අධිකරණ අමාත්ය අලි සබ්රි මහතාට එම අමාත්ය ධුරයෙන් ඉල්ලා අස්වන ලෙසට තවදුරටත් මුස්ලිම් සංවිධාන සහ මුස්ලිම් සිවිල් ක්රියාකාරිකයින් ගෙන් දැඩි සේ බලපෑම් එල්ල වන බව දේශපාලන ආරංචි මාර්ග සඳහන් කරයි.
සමස්ථ ලංකා ජමියතුල් උලමා සංවිධානය ඇතුළු මුස්ලිම් සංවිධාන ගණනාවක් විසින් අමාත්යවරයාට මෙලෙස බලපෑම් කරමින් සිටින බව සඳහන් වේ.
අධිකරණ අමාත්යවරයාගෙන් විමසීමකින් තොරව ජනාධිපතිවරයා විසින් එක රටක් එක නීතියක් ජනාධිපති කාර්ය සාධක බලකායක් පත්කිරීම මෙලෙස බලපෑම් කිරීමට හේතු වී තිබේ.
මෙම බලපෑම් හේතුවෙන් අධිකරණ අමාත්යවරයා මේ වන විට ජාත්යන්තර සමුළුවකට සහභාගිවීම සඳහා ස්කොට්ලන්තයට ගොස් දිවයිනට පැමිණ සිටින ජනාධිපතිවරයා හමුවීමට උත්සහ ගන්නා බව දේශපාලන ආරංචිමාර්ග සඳහන් කරයි.
එක රටක් එක නීතියක් සඳහා වූ අදාළ පනත් කෙටුම්පත් සකස් කරමින් සිටින අතරතුර මෙම කාර්ය සාධක බලකාය පත් කිරීමට ජනාධිපතිවරයා පියවර ගෙන තිබුණි.
මෙම පියවරක් සමග අධිකරණ අමාත්යවරයාට මෙලෙස බලපෑම් කිරීමට අදාළ සංවිධාන පෙළඹී ඇත.
එක රටක් එක නීතියක් සඳහා වූ ජනාධිපති කාර්ය සාධක බලකාය පූජ්ය ගලගොඩඅත්තේ ඥාණසාර හිමියන්ගේ සභාපතිත්වයෙන් යුතුව පත් කරන ලදී.
එහෙත් එම සභාපති තනතුරට ඥානසාර හිමියන් පත් කිරීම පිළිබඳව බොහෝ පාර්ශ්වවලින් විරෝධය එල්ල වෙමින් තිබේ.
එමෙන්ම මෙම බලකායට තම නියෝජනයක් නොමැතිවීම පිළිබඳව දෙමළ ජනතාවගේ පාර්ශ්වයෙන් මෙන්ම රදගුරු සම්මේලනය අප්රසාදය පළකර තිබිණි.
