ශ්රියානි විජේසිංහ –
ඉදිරි පාදයට වෙඩි තබා දැඩි ලෙස තුවාල සිදුකිරීම හේතුවෙන් බරපතල පීඩාවකට පත්ව කණ්ඩලම වැව අසල රැඳී ඉන්නා “කණ්ඩලමේ හැඩකාරයා” නමින් හඳුන්වන වනඅලියාට අවශ්ය විශේෂඥ ප්රතිකාර සඳහා තමන් සූදානම් නමුත් මේ වනතුරුත් ඒ පිළිබඳව ලිඛිත ඉල්ලීමක් තමන්ගෙන් කර නැතැයි පේරාදෙණිය විශ්ව විද්යාලයේ පශුවෛද්ය අංශයේ මහාචාර්ය අශෝක දංගල්ල පවසා සිටියේය.
වනජීවීසංරක්ෂණ දෙපාර්තමේන්තුවෙන් එම ලිඛිත ඉල්ලීම කර අවශ්ය මූල්ය ප්රතිපාදනයන් ලබා දීමට කටයුතු කළහොත් මොන තරම් කාර්ය බහුල වෘත්තීය ජීවිතයක් ගත කළ ද කණ්ඩලමේ හැඩකාරයාට ප්රතිකාර කිරිමට තමන් සූදානම් බවද මහාචාර්යවරයා ලංකාසර කළ විමසීමකදී අවධාරණය කළේය.
වන අලියාගේ තත්ත්වය යහපත් නොවන බවත්, වනජීවී බලධාරීන් අදාල බර තබා සත්ත්වයාට ප්රතිකාර නොකරන බවත් ප්රදේශවාසීන් විසින් දිගින් දිගටම චෝදනා කරන තත්ත්වයක් තුළ එම සත්ත්වයාට අවශ්ය ප්රතිකාර උපක්රමශීලීව සිදුකරන බව වන ජීවී දෙපාර්තමේන්තුව පැත්තෙන් කියැවේ.
කෙසේ වෙතත් මහාචාර්යවරයා පවසන්නේ සාමාන්යයෙන් තමාට මෙවැනි අවස්ථාවන් දැනුම් දෙන්නේ අවසාන මොහොතේදී බවත් ඒ වන විට සතාගේ ජිවිතය බේරාගැනිමට දැඩි අසීරු බවත්ය.
කණ්ඩලමේ හස්ථියා මාස ගණනක සිට අසීමිත පීඩාවට පත් වී හිඳී. ඒ සතා වැවේ දියමත වැතිරෙමින් යළි නැගී සිටිමින් කල් ගත කරන අතර වනයේ සැරිසරා ආහාර ගැනීමට නොහැකි තත්ත්වයක පසුවේ. හස්ථියාට අවශ්ය තන්තු සහිත ආහාර හෙයින් වෙනත් ආහාර ලබා නොදෙන්නයි ගිරිතලේ පශු වෛද්ය සමීර කළිඟුආරච්චි ප්රකාශ කළත් උන් තැනින් එපිටට යා ගත නොහැකි හස්ථියා අසලට මිනිස්සු ආහාර ගෙනත් දමා තිබේ.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
පරිසර අමාත්යවරයා මෙන්ම නියෝජ්ය අමාත්යවරයාද මෙම වනඅලියාගේ සුවදුක් විමසීමට පසුගිය දා පැමිණි බව වාර්තා විය. ප්රදේශවාසීන් පවසන්නේ මේ ආකාරයෙන් දුක් විඳ අලියා මිය ගිය පසු යළිත් ඒ ඇමතිවරුන් නිසැකවම මේ ස්ථානයට පැමිණීමට නියමිත බවය.
