සූරියවැව නුවන් ජයසේකර –
අම්බලන්තොට, මාමඩල ප්රදේශයේදී ඊයේ (මැයි 11) රාත්රියේ අතිශය කෲර සහ බීහිසුණු මනුෂ්ය ඝාතනයක් සිදුවූයේය. රාත්රී 8:30 ට පමණ නිවසකට කඩා වැදුණු තිදෙනෙකුගෙන් යුත් සන්නද්ධ කණ්ඩායමක් විසින් පුද්ගලයෙකුට වෙඩි තබා, පසුව තියුණු ආයුධවලින් කපා කොටා ඝාතනය කර ඔහුගේ හිස ශරීරයෙන් වෙන් කර රැගෙන ගොස් තිබුණේය.
සැකකරුවන් කඳින් වෙන් කරගත් හිස මාමඩල හන්දිය අසල පිහිටි රත්නාවලී දේවියගේ ප්රතිමාව අසලට රැගෙන විත් එම ප්රතිමා මත තබා ගොස් තිබිණි.
මෙම ප්රහාරය වැළැක්වීමට උත්සාහ කිරීමේදී මියගිය පුද්ගලයාගේ බිරිඳගේ පියා වන කරුණාචාරි නිමල් යන අයද බරපතළ තුවාල ලැබුවේය. ඔහු මේ වන විට හම්බන්තොට දිස්ත්රික් මහ රෝහලේ දැඩි සත්කාර ඒකකයේ ප්රතිකාර ලබමින් සිටින්නේය.
සිද්ධිය වූ ආකාරය
මෙම අමානුෂික ඝාතනයට ලක්වූයේ අම්බලන්තොට, මාමඩල, අංක 396 ලිපිනයේ පදිංචිව සිටි වීරසේකර ආරච්චිගේ ලක්මාල් සඳරුවන් නමැති 34 හැවිරිදි තිදරු පියෙකි. ඔහු ප්රදේශයේ ‘පොඩි ලක්මාල්’ යන අනවර්ථ නාමවලින් ද හඳුන්වනු ලබන්නේය. ත්රිත්ව ඝාතනයක් සම්බන්ධව සැක පිට අත් අඩංගුවට ගෙන බන්ධනාගාරගත කර සිටි පොඩි ලක්මාල් ඇප ලබා නිදහස්ව එන්නේ මාර්තු 31 දා ය.
ඊයේ රාත්රියේ සැකකාර ඝාතකයින් තිදෙනා පොඩි ලක්මාල් පදිංචිව සිටි නිවසට බලහත්කාරයෙන් කඩා වැදුනහ. පිස්තෝලයක් සහ තියුණු ආයුධ සන්නද්ධව පැමිණි සාඝතකයින් සහ නිවසේ සිටි පිරිස අතර දැඩි පොරබැදීමක් නිවස තුළ දී ඇති විය. පොඩි ලක්මාල්ට වෙඩි තිබූ සාහකසියයෝ පසුව කපා කොටා ඔහුව ඝාතනය කර ඔහුගේ හිස කඳින් වෙන් කර රැගෙන ගියහ. මාමඩල හන්දියේ රත්නාවලි පිළිරුව අතර තබා තිබුණේ එම හිසය.
ඝාතනයේ පසුබිම
පොලිසිය විශ්වාස කරන්නේ මෙම ඝාතනය මීට පෙර පොඩි ලක්මාල් ද චූදිතයෙක් වූ ත්රිපුද්ගල ඝාතනයට පළිගැනීමක් ලෙස සිදු කර ඇති බවය. එම ත්රිපුද්ගල ඝාතනය සිදුවන්නේ 2025 පෙබරවාරි මස 02 වැනිදා රාත්රී කාලයේදී අම්බලන්තොට පොලිස් වසමට අයත් මාමඩල, බටදිර ප්රදේශයේ අලේගොඩ පිහිටි නිවසක් තුළය. ඝාතනය වූයේ එකම ප්රදේශයක පදිංචිකරුවන්ය. පොලුවලින් පහර දී තියුණු ආයුධවලින් කපා කොටා මෙම තිදෙනා අමානුෂික ලෙස ඝාතනය කර තිබිණි.
මේ ගැටුමට හේතුව පාතාල ගැටුමක් හෝ පිටත ප්රදේශයකින් පැමිණ කළ සංවිධානාත්මක අපරාධයක් නොවේ. ප්රදේශයම නීති විරෝධී කසිප්පු පෙරන කණ්ඩායම් දෙකක් අතර වූ කසිප්පු ආරවුලකි. මෙම කණ්ඩායම් දෙක අතර දිගු කාලයක් තිස්සේ කෝන්තරයක් තිබිණි. ටිකෙන් ටික වැඩි වූ ආරවුල අවසානයේ දී දෙපාර්ශවයේ කසිප්පු ජාවාරම් ගැන දෙපැත්තම පොලිසියට ඔත්තු දීම දක්වා දුර දි ගියේය.
