පළාත් පාලන ආයතන ඡන්ද විමසීමේ තැපැල් ඡන්ද විමසීමට අදාළ ඡන්ද පත්රිකා අද හෝ හෙට දිනය තුළ ලැබුණහොත් දැනට සැලසුම් කර ඇති පරිදි මෙම මස 22,23 සහ 24 යන දිනවල තැපැල් ඡන්දය පැවැත්විය හැකි බව මැතිවරණ කොමිෂන් සභාව පවසයි.
යම් හෙයකින් මෙම දින දෙක ඇතුළත ඡන්ද පත්රිකා නොලැබුනහොත් තැපැල් ඡන්දය පැවැත්වෙන දිනය සම්බන්ධයෙන් එළඹෙන සඳුදා දිනයේදී තීරණයක් ගන්නා බවද ඔවුන් සඳහන් කළේය.
මෙතෙක් දවසක් තැපැල් ඡන්ද පත්රිකා මුද්රණය සඳහා මූල්ය ප්රශ්නයක් ගැන කතා කළ රජයේ මුද්රණාලයාධිපතිනිය ඊයේ සහ පෙරේදා තවත් ගැටලුවක් මතු කරමින් ප්රමාණවත් පොලිස් ආක්ෂාවක් නොලැබිම නිසා ඡන්ද පත්රිකා මුද්රණ කටයුතු අඩාල වී ඇතැයි කීවාය.
ආරක්ෂිතව මුද්රණ කටයුතු කිරීම සඳහා පොලිස් නිලධාරීන් 65ක් අවශය නමුත් එම නිලධාරීන් නොලැබුණ නිසා මුද්රණාලයේ ආරක්ෂක අංශ යොදවා මුද්රණ කටයුතු කිරීමට කටයුතු කළත් සේවකයින් ඊට එකඟ නොවන බවත් කීවාය.
මැතිවරණ කොමිසම සහ තමන් බස්නාහිර නියෝජ්ය පොලිස්පතිවරයා අමතා අස්ථා දෙකක දී ආරක්ෂාව ඉල්ලූ නමුත් පොලිස් ආරක්ෂාව සැපයුවේ නැති බව ද ඇය කීවාය.
මේ අතර රජයේ මුද්රණාල සේවක සංගමයේ ලේකම් අසංග සඳරුවන් මාධ්යයට පැවසුවේ මේ ප්රමාද කිරීම තේරුමක් නැති අතාර්කික එකක් බවත් රජයේ මුද්රණාලයාධිපතිනිය යම් බලපෑමකට ලක් වී සිටින බව නිරීක්ෂණය වන බවත්ය.
ඔහු කිවේ දැනටමත් දිස්ත්රික්ක දහයක තැපැල් ඡන්ද පත්රිකා මුද්රණය කර ඇති බවත් රජයේ මුද්රණාලයේ ධාරිතාව අනුව පත්රිකා මුළු ප්රමාණය වූ ලක්ෂ 06 වුව ද එක් දිනයක මුද්රණ කටයුත්තක් බවය.
