එෂාමා කාරියකරවන
ජ්යෙෂ්ඨ මනෝ උපදේශිකා –
සති තුනකට පෙර සිට උපදේශනයට පැමිණි ගැටවර වයසේ පිරිමි දරුවන් තිදෙනෙකුම ගංජා භාවිතයට යොමු වී සිටීම හද පාරවන තරම් විය.
ඔවුන්ගෙන් දෙදෙනෙකු , අද(29) පැවැත්වෙන අපොස සාමාන්ය පෙළ විභාගයට පෙනී සිටීමට නියමිතය.
ඔවුන් තිදෙනාම මා හට කියා සිටියේ ගංජා භාවිතයෙන් කිසිම නරකක් සිදු නොවන බවයි. එය ඖෂධයකි.
වෙන රටවල තහනමක් නොවූ දෙයකි. යනුවෙනුයි.
එහෙත් ඔවුන් තිදෙනාට
- – නිදිබර ගතිය
- – අමතක වීම
- – ආහාරයෙහි ප්රිය නැති බව
- – අවධානය යොමු කළ නොහැකි බව
- – නුරුස්සන බව
- – අපිළිවෙල
- – කම්මැලි බව
- – පාඩම් කිරීමට අපහසු බව
පැවතුනි.
මේ ලක්ෂණ ගංජා ගැනීමට පෙර නොතිබුණු අතර ඔවුහු හොඳින් ඉගෙනීමේ කටයුතු කළ දරුවෝ වූහ. එක් අයෙක් පිහිනුම් ශූරයෙක් විය.
උපදේශන සැසි දෙකකින් පසු තිදෙනාම එක්ව ගෙන සමූහ උපදේශනයකට යොමු කළෙමි.
ඖෂධ ප්රතිකාර සහ උපදේශන මගපෙන්වීම යටතේ විභාග අපේක්ෂකයන් දෙදෙනා විසින් විභාගය අවසන් වනතුරු මෙයින් වැළකී සිටීමට සහය ඉල්ලා සිටියේය. ඔවුන් ඉල්ලා සිටියේ ඔවුන්ව තනි නොකරන ලෙසයි.
ඔවුන්ගේ මව්වරු එම කාලය මුලුල්ලේ ඔවුන් සමග සිටීමට එකඟ වූහ . දරුවෝ ද මව්වරුන් එසේ සිටීම ගැන කැමති වූහ.
යන එන ගමන් බිමන් හිඳිනා තැන් සියල්ලම මව්වරු සමග යෑමට එකඟ වූහ. දරුවන්ගෙන් මා ඉල්ලා සිටියේ මේ කෙටි කාලයේ වටිනාකම තේරුම් ගෙන තමන්ටම අවංක වී හැකි තරම් අධ්යාපන කටයුතුවල නිරත වී හොඳින් විභාගයට මුහුණ දෙන ලෙසයි.
මව්පියන්ට මා දුන් අවවාදය නම් දරුවාට අනවශ්ය ලෙස අවවාද දීම, අතීත ක්රියා ඇදගෙන ආඩපාලි කීම, සැකයෙන් බැලීම නවතා, ආදරය පෙරදැරි කරගනිමින් ඔහු විශ්වාස කරන බව අඟවමින් ඉවසීමෙන් සිටින ලෙසයි.
හදිසියේ හෝ කිසියම් අන්දමකින් ඔවුන් නැවත ඒවා භාවිතා කරන්නට යෙදුනහොත් මා දැනුවත් කරන ලෙසයි. හොඳින් ආහාර පාන ලබාදී හොඳ නින්දක් ලබා ගන්නට ඉඩකඩ ලබා දෙන ලෙසයි.
දවස් ගෙවි ගොස් අවසානය. මේ දක්වා ඔවුන් හැකිතරම් උත්සහයෙන් අද පටන් ගන්නා විභාගයට මුහුන දෙන්නට වී ඇත.
ඔවුන් ඇතුළු දැයේ සියලු විභාග අපේක්ෂකයන්ට උසස් ප්රථිඵල ප්රාර්ථනය කරමි.
දෙයක් කියමි.
ඔබ ගංජා හෝ කුමන හෝ මත්ද්රව්යයක් භාවිතා කරන්නේ නම් මේ ඉල්ලීම ඔබගෙනි.
ඔබට එය අතහැරීමේ අදහසක් ඇත්නම් , එයට උපකාර විය හැකි ආයතන බොහෝ ඇත.
ඔබට එය අතහැරීමේ අදහසක් නැත්නම් එය කරගෙන යන්න.
එහෙත් කිසිදිනක ඔබේ මිතුරන්ට ඒවා ගැනීමට පෙළඹවීමෙන් වැළකී සිටිමින්, හොඳ මිතුරකු වන්න.
ඔබ නිසා මත්ද්රව්යවලට පෙළඹුනු දරුවන් සහ ඔවුන්ගේ මව්පියන් විඳින දුක් පීඩාවල වග උත්තරකරුවකු නොවන්න.
