කීර්ති ප්රනාන්දු –
-
මෙම සහල් තොගය ලෝක ආහාර වැඩසටහන යටතේ නොමිලයේ රටට ලැබී ගබඩාවල කල් ඉකුත් වෙන්න හැරිය සහල් තොගයක්!
අඩු ආදායම්ලාභී පවුල්වලට බෙදා දීමේ අරමුණින් කල් ඉකුත්ව තිබූ සහල් තොගයක් නැවත පිරිසිදු කර ඇසුරුම් කිරීම සඳහා සකස් කරමින් තිබියදී අත්අඩංගුවට ගත් බව පාරිභෝගික සේවා අධිකාරිය පවසයි .
විශේෂත්වය වන්නේ ගබඩාවල කල් ඉක්තු වූ මෙම සහල් තොගය ලෝක ආහාර වැඩසටහන යටතේ එක්සත් ජනපද නියෝජිත ආයතනය මගින් ආධාර පදනම මත නොමිලයේ ලංකාවට ප්රදානය කරන ලද සහල් තොගයක් වීමය.
මෙසේ අත්අඩංගුවට ගෙන ඇති කුණු සහල් ප්රමාණය කිලෝ ග්රෑම් 172000කට අධික බවත් ඒවා ලොරි රථ අටක් මගින් කොළඹ සිට කහට ගස් දිගිලිය කිරිඉබන්වැව ප්රදේශයේ සහල් මෝලක් වෙත රැගෙන ගොස් ඒ තුළ නැවත සකසමින් තිබූ බවද පාරිභෝගික සේවා අධිකාරිය කියා සිටි .
මෙම සහල් තොගය පසුගිය මස 30 වැනිදායින් කල් ඉකුත්වන බවට එම ඇසුරුම් වල සඳහන්ව ඇතැයි පවසන එම අධිකාරියේ උසස් නිලධාරියෙකු පැවසුවේ එම සහල් නැවත පිරිසිදු කර ඉදිරියට දින 30 ක් සඳහා වලංගු වන ලෙස කල් ඉකුත් වීමේ දිනය අලුත් කර තිබූ බවය. .
දැනට සිදු කරන ලද විමර්ශනවලට අනුව රජය මගින් අඩු ආදායම්ලාභී පවුල් සඳහා සහල් ලබාදීමේ වැඩපිළිවෙළේ දෙවන අදියර සඳහා එම සහල් සකස් කර ඇති බවට අනාවරණය වූ බවද වැටලීම සිදුකළ පාරිභෝගික සේවා අධිකාරියේ අනුරාධපුර ඒකකයේ උසස් නිලධාරියකු ලංකාසරට පැවසීය .
සහල් ප්රවාහනය කළ ලොරි රථ 8 සමග කල් ඉකුත් වූ සහල් තොගය මුද්රා තබා ඇති බවත් මෝල් හිමිකරු ද අත්අඩංගුවට ගත් බව පවසන පාරිභෝගික සේවා අධිකාරිය සැකකරුවන් අද අධිකරණය වෙත ඉදිරිපත් කිරීමට නියමිත බවත් පාරිභෝගික සේවා අධිකාරිය පවසයි.
