අ.පො.ස. සාමාන්ය පෙළ විභාගය ඉහළින් සමත්වූ මහනුවර අම්පිටියේ සිසුවෙකුට පෙට්රල් වත්කර ගිනි තැබූ පැතුම් නැමැති අපරාධකරු කළ ඇතැම් අපරාධ යට ගැසීමට මහනුවර පොලීසියේ අපරාධ අංශයේ හිටපු පොලිස් නිලධාරියෙක් ක්රියාකාර ඇති බවට තොරතුරු රැසක් මධ්යම පළාත්භාර ජ්යෙෂ්ඨ නියෝජ්ය පොලිස්පති සංජීව ධර්මරත්න මහතාට වාර්තා වී තිබේ.
මහනුවර පොලීසියේ අපරාධ අංශයෙන් මේ වන විට එම නිලධාරීයා ඉවත් කර ඇතත් පොලිස් ස්ථානාධිපති ධූරයක් ලබා ගැනීමට සඳහා මේ දිනවල දේශපාලන වන්දනාවේ යමින් සිටින බව මහනුවර පොලිස් තොරතුරු අනාවරණය කළේය.
කප්පම් නොගෙවීමක් නිසා පසුගිය නොවැම්බර් 07 වෙනිදා අම්පිටිය මී කණුව හංදියේදී සුරාජ් මධුෂංක නැමැති ත්රීරෝද රථ රියදුරෙකුව පැතුම් නැමැති අපරාධකරු සහ ඔහුගේ ගෝලබාලයින් කිහිප දෙනෙකු එක්ව විදුලි කණුවක ගැටගසා කඩුවකින් පහරදී තුවාලකර තිබුණි. එම පුද්ගලයාට පහරදීම සම්බන්ධයෙන් පැතුම් නැමැති අපරාධකරුට කිසිදු චෝදනාවක් එල්ල නොකර මෙම අපරාධකරු සමඟ එකට මත්කුඩු භාවිතා කරන වෙනත් පස් දෙනෙකු පොලීසියට ගෙන්වාගෙන ඔවුන්ට එම ප්රහාරය සම්බන්ධයෙන් චෝදනා එල්ල කර පැයක් තුළ අධිකරණයටද ඉදිරිපත්කර ඇප ලබාදීමට අවශ්ය පරිදි කටයුතු කර ඇති බවට තොරතුරුද මේ වන විට හෙළිවී ඇත.
පැතුම් නැමැති අපරාධකරුට එරෙහිව පොලීසියට පැමිණිලි කිරීමට පවා අම්පිටියේ ජනතාව මැලිකමක් දක්වා ඇත්තේ මෙම නිලධාරියාගේ මෙම ක්රියාකලාපය බව පෙනී ගොස් ඇත. පැතුම්ට එරෙහිව පැමිණිලි කිරීමට පැමිණෙන පුද්ගලයින්ව පැමිණීල්ල ලියා ගැනීමට පෙර රස්තියාදුකර පැමිණිල්ල නොලියන තැනට පත්කරන අවස්ථාද පසුගිය කාලයේ මහනුවර පොලීසිය තුළ සිදුවී ඇති බවට තොරතුරුද මේ වන විට හෙළිවෙමින් පවතින් බවත් ඒ සම්බන්ධයෙන් විමර්ශනයක් ආරම්භ කිරීමට පියවර ගන්නා බවත් උසස් පොලිස් නිලධාරියෙකුගෙන් කළ විමසුමකදී ඔහු සඳහන් කළේය.
