තේජාන්විත සියවසක් දෙවියන්ගේ දෙපා මුල නිමා විණි.’
ඉන්දීය අග්රාමාත්ය නරේන්ද්ර සිං මෝදිගේ ට්විටර් පිටුවේ එසේ සටහන් වූයේ 2022 දෙසැම්බර් 30 වෙනි සිකුරාදාය. එනම් අද උදේය.
වසර 99ක් ආයු වැළඳූ අග්රාමාත්යවරයාගේ මෑණියන් වන හීර්බෙන් මෝදි අභාවප්රාප්ත වූයේ එදින උදෑසනය. ඇය මේ වනවිට අගමැති පුතුගේ කර මතින් අවසන් ගමන් නික්ම ගොස් ඇත. මහා බලවත් ඉන්දීය අගමැතිවරයෙකුගේ චාම් දුගී අභිමානවත් ඉන්දියානු අම්මා කෙනෙක් සම්බන්ධව ගෞරවාන්විත මතකයක් ඉතිරි කරමිනි.
1923 ජූනි 18 වෙනිදා ගුජරාට් හි, මෙහ්සානා විස්නගර් හි හීර්බෙන් උපත ලැබුවාය. පවුලේ වැඩිමහල් දරුවා ලෙසින් උපත ලැබූ ඇයට සිය ළමා කාලයට විඳීමට නොහැකි වූයේ තමන්ට බාල සහෝදර සහෝදරියන් රැක බලා ගන්නට සිදු වූ නිසාය.
තේ වෙළෙන්දෙකු ලෙස රැකියාව කළ දමෝදර්දාස් මුල්චාන්ද් මෝදි හා විවාහයෙන් පසුව ද පවුලේ වැඩිමහල් ලේලිය ලෙස ඇගේ කරපිට පැටවී තිබුණේ විසල් වගකීම් කන්දරාවකි.
“ඒ කාලේ අපිට තිබ්බේ කුඩා නිවසක්. ඒ නිවසට ජනේලයක්වත්, වැසිකිලියක්වත් තිබ්බේ නෑ.. එක කාමරයක්, මඩ බිත්ති සහිත නිවසේ මගේ දෙමව්පියන්, මම වගේම මගේ සහෝදර සහෝදරයින් ජිවත් වුණා..”
නරේන්ද්ර මෝදි සිය බ්ලොග් අවඩියේ මව ගැන සටහනක් තබමින් පවසා තිබේ.
කෙතරම් ආර්ථික අපහසුතා, හිරිහැර කරදර මධ්යයේ වුවත් ඇය සිය පවුල සමගියෙන් සතුටින් තබා ගැනීමට කටයුතු කළාය.
නිවසේ වියදම් සඳහා සැමියාට සහය වීමට ඇය නිවාස කිහිපයක භාජන සෝදමින් මෙහෙකාරකම් කළාය. ඒ අතර චර්කා කැරකැවීම, කපු ලෙලි ගැසීම, නූල කැටීම වැනි සියල්ලම ඇය සිදු කළාය.
“මේ කොන්ද කැඩෙන කාර්යයයේදීත් ඇගේ ප්රධානතම සැලකිල්ල යොමු වූයේ කපු කටින කටු අපිට නොවැදෙන බව සහතික කිරීමයි..” අග්රාමාත්යවරයා අම්මා ගැන කීවේ එසේය.
ජීවන යාත්රාව ඇය පැද ගියේ ඉතා අපහසුවෙන් වුවත්, ඇගේ මුවින් සිනාව කිසි විටෙක මැකී ගියේ නැත. සිය දරුවන් නිවැරදි මාර්ගයේ ඉදිරියට ගෙන යන්නට ද ඇය සිය පූර්ණ අවධානය යොමු කළාය.්
වෙලාවට හා පිළිවෙලට වෙහෙස මහන්සි වී කටයුතු කරන්නියක වන හීර්බෙන් වැඩ කරන අතරතුර ඇගේ ප්රියතම භජන් හා ගීතිකා මුමුණන්නට පුරුදු වී සිටියාය.
සිය පුතු ඉන්දියාවේ අගමැතිවරයා වුවත් ඇය සාමාන්ය අයුරින් ජීවත් වූ අතර ප්රසිද්ධ වැඩසටහන්වලට කිසිදා සහභාගී වුනේ නැත. තමා සමඟ අම්මා පෙනී සිටියේ අවස්ථා දෙකකට පමණක් බව මෝදි සඳහන් කර තිබිණි.
2014 දී ඔහු අගමැති ලෙස දිවුරුම් දුන් පසුවත් මව ඔහු බැලීමට දිල්ලියට පැමිණ තිබුනේ ඉන් වසර දෙකකට පසුවය.
‘මම දුරකථන ඇමතුමක් දෙන හැමවෙලාවෙම අම්මා කිව්වේ කවදාවත්, කාටවත් වරදක්වත් නරක දෙයක්වත් කරන්න එපා.. දුප්පතුන් වෙනුවෙන් වැඩ කරන්න කියලා..”
කෙතරම් කාර්යබහුල වුවත්, අග්රාමාත්යවරයා, ඔහුගේ බාල සොහොයුරා වන පංකජ් මෝදි සමඟ වාසය කරන සිය මව බැලීමට යෑමට වේලාව වෙන් කර ගත්තේය. ඕනෑම වැදගත් අවස්ථාවකට මුහුණ දෙන්නට පෙර මවගේ ආශිර්වාදය ලබා ගන්නට ඔහු පුරුදු වී සිටියේය.
“මගේ ජීවිතයේ වගේම චරිතයේ යහපත් ලක්ෂණ සියල්ල මගේ දෙමාපියන් මට ආරෝපණය කළ දේවල් කියලා මට කිසිම සැකයක් නෑ.. අද, මම දිල්ලියේ නිදහසේ වාඩි වී සිටින මොහොතවල් වල මම අතීත මතකයන් අතරේ අතරමං වෙනවා..”
මෝදි, සිය බ්ලොග් අඩවියේ සටහන් තබා තිබේ.
හීර්බෙන් මෝදි ජනතාව අතර ජනප්රිය වූයේ මෝදිගේ රජය රුපියල් 500 හා 100 නෝට්ටු තහනම් කළ විටයි. පැරණි නෝට්ටු මාරු කිරීම සඳහා බැංකුවලට ගිය මිලියන සංඛ්යාත ඉන්දියානුවන් සේම ඇය ද බැංකුවකට ගිය අවස්ථාවක ලබාගත් ඡායාරූප ලොව පුරා ප්රසිද්ධ විණි.
‘මගේ අම්මා සරලයි වගේම අසාමාන්යයි. හරියට හැම අම්මා කෙනෙක් වගේම.’ අග්රමාත්යවරයා පවසන්නේ හැඟීම්බවරය.
අද (30) උදෑසන වසර 99ක් ආයු වළඳා මිය ගිය හීර්බෙන්ගේ අවසන් කටයුතු ද අද සවස පෙර අග්රාමාත්යවරයාගේ සහභාගීත්වයෙන් පැවැත්විණි.
හීර්බෙන් මෝදි, ලෝකය පුරා ප්රසිද්ධ, ආදරණීය දරුවන්ගේ ආදරය විඳිමින් සිට, දිගු කලකට පෙර දෙව් තුරුලට ගිය සිය සැමියා සමඟින්, දෙවියන්ගේ දෙපාමුල සැනසිල්ලේ සිටින්නට ලෝකයෙන් නික්ම ගියාය.