විදේශ ගමන් තහනමක් පනවා පසුගියදා ඇප මත නිදහස් කෙරුණු, මහා පරිමාණ අපරාධකරුවෙක් මෙන්ම මත්ද්රව්ය ජාවාරම්කරුවෙක් වූ ජනිත් මධුශංක හෙවත් පොඩි ලැසී ඉන්දියාවේ මුම්බායිහි දී අත්අඩංගුවට ගෙන තිබේ.
වසර ගණනක් ඇප කොන්දේසි සපුරන්නේ නැතිව බන්ධනාගාරගතව සිටි මෙම අපරාධකරු එක්වරම පසුගිය දෙසැම්බර් 09 වැනිදා ඇප කොන්දේසි සපුරා බන්ධනාගාරයෙන් පිටව ගියේය. ඔහු සම්බන්ධව නිරීක්ෂණ කටයුතු බුද්ධි අංශ විසින් සිදුකර නොතිබුණ අතර කංජිපානි ඉම්රාන් කළාක් මෙන් මෙම අපරාධකරු ද ඇප ලබාගෙන නීති විරෝධී ආකාරයෙන් දිවයිනෙන් පිටවී ඉන්දියාවට පළා ගොස් තිබිණි.
එම පලා යෑම තහවුරු කරගත් පසු වැඩ බලන පොලිස්පතිවරයා ඉන්දිය බලධාරීන් සමග සාකච්ඡා කිරීමෙන් සහ තොරතුරු හුවමාරු කරගැනීමෙන් අනතුරුව මුම්බායිහි දී ඔහු ඉන්දීය පොලිසිය විසින් අත් අඩංගුවට ගන්නා බව ලංකාවට දැනුම් දී ඇතැයි පොලිස් මාධ්ය ප්රකාශකවරයා පවසයි. ඒ අනුව ඉදිරියේ දී පොඩි ලැසී ශ්රී ලංකාවට ගෙන්වා අධිකරණයට පමුණුවා ඉදිරි නෛතික කටයුතු සිදුකිරීමට නියමිතව ඇතැයි පොලිසිය පවසයි.
පසුව අදාළ ඇප කොන්දේසි උල්ලංගණය කරමින් සැකකරු නීතිවිරෝධී අයුරින් රටින් පැන ගොස් තිබූ අතර පොලීසිය කළ සොයාබැලීම්වලදී අනාවරණය වී තිබුණේ පොඩි ලැසී ඉන්දියාවේ රැඳීසිටින බවය. පහත දැක්වෙන්නේ ඒ සම්බන්ධව පොලිසිය කියන කතාවය.
ඒ සමගම පසුගිය දෙසැම්බර් 20 වැනිදා ඇප ලබාගත්, මැඩගස්කරයේ සිට ලංකාවට රැගෙන ආ කුප්රකට අපාරධකරුවෙක් මෙන්ම පොලිසිය සමග සමීප සම්බන්ධතා ගොඩ නගාගනිමින් ස්වකීය මත්ද්රව්ය ජාවාරම් කළ අපරාධකරුවෙක් වූ පානදුරේ කුඩු සළිඳු ගැන ද ඇප ලබා ගත් දා සිට කිසිදු තොරතුරක් නැත.
විශේෂත්වය වන්නේ ඩුබායි සිට ලංකාවට ගෙන්වූ කුප්රකට පාතාල අපරාධකාර කංජිපානි ඉම්රාන් ඇප ලබාගත්තේ දෙසැම්බර් 20 දිනයකය. කංජිපානි පසුදාම රටින් පැන්නේය. ඒ 2022 වර්ෂයේ ය. ඊට හරියටම වර්ෂ 2කට පසු 2024 දෙසැම්බර් 20 දා කුඩු සළිඳු ඇප ලබා ගත්තේය. ඔහු ගැන ඇප ලබා ගත් දින සිට ඔහු ගැන කිසිම ආරංචියක් නැත. ඔහුත් මේ වනවිට විදේශගත වී ඇතැයි වාර්තා වේ.
එකම දේ යළි යළිත් සිදුවීමත් මහා පරිමාණ අපරාධකරුවන් සම්බන්ධව පොලිසිය මෙන්ම බුද්ධි අංශයද මන්ද බුද්ධික සේ හැසිරීමත් සම්බන්ධව රටේ විශාල ප්රශ්නාර්ථයක් ඉතිරි වී ඇත.
