අලි ඇතුන් ඇතුළු වන සතුනට මිනිස් වාස භූමි කරා පැමිණීමට සිදුවන්නේ මිනිස්සු වනාන්තරය ආක්රමණය කරමින් ඉදිකිරීමේ සිදුකරන විට බවත්, දැන් දකින්ට ලැබෙන්නේ අලි මිනිස් ගැටුමක් නොව මිනිස් අලි ගැටුමක් බවත් වැදිනායක ඌරුවරිගේ වන්නියලෑ ඇත්තෝ පවසති.
ඔහු පවසන්නේ ගම් වදින වන අලි වෙඩි තබා, විදුලි සැර වද්දවා හා හක්කපටස් කෑමට දී ඝාතනය කිරීම මහා අපරාධයක් බවය.
මහනුවර ඇසළ පෙරහරේ පළමු රන්දෝලි පෙරහර දින වැදි ජනතාව විසින් සම්ප්රදායිකව දළදා වහන්සේ උදෙසා සිදු කරන මී පැණි පූජාව සඳහා අද (04) මහනුවරට පැමිණි අවස්ථාවේ වන්නියලෑ ඇත්තෝ මේ බව කීහ.
වන අලි කියන්නේ මෙරටට ආදායම් උපද්දවා දෙන සත්ත්ව කොට්ඨාසයක් බවත් මෙම සතුන් ආරක්ෂා කර ගැනීම සඳහා රජය විධිමත් වැඩපිළිවෙළක් සකස් කර ක්රියාත්මක කළ යුතුව තිබෙන බවත් හෙතෙම පැවසුවේය.
දළදා වහන්සේ ලක්දිවට වැඩම කළ අවස්ථාවේ තනිතිරිමලේ දී පළමු මී පැණි පූජාව පවත්වා හේමමාලා කුමරියට හා දන්ත කුමරුට කිත්සිරි මෙවන් රජුගේ මාලිගය දක්වා ගමන් ගැනීමට මග පෙන්වූයේ තම රැහේ මුතුන් මිත්තන් බවත් එතැන් පටන් පැවත ආ මී පැණි පූජාව කාලයක් නතරව තිබී තම පියා වන තිසාහාමි විසින් යළි ආරම්භ කළ බවත් කී වන්නියලෑ ඇත්තෝ මෙවර තමන් මී පැණි පූජාව සිදුකළේ 27 වැනි වරට යැයිද ප්රකාශ කළේය.
මී පැණි පූජා කරන අවස්ථාවට ආදිවාසී නායක තුමා ඇතුළු 75 දෙනෙක් එක් වී සිටියහ. එම පිරිස පිලිගනු ලැබුවේ දියවඩන නිළමේ ප්රදීප් නිලංග දෑල විසිනි. අනතුරුව දළදා තේවාව භාර තිබ්බටුවාවේ මේධංකාර නාහිමියෝ මී පැණි පූජාව සඳහා වැදිනායකයාට පහසුකම් සලසා දුන්හ.
