මුහුණු පොත පුරාම ඇත්තේ මහා වේදනාත්මක සටහනය. මට හිතුනේ ඇය මුලු කලා ක්ෂේත්රයටම අම්මා කෙනෙක් වී සිටි බවය.
ඒ ආදරණීය අම්මා නික්ම ගොසිනි. ඇය ගමන් කරමින් සිටි කළු පාට හයිඑස් රථය අද අලුයම තලවාකැලය පසුකර ලිඳුල ප්රදේශයේ දී මාර්ගයෙන් පිටතට පැමිණ අඩි දෙසීයක පමණ කොත්මලේ ඔය පැත්තට වන්නට වූ ප්රපාතයට ඇද වැටී තිබිණි. රථය කුඩු පට්ටම් වී ඇයගේ ජීවිතය රැගෙන යද්දී රියදුරු පණ බේරාගෙන තිබේ. තුවාලයක් හො නැත. රියදුරු දැන් පොලිස් අත්අඩංගුවේය. පොලිසිය කීවේ රෝහල වෙත රැගෙන එන විටත් ඇය මියගොස් සිටි බවය.
අද උදේ ඇයගේ සිරුර ළිඳුළ රෝහලේ මෘතශරීරාගාරයේ තැන්පත් කර තිබිණි. පශ්චාත් මරණ පරීක්ෂණයට සිරුර අනතුරුව නුවරඑළිය රෝහලේ අධිකරණ වෛද්ය නිලධාරියා වෙත යොමු කරනු ලැබුවේය.
සිරස නාලිකාවේ දිවිතුරා මෙගා ටෙලි නට්යයේ රූගත කිරීමකට සහභාගී වී නුවරඑලියේ සිට නැවත කොළඹ එද්දී ඇය මේ නිරපරාද අනතුරට ලක් වූවාය.
ඇය ගැන බොහෝ දේ මතක් කිරීම අසීරු නොවේ. මක් නිසාද යත් එකම මතයක් සේ ඇය නොමැකී ඇති බැවිනි. සුදු පැහැති ඔසරියකින් සැරසී බැල්මෙන් පවා පන්තිමය මහන්තත්වයක් ගෙනෙමින් වැඩවසම් සමාජයේ රදළ කාන්තාවකගේ භූමිකාව ඇය විසින් රූපණය කළ ආකාරය සිංහල සිනමාව හා රූපවාහිනී ටෙලි නාට්ය ඇසුරු කළ ප්රේක්ෂකයාට අමතක වන්නේ නැත.
එහෙන්ම දයාද්ර ගැහැණිකයකගේ වෑහෙන කරුණාව එක් බැල්මකින් මවමින් ඇය දැක්වූ භාව රූපණය ප්රේක්ෂකයන්ව එකහෙලා කම්පනය කළේය.
සුගතපාල සෙනෙරත් යාපාගේ හඳුන්වා දීමෙන් “පෙම්බර මධු” චිත්රපටයේ මේනකා නම්වූ උප ප්රධාන චරිතය රඟපාමින් සිනමාවට එක්වූ ඇය “කරුමක්කාරයෝ”, “කිරි මදු වැල්”, “ගෙදර බුදුන් අම්මා”, සළඹක් හඬයි”, “වන බඹරා”, “විජය ගීතා”, “ක්රිස්තු චරිතය”, “ඉන්දුට මල් මිටක්”, “තුන්වැනි යාමය”, “සුරබිදෙන”, “බිතු සිතුවම්” වැනි චිත්රපට රැසක රඟපෑවාය.
ඇය වේදිකාවේ ද කැපී පෙනෙන රංගනයන් ඉදිරිපත් කළ ශිල්පිනියකි. ඩී.බී නිහාල්සිංහයන්ගේ “දිමුතු මුතු” ටෙලි නාට්යයෙන් ඇය රූපවාහිනී රංග කලාවට එක් වූවාය. දයාබර බිරියක්, මවක් සමාජ සේවිකාවක් ලෙස ඇය සමාජය ආදර්ශයක් වූ මේ ගෞරවණීය ගැහැණිය මේ හදිසි අනතුරින් අප අතරින් සමු ගන්නා විට 75 වැනි වියේ පසුවූවාය.
