තුව අවධාරණය කරයි.
සති දෙකක් තිස්සේ පැවති වර්ෂාපතනය තවදුරටත් ඉහළ යන බවත්, වැසි සමග තද සුළං හා අකුණු අනතුරු ඇති වන බවත් කාලගුණ විද්යා අධ්යක්ෂ ජෙනරාල් අතුල කරුණානායක මහතා කීවේ ය.
මධ්ය කදුකරය, උතුරු මැද, උතුර, සබරගමුව, දකුණ, වයඹ හා බස්නාහිර පළාත්වල මිලිමීටර් 100 ඉක්මවූ තද වැසි ඇති වන බව ද ඒ මහතා කීවේ ය.
මෙකී සෑම දිස්ත්රික්කයක ම නායයාම් අවධානම් ප්රදේශවල ජනතාව දැඩි ලෙස විමසිල්ලෙන් පසුවිය යුතු බවත්, දැඩි අවදානම් ස්ථානවලින් ඉවත් වන ලෙසත් ජාතික ගොඩනැගිලි පර්යේෂණ ආයතනය අනතුරු අඟවයි. ඉවත් කළයුතු අය සම්බන්ධයෙන් ජාතික ගොඩනැගිලි පර්යේෂණ ආයතනය දැනටමත් දිස්ත්රික් හා ප්රාදේශීය ලේකම් කාර්යයාලවලට දැනුම්දී තිබේ.
බදුල්ල දිස්ත්රික්කයේ පස්සර, මාතලේ රත්තොට, උකුවෙල ප්රදේශ නායයෑම් දැඩි අවදානම් සහිත කලාප ලෙස දක්වා ඇති අතර කළුතර, ගාල්ල, රත්නපුර, නුවරඑළිය, මහනුවර, මාතලේ, කෑගල්ල දිස්ත්රික්ක ද නායයාම් අවදානම් සහිත වේ.
අකුණු අනතුරු හේතුවෙන් මරණ දෙකක් පසුගිය දිනවල වාර්තා වූ බවත්, තවදුරටත් එම අකුණු අනතුරුවලින් ආරක්ෂා වීමට කටයුතු කළ යුතු බවත් ආපදා කළමනාකරණ මධ්යස්ථානයේ සහකාර අධ්යක්ෂ ප්රදීප් කොඩිප්පිලි මහතා කීවේ ය..
ජලාශවල දියනෑමට යාම, විනෝද වීමට යාම දැඩි අවදානම් බවත්, බොහෝ ජලාශවල ජල මට්ටම ඉහළ යාම නිසා වාං දොරටු විවෘත කෙරෙන බැවින් ඒ ආශ්රිත පහත් බිම්වල ජල ගැලීම් හා එකවර ජල මට්ටම ඉහළ යා හැකි බවත් වාරිමාර්ග දෙපාර්තමේන්තුව පවසයි.
දිවයින වටා මුහුදු ප්රදේශවලත් තද වැසි, තද සුළං, අකුණු අනතුරු ඇති වන අතර සුළඟේ වේගය ඇතැම් විට පැයට කිලෝමීටර් 55 පමණ වන බැවින් ධීවර කටයුතුවලදී විමසිලිමත් විය යුතු වේ.
පුත්තලම සිට ගාල්ල, මාතර හා හම්බන්තොට හරහා පොතුවිල් දක්වා මුහුදු ප්රදේශවල සුළඟේ වේගය වඩාත් ඉහළ යා හැකි බවට කාලගුණ විද්යා දෙපාර්තමේන්තුව පවසයි.
ගත වූ සති දෙකක කාලයේ දී පුද්ගල මරණ පහක් සිද්ධ වූ අතර 6000 ට වැඩි පිරිසක් පීඩාවට පත් විය.
පස් කන්දක් කඩා වැටීම නිසා බදුල්ල දිස්ත්රික්කයේ අැල්ල සිට නමුණුකුල හරහා පස්සර දක්වා මාර්ගය පසුගිය දිනවල සම්පූර්ණයෙන් වසා දැමුණි. මේ වනවිට එම මාර්ගයේ පස් ඉවත් කර යථා තත්ත්වයට පත් කර ඇති නමුත් පවතින අධික වර්ෂාව හේතුවෙන් එම මාර්ගය භාවිත කිරීම අවධානම් බව බදුල්ල දිස්ත්රික් ආපදා කළමනාකරණ ඒකකය පවසයි.
