මෙම මස මුලදී, ඇමරිකානු නීති සම්පාදකයින් 130ක් රජයේ වගවීමේ කාර්යාලයට ලිපියක් යොමුකරමින් ඇමරිකානු එක්සත් ජනපද ගොවිපලවල විදේශ ආයෝජනයන් සිදු කිරීම මගින් ඇතිවිය හැකි ආරක්ෂක තත්ත්වය සම්බන්ධයෙන් ඇඟවුම් අධ්යයනයක් ඉල්ලා සිටියහ.
“එක්සත් ජනපද ගොවිබිම් චීනය සතුවීම මගින් අපගේ ආහාර සුරක්ෂිතතාවයට සහ ජාතික ආරක්ෂාවට තර්ජනයක්” යැයි අධීක්ෂණ සහ ප්රතිසංස්කරණ පිළිබඳ සභා කමිටුවේ ශ්රේණිගත රිපබ්ලිකන් සාමාජික රෙප් ජේම්ස් කොමර් මාධ්ය නිවේදනයක් නිකුත් කරමින් කියා සිටියේය.
ඇමරිකාවේ ආහාර සැපයුමට ඇති තර්ජනයේ විෂය පථය පිළිබඳව වාර්තා කරන ලෙස සහ ඇමරිකානු ජනතාවගේ ආරක්ෂාව හොඳින්ම ආරක්ෂා කරන්නේ කෙසේද යන්න කොංග්රසයට දැනුම් දෙන ලෙස නීති සම්පාදකයින් විසින් රජයේ වගවීමේ කාර්යාලයේ ඉල්ලා සිටින බවද ඔහු පැවසීය.
චීන කෘෂිකාර්මික සමාගමක් වන ෆුෆෙන්ග් සමූහය එක්සත් ජනපද ගුවන් හමුදාවේ අධි තාක්ෂණික ඩ්රෝන යාන ක්රියාත්මක කරන කඳවුරකට කිලෝමීටර් 20 ක් පමණ දුරින් උතුරු ඩැකෝටා හි ග්රෑන්ඩ් ෆෝක්ස් හි ඉඩම් අක්කර 370 ක් මිලදී ගෙන ඇති බව හෙළි වීමෙන් පසුව එක්සත් ජනපද ගොවිබිම් වල විදේශීය හිමිකාරිත්වය පිළිබඳ අවධානය යොමු වීම ඉහළ ගියේය.
කෙසේ වෙතත් ෆුෆෙන්ග් සමූහය මේ සම්බන්ධයෙන් පවසන්නේ මෙම ඉඩම යෙදා ගන්නේ සත්ව ආහාර නිපදවීමට භාවිතා කිරීම සඳහා ඉහළ වටිනාකමක් ඇති ඇමයිනෝ අම්ල, ලයිසීන් සහ ත්රෙයොනීන් නිස්සාරණය කරන තෙත් ඉරිඟු ඇඹරුම් පහසුකම සඳහා බවයි. එමෙන්ම එහි බොහෝ නිෂ්පාදන උතුරු ඇමරිකාවේ විකුණනු ලබන බව සමාගම සිය වෙබ් අඩවියේ පවසයි.
එහෙත් ගුවන් කඳවුරේ මිනිසුන් රහිත ගුවන් යානා පද්ධති සංවර්ධනය කිරීමේ වගකීම දරන ඇමරිකානු කොන්ත්රාත්කරු වන ජෙනරල් ඇටොමික් එරොනෝටිකල් සිස්ටම් සමාගම මෙම චීන ආයෝජනයට විරුද්ධ වෙමින් ප්රකාශයක් නිකුත් කළ අතර ව්යාපෘතිය නතර කරන ලෙස එක්සත් ජනපද රජයෙන් ඉල්ලා සිටියේය.
