ලලිත් චාමින්ද –
වැඩිහිටි දිමනාව ලබන එක් ප්රතිලාභියකුගෙන් මාසිකව රුපියල් 100ක මුදලක් අයකරගෙන පිහිටුවනු ලැබු වැඩිහිටි සමාජ ආරක්ෂණ අරමුදලින් සියයට 91.6ක් එනම් රුපියල් මිලියන 3546.9ක මුදලක් වැය කොට ඇත්තේ වැඩිහිටියන්ගේ සුභසාධන කටයුතු සදහා නොව ආයෝජන සදහා බැව් ජාතික විගණන කාර්යාලය මගින් නිකුත්කොට ඇති නවතම විගණන වාර්තාවක සඳහන් වේ.
මෙම වැඩිහිටි අරමුදල පිහිටුවා 2023 වර්ෂයට වනවිට වසර හතක් ගතවි ඇති අතර එම කාලය තුළ වැඩිහිටියන්ගේ සුභසාධන වියදම් සඳහා වැයකොට ඇත්තේ රුපියල් මිලියන 1468.6ක් මුදලක් බවද විගණන මගින් අනාවරණය කොට ඇත.
මෙම අරමුදල මගින් වැඩිහිටියන්ගේ සුභසාධනය වෙනුවෙන් අරමුදල් යොදා ගැනිම ප්රමාණවත් නොවන බව විගණන වාර්තාවේ සදහන් වේ.
අඩුආදායම්ලාභි වැඩිහිටි ප්රජාවගේ විශේෂ හා හදසි අවස්ථාවලදි සෞඛ්ය පෝෂණය හා ආරක්ෂණ වැය දැරීම, සහ වැඩිහිටියන්ගේ සුභසාධනය අරමුණුකරගනිමින් මෙම අරමුදල අමාත්ය මණ්ඩල අනුමැතිය යටතේ 2016 වර්ෂයේ දි පිහිටුවා තිබුණි.
මෙම අරමුදල වැඩිහිටියන් වෙනුවෙන් කාර්යයන් 10ක් මුල්කරගෙන පිහිටුවා තිබුවද 2016 වර්ෂයේ සිට 2018 දක්වා කාලය තුළ කිසිදු වැඩසටහනක් ක්රියාත්මක කර නොතිබුණි.
අරමුදල ස්ථාපිත කිරිමේ අරමුණු ඉටුකරගැනිම සඳහා කඩිනමින් කටයුතු කළයුතු බැව් විගණනය මගින් නිර්දේශකොට ඇත.
මේ පිළිබද වැඩිහිටි සමාජ ආරක්ෂණ අරමුදලේ කළමණාකාරිත්වය විසින් විගණනයට සඳහන් කොට ඇත්තේ රට තුළ පැවති සමාජ, ආර්ථික, දේශපාලනික, කාරණා හේතුවෙන් අපේක්ෂිත ප්රථිපල ළඟාකරගැනිමට නොහැකිවු බවය.
වැඩිහිටි සමාජ ආරක්ෂණ අරමුදල සම්බන්දයෙන් 2023 වර්ෂයට අදාලව මෙම විගණන වාර්තාව නිකුත්කොට තිබුණි.
