කීර්ති ප්රනාන්දු –
බදාදා සවස සිස්ටයින් දේවස්ථානයේ චිමිනියෙන් කළු දුමාරයක් නැගුනේය. ඉන් සංඥා වූයේ පාප්වරයෙක් තෝරා ගැනීම සඳහා කාදිනල්වරුන් විසින් පවත්වන ලද පළමු වටයේ ඡන්ද විමසීමේදී ඡන්දය ප්රකාශ කරන කාදිනල්වරුන්ගෙන් තුනෙන් දෙකක බහුතරයකින් නව පාප්වරයෙකු තෝරා පත් කර ගැනීමට නොහැකිවීම ය.
පූජනීය කිරිගරුඬ ශාලා සහ කාර්දිනල්වරුන්ගේ ගෞරවනීය ඒකරාශී වීමේ පසුබිමෙහි දෝංකාර දෙන ලතින් ගායනා දිනයකින් පසු අද (08) දක්වා ඡන්ද දිනය ඉදරියට පැමිණියේය. දැනට කිව හැක්කේ ඊළඟ පාප් වහන්සේ නිසැකවම මේ කාදිනල්වරුන් අතර සිටින බව පමණය.
මේ වනවිට සියලු දෙනාම හබෙමස් පාපම් – “අපට පාප්වරයෙක් සිටී” – සංඥා කරමින් සිස්ටයින් දේවස්ථානයේ චිමිනියෙන් සුදු දුම එන තෙක් බලා සිටිති. කතෝලික පල්ලියේ ඉහළම තලයේ බෙදීමක් ඇති වටපිටාවක ඊළඟ පාප්වරයා කවුරුන්ද යන්න කිසිවෙක් නොදනිති.
ඊයේ සමුළුව ආරම්භ වී පැය තුනකට වැඩි කාලයක් ගත වූ පසු කළු දුම දිස් විය. දේවස්ථානයෙන් පිටත රැස්ව සිටි පිරිසක් ඝෝෂා කළහ. නව පාප්වරයෙකු නොමැති බව පැහැදිලි වූ විට පිරිස විසිරී යන්නට පටන් ගත්තේය.
මීට පෙර කිසිදා කාදිනල් සමුළුවක හඬක් නොතිබූ රටවලින් දුසිම් දෙකකට ආසන්න සංඛ්යාවක් ඇතුළුව වයස අවුරුදු 80 ට අඩු කාදිනල්වරු ඡන්ද සඳහා සුදුසුකම් ලබා සිටිති. නව පාප්වරයෙකු තෝරා ගන්නා තෙක් ආහාර සහ විවේකය සඳහා පමණක් කාදිනල්වරුන්ට ඔවුන්ගේ නේවාසිකාගාරයට යා හැකිය. ඔවුන් මුලුමනින්ම සිය මුඛ්ය පරමාර්ථයවන පාප්වරයෙක් තෝරා ගැනීම සඳහා පමණක්ම යොමු වී සිටිති.
ලෞකික බලපෑමෙන් මේ අවස්ථාව අපවිත්ර වීම වැලැක්වීමටත්, වෛරස් ලෙස පැතිරෙන සමාජ මාධ්ය පලකිරීම වැලැක්වීමටත් ගෞරවනීය කාදිනල්වරුන්ගෙන් ඔවුන්ගේ ජංගම දුරකථන රැගෙන නොයන ලෙස ඉල්ලා තිබේ. කෙසේ වෙතත් යම් කාදිනල්වරයෙක් අසනීපව සිටී නම් ඔහුගේ කාමරයේ සිට සිය ඡන්දය ප්රකාශ කිරීමේ අයිතිය ලබා ගත හැකිය.
ඡන්දය පැවැත්වෙන ආකාරය
බ්රහස්පතින්දා සිට, සෑම පූර්ණ දින සැසියකදීම ඡන්ද හතරක් පවත්වනු ලැබේ. මින් පෙර පිළිවෙලින් ඡන්ද පහකින් සහ හතරකින් පසු ෆ්රැන්සිස් සහ XVI වන බෙනඩික්ට් පාප්වරු තේරී පත් වූහ. එම රටාව නැවත අනුගමනය කළහොත්, අද දිනය තුළ පාප් තුමා තේරී පත්වනු ඇත.
තේරීම තුන්වන දිනට කම්පන සහගත ලෙස දිගු වුවහොත් එය ඉතිහාස වනු ඇත. අවසන් වරට පාප්වරයෙක් තෝරා ගැනීමේ සම්මේලනයක් දින පහක් දක්වා දිගු වූයේ සියවසකට වඩා වැඩි කාලයකට පෙරය. එනම් 1922 දී ය.
ෆ්රැන්සිස් පාප් තුමාගේ මරණයෙන් පසු, කාදිනල්වරු පල්ලියේ අනාගතය සඳහා පරස්පර දර්ශන ඉදිරිපත් කර තිබුණහ. මේ පැවැත්වෙන්නේ පාප්වරයෙක් තෝරා ගැනීම සඳහා ඉතිහාසයේ පැවැත්වෙන විශාලතම සමුළුවය. ඒ සඳහා කාදිනල්වරු 133 ක් සිටිති. බොහෝ කාදිනල්වරුන් ඔවුන්ගේ සම වයසේ මිතුරන්ට අලුත් සහ නුහුරු නුපුරුදු අයය.
“නව පාප් වහන්සේ දින තුනකින් [හෝ] හතරකින් පැමිණෙනු ඇතැයි අපි බලාපොරොත්තු වෙමු,” කාදිනල් සමුළුවේ ප්රධානී කාදිනල් ලුවී රෆායෙල් සාකෝ මෙම සතියේ මාධ්යවේදීන්ට පැවසීය.
