නව රජයේ යෝජිත අධ්යාපන ප්රතිසංස්කරණවලදී තීරණාත්මක සලකුණකින් විශේෂ අධ්යාපන විෂය ක්ෂේත්රය ලකුණුවන බවත්, එම ක්ෂේත්රයට විද්යාත්මක පරිචයක් සහිත ගුරු වෘත්තිකයින් වැඩි වශයෙන් බිහිකිරීමට විශේෂ අධ්යාපන විෂය මාලා පවත්වාගෙන යන ජාතික අධ්යාපන විද්යාපීඨවලට විශාල වගකීමක් පැවරෙනු ඇති බවත් අධ්යාපන අමාත්යාංශයේ නොවිධිමත් සහ විශේෂ අධ්යාපන ශාඛාවේ නියෝජ්ය අධ්යාපන අධ්යක්ෂ රෂිකා එල්ලාවල පැවසුවාය.
ඇය මේ බව ප්රකාශ කළේ හාපිටිගම් ජාතික අධ්යාපන විද්යාපීඨයේ විශේෂ අධ්යාපන පාඨමාලාවේ ගුරු ශික්ෂණ ලාභීන් විසින් පසුගිය 28 දා සංවිධානය කරන ලද “සහකම්පන” ප්රසංගාත්මක වැඩසටහනට එක්වෙමිනි.
විශේෂ අධ්යාපන ගුරුවරයෙක් සතු අනාගත භූමිකාව සහ විශේෂ අධ්යාපන අවශ්යතා සහිත දරුවන්ගේ කුසලතා සංවර්ධනය කර ජාතික තලය දක්වා රැගෙන පැමිණිය හැකි බවට ආදර්ශයක් සපයන සෞන්දර්යාංග සමග හාපිටිගම් ජාතික අධ්යාපන විද්යා පීඨයේ විශේෂ අධ්යාපන පාඨමාලාව හදාරන ශික්ෂණ ලාභීන් විසින් සහකම්පන මංගල ප්රසංගය සංවිධානය කර තිබිණි.
මෙම හෘදසංවේදී වැඩසටහන වාර්ෂිකව පැවැත්වීම සඳහා හාපිටිගම් ජාතික අධ්යාපන විද්යාපීඨය විසින් සැලසුම් කරන්නේ ආබාධිත බව සම්බන්ධ සමාජ ආකල්ප වෙනස් කරවන ආකාරයේ සංවාද ප්රවේශයක් විවර කරමිනි.
හාපිටිගම් ජාතික අධ්යාපන විද්යා පීඨයේ ගුරු සිසුන්ගේ සෞන්දර්ය වැඩසටහන්, මරදගමුල ආනන්ද කනිෂ්ඨ විද්යාලයීය විශේෂ අධ්යාපන ඒකකයේ සංවර්ධනය කර ජාතික මට්ටමේ සෞන්දර්ය වැඩසටහන්වලට එක් වූ දරු දැරියන්ගේ විචිත්ර නර්තනාංග, විශේෂ අධ්යාපන දරුවන්ගේ අධ්යයන කටයුතු සඵල කරවන නිර්මාණාත්මක ඉගනුම් ආධාරක ප්රදර්ශනයක් ඇතුළු අංග රැසකින් සහකම්පන වැඩසටහන විචිත්රවත් විය.
සහකම්පන වැඩ සටහන අමතමින් අධ්යාපන අමාත්යාංශයේ නොවිධිමත් සහ විශේෂ අධ්යාපන ශාඛාවේ නියෝජ්ය අධ්යාපන අධ්යක්ෂ රෂිකා එල්ලාවල තවදුරටත් පෙන්වා දුන්නේ මේ වනවිට අධ්යාපන අමාත්යාංශය විසින් නිකුත් කර ඇති විශේෂ අධ්යාපන අවශ්යතා සහිත සිසුන් සාමාන්ය පන්තිකාමර පරිසරය තුළ සංවර්ධනය කිරීමේ “අන්තර්කරණ” සංකල්පය අනුව අන්තර්කරණ වැඩසටහන ක්රියාත්මකවන සෑම පාසලකම විශේෂ අධ්යාපන ඒ්කක දෙක බැගින් පවත්වාගැනීමට සිදුවන බවය.
සෞඛ්ය අංශ හා ඒකාබද්ධව විශේෂ අවශ්යතා සහිත දරුවන් අවුරුදු 03වන විට හඳුනාගෙන ඔවුන් කලාප අධ්යාපන කාර්යාලවල ලියාපදිංචි කර වයස අවුරුදු 04වන විට එම කලාපවල ස්ථාපිත විශේෂ තක්සේරු කමිටුවක් මගින් එම දරුවන් තක්සේරුකරනු ලබන බවත් ඉන් අනතුරුව වයස අවුරුදු 04 දී ඔවුන් පාසලේ විශේෂ අධ්යාපන ඒ්කකය වෙත යොමු පුරා වසරක් තිස්සේ කරන සංවර්ධන කාර්යයකින් අනතුරුව අවුරුදු 05දී සාමාන්ය දරුවන් සේ සාමාන්ය පන්තිකාමරයට යොමු කරන බවත් ඇය පැවසුවාය.
ඒ් අනුව එම කාර්යයට එක් විශේෂ අධ්යාපන ඒ්කකයක් සහ කෙටි කාලයක් තුළ සංවර්ධනය කළ නොහැකි දරුවන් හැකි ඉක්මනින් සංවර්ධනය කර 1 ශ්රේණියට යොමු කිරීම සඳහා තවත් විශේෂ අධ්යාපන ඒ්කකයක් පවත්වා ගැනීමට කටයුතු කරන බව ඇය පෙන්වා දුන්නාය. .
එමෙන්ම අන්තර්කරණ පාසලකට ද විශේෂ අධ්යාපන ගුරුවරයෙකු අනුයුක්ත කිරීමට සැලසුම් කර ඇති බැවින් අනාගතය සඳහා සහකම්පනයෙන් යුතු වෘත්තිකයින් වැඩි ප්රමාණයක් රටට බිහි කිරීමේ වගකීම ජාතික අධ්යාපන විද්යාපීඨවල ප්රමුඛ කාර්යයක් වනු ඇති බව ද නියෝජ්ය අධ්යාපන අධ්යක්ෂවරිය කීවාය.
මේ සංවාදය තුළ ජාතික අධ්යාපන විද්යාපීඨවෙත වාර්ෂිකව විශේෂ අධ්යාපන පාඨමාලාවලට බඳවා ගන්නා සිසුන් ප්රමාණය කප්පාදු වීම සම්බන්ධව ද කථිකාවක් මතුවූයේය. එහිදී එවැන්නක් සිදුනොවිය යුතු බවටත්, අධ්යාපන අමාත්යාංශය ඒ් සම්බන්ධව දැනුම්වත්ව කටයුතු කරනු ඇති බවටත් ද අදහස් පලවිය
පසුගිය වසර දෙකක කාලය තුළ පොදුවේ විශේෂ අධ්යාපන පාඨමාලාවලට ගුරු සිසුන් බඳවා ගැනීමේ කප්පාදුවක් සිදුව තිබිණි.
රජයේ අධ්යාපන ප්රතිපත්තියත් උල්ලංඝනය වන ආකාරයට අධ්යාපන අමාත්යාංශයේ යම් පිරිසක් විසින් සිදුකරනු ලබන බවට චෝදනා එල්ල වී ඇති මෙම තීන්දුව පිළිබඳව මේ වනවිට අමාත්යාංශයේ ඉහළම නිලධාරීන්ගේ අවධානය යොමු වී ඇතැයි වාර්තා වේ.