මේ අතර එක් කණ්ඩායමක් තම කසිප්පු බෝතලයක මිල අනෙක් කණ්ඩායමට වඩා තුනෙන් එකක මිලකට අඩු කළේය. මේ හේතුවෙන් අඩුවෙන් කසිප්පු විකිණූ පිරිසට ඉතා ඉහළ ආදායමක් ලැබුණු අතර අනෙක් කණ්ඩායමේ ව්යාපාරය බිඳ වැටෙන්නට වූයේය.
පසුගිය වසරේ පෙබරවාරි 02 දා පිපිරී ගියේ ඒ වෛරී ගැටුමේ උච්ඡම අවස්ථාවකි. අලේගොඩ පිහිටි හෙට්ටි ආරච්චිගේ ප්රභාත් ඉන්දික (වයස 29)ක ගේ නිවසට එදා රාත්රියේ ඝාතකයින් 6ත් 08ත් අතර පිරිසක් තියුණු ආයුධ සහිතව සහිතව කඩා වැදුනහ. එහිදී දෙපාර්ශවය අතර උණුසුම් බහින්බස් වීමක් ඇති වූයේය. පසුව පැමිණි පිරිස නිවස හිමිකාර ප්රභාත් ඉන්දික ඇතුළු තිදෙනෙකුට පොලුවලින් පහර දි තියුණු ආයුධවලින් ම්ලේච්ඡ ලෙස කපා කොටා දැමූහ. එම ස්ථානයේදීම ප්රභාත් මියගිය අතර, අනෙක් දෙදෙනා අම්බලන්තොට රෝහලට ඇතුළත් කිරීමෙන් පසු තුවාලවල බරපතළකම හේතුවෙන් මිය ගියහ. රසික ප්රියදර්ශන හේවා කුමානායක (වයස 45), උදයංග මල්ලිකාරච්චි හෙවත් මාධව අසංක මල්ලිකාරච්චි හෙවත් ‘මෙන්ත පොඩි’ (වයස 34) සහ ප්රභාත් ඉන්දික එදින ප්රහාරයෙන් මිය ගියහ.
අම්බලන්තොට පොලිසිය සහ තංගල්ල අපරාධ විමර්ශන ඒකකය ඒකාබද්ධව ඉතා කඩිනමින් විමර්ශන මෙහෙයවූ අතර, සිද්ධියෙන් පැය 24ත් 48ත් අතර කාලය තුළ සැකකරුවන් 6ක් අත්අඩංගුවට ගැනීමට සමත් විය. අත්අඩංගුවට ගත් පිරිස අතර එකම පවුලේ සාමාජිකයන් සහ සමීපතම ඥාතීන් ද සිටි බව වාර්තා විය. සිද්ධිය හම්බන්තොට මහේස්ත්රාත් අධිකරණයට වාර්තා කිරීමෙන් පසු සැකකරුවන් රක්ෂිත බන්ධනාගාරගත කෙරිණි.
ඊයේ ඝාතනය සහ මේ ත්රිත්තව ඝාතනය අතර සම්බන්ධය
2026 මැයි 11 වන දින ඝාතනයට ලක් වූ වීරසේකර ආරච්චිගේ ලක්මාල් සඳරුවන්, මෙම 2025 ත්රිපුද්ගල ඝාතන නඩුවේ ප්රධාන සැකකරුවෙකු විය. අත්අඩංගුවට ගෙන රක්ෂිත බන්ධනාගාරගතව සිටි ඔහු 2026 මාර්තු මස 31 දා ඇප මත මුදා හැර තිබුණි
2026 මැයි මස ඔහු මෙලෙස හිස ගසා දමා ඝාතනය කිරීම, 2025 වසරේ සිදු වූ එම මරණ සඳහා අනෙක් පාර්ශවය විසින් සිදු කළ පළිගැනීමක් බව පොලිසිය සැක පහළ කර තිබේ. හේතුව මේ වනවිට වින්දිතයාගේ බිරිඳ විසින් ඝාතකයින් හඳුනාගෙන තිබීමය. මේ ඝාතකයින් පසුගිය වසරේ පෙබරවාරි 02 ඝාතනය වූ පුද්ගලයෙකුගේ සමීපතමයන්ය.
විමර්ශන සහ වත්මන් තත්ත්වය
සිද්ධිය සම්බන්ධයෙන් අම්බලන්තොට පොලිසිය වහාම පුළුල් විමර්ශන ආරම්භ කළේය. ඝාතනය සිදු වූ දින රාත්රියේම එක් සැකකරුවෙකු අත්අඩංගුවට ගැනීමට පොලිස් කණ්ඩායම් සමත් විය. පලා ගොස් සිටින අනෙක් සැකකරුවන් දෙදෙනා අත්අඩංගුවට ගැනීම සඳහා විශේෂ පොලිස් කණ්ඩායම් කිහිපයක් මෙහෙයුම් ක්රියාත්මක කර ඇත.
මේ වන විටත් අදාළ සැකකරුවන් සෙවීමේ කටයුතු සහ වැඩිදුර සාක්ෂි සටහන් කර ගැනීම අඛණ්ඩව සිදු කෙරෙන අතර, විමර්ශන ප්රගතිය හම්බන්තොට මහේස්ත්රාත් අධිකරණයට වාර්තා කර තිබේ.
