දිනසේන රතුගමගේ –
වියදම් අධික නිසා රජයේ අමාත්යවරුන්ට හා මන්ත්රීවරුන්ට ලබා දෙන පහසුකම් කපා හරිනු ලැබූවත් ඉලංකෙයි තමිල් අරුසු කච්චි පක්ෂයේ හිටපු පාර්ලිමේන්තු මන්ත්රීවරයෙකු වන එම්.ඒ.සුමන්තිරන්ට ආරක්ෂක නිලධාරීන් දෙදෙනෙකු ලබා දීම පිළිබදව උතුරේ දෙමළ දේශපාලන පක්ෂ වල විමතිය පල වී තිබේ.
හිටපු මන්ත්රී සුමන්තිරන් වෙත ලබා දී ඇති ආරක්ෂක නිලධාරීන් දෙදෙනා පොලිස් නිලධාරීන් දෙදෙනෙකුවන අතර ඔවුන් දෙදෙනාගේ ප්රධාන රාජකාරිය වී ඇත්තේ හිටපු මන්ත්රීවරයා ගමන් කරන වාහනයේ දොර ඇරීම හා වැසීම පමණක් බවද සෙසු දෙමළ දේශපලන පක්ෂ නියෝජිතයෝ ප්රකාශ කොට සිටිති.
හිටපු මන්ත්රීවරයා පසුගිය දින දෙකක කලය තුළ යාපනයේ බොහෝ ස්ථාන වල සිය වාහනයෙන් ගමන් කොට ඇති අතර ඔහුට සපයා ඇති ආරක්ෂක නිලධාරීන් දෙදෙන ඒ සෑම අවස්ථාවකදීම ඔහු සමග ගමන් කොට තිබේ.
සුමන්තිරන් හිටපු මන්ත්රීවරයා පසුගිය මහ මැතිවරණයට යාපනයෙන් තරග කරණ ලද නමුත් ඔහු ඉන් පරාජයට පත් වීම නිසා ඔහුට මේ වන විට ඉලංකෙයි තමිල් අරුසු කච්චි පක්ෂයේ මාධ්ය ප්රකාශක තනතුර පමණක් හිමිව තිබේ.
තත්ත්වය එසේ තිබියදී රජයෙන් ඔහුට ආරක්ෂක නිලධාරීන් දෙදෙනෙකු සපයා ඇත්තේ කවර පදනමකින්ද යන්න යාපනයේ සෙසු දෙමළ දේශපාලන පක්ෂ නියෝජිතයෝ හා ස්වේච්ඡා සංවිධාන නියෝජිතයෝ ප්රශ්න කොට සිටිති.
හිටපු මන්ත්රීවරයාට ලබා දී ඇති ආරක්ෂක නිලධාරීන් දෙදෙනා ළඟ පෙනෙන්නට කිසිදු ගිනි අවියක් නොමැති බව යාපනයේ වැසියෝ ප්රකාශ කරන අතර බොහෝ විට එම නිලධාරීන් දෙදෙනා ළඟ සඟවා ගත් පිස්තෝල වැනි ගිනි අවි තිබිය හැකි බවද ප්රකාශ කොට සිටියි.