මේ සිද්ධියේ දී තරම් මුලු කලා ක්ෂේත්රයම එකවර කම්පනය වූ අවස්ථාවක් මෑතකදී අප දැක තිබුණේ නැත. ප්ර වීනයන් මෙන්ම ආධුනික රංගන ශිල්පීහු ද ඇය පිලිබඳව උපන් සෙනෙහසින් යුතුව හෘදයාංගම සටහන් සිය සමාජ මාධ්ය ජාලා ගිනුම්වල සටහන් කළහ.
සමාජ මාධ්ය ජාලයේ ඇස ගැටුණු සටහන්…
ආදරණීය හයසින්ත් ආන්ටි. අද ඔයා නිහඩයි. ඒත් අපි අඩනවා. අපිට ගොඩාක් දුකයි… ඔයා අපි හැමෝටම අම්මා කෙනෙක්… ආදරණීය හයසින්ත් අම්මාට නිවන් සුවය පතමි.
දමිතා අබේරත්න
“නිර්මාණ වල මගේ අම්මාට රඟපෑ, රංගනයේදී ඇත්තම අම්මා කෙනෙක් වී සැබැ ජිවිතේත් ඔබ මට සැබෑම අම්මා කෙනෙක් වුණා… ඔබට නිවන් සුවය ලැබේවා හයිසින්ත් අක්කා – සුරාජ් මාපා
“එක්තරා කාලෙක දවස් හතේම පුංචි තිරේ මගේ අම්මා උනේ ඇයයි. මගේ විතරක් නෙවෙයි අපේ හැම නලුවෙක්ම එක දවසකට හෝ ඇයට අම්මා කියල ඇති. ඇය හමුවන හැම මොහොතම ඇගේ මුහුනේ තිබුනේ උතුරා යන ආදරය පමණි. අව්යාජ හිනාව තුල සැගවී තිබුනේද අව්යාජ සෙනෙහස පමනි. අවුරුද්දකට සැරයක් කවුරු හරි අසරණයෙක්ට රෝද පුටුවක් දන් දීම ඇගේ පුරුද්දක් . ඒ තව බොහෝ දේ දන්දෙන අතරතුරේ. කැමරාව ඉදිරියේ ග්ලිසරින් නැතිව කඳුලු සලන්නට හැකියාව ඇති ඇය විශිෂ්ඨ රංග පෞරුෂයකි.“
“අද උදේ ඇය රිය අනතුරකින් ජීවිතක්ෂයට පත්වූ බව අසා මගේ හිත මොහොතක් නතර විය. ඇසට කදුලක් ආවේ පෙර භවයක හෝ ඇය මාගෙ අම්ම වෙන්න ඇති කියල හිතුන නිසාය. –ධනංජය සිරිවර්ධන“
ඔයා මගෙත් අම්මා… පුංචි තිරේදි…කාමරංගා සීනිවලට හොඳයි නේද දුව කියල ඒ කාලෙ ශූටිං එනකොට ලොකු කාමරංගා පාර්සලයක් අරන් එනවා. ඇවිත් හැමෝටම දෙනවා. මට ගෙදර අරන් යන්නත් පාර්සලයක් ගේනවා. ක්ෂේත්රයේ කාගෙත් ආදරය දිනා ගෙන, හැමෝම එක්ක සුහදව, බොහොම වගකීමෙන් වැඩ කළ රංගන ශිල්පිනියක්.
අනේ මෙච්චර ඉක්මණට යයි කියල කවදාවත් හිතුවෙ නෑ. රියැදුරෙක්ගෙ නොසැලකිලිමත්කම කළ විනාශයක තරම.. සුදු අම්මා….ආදරෙයි ගොඩාක්….ඔබතුමියට සුභ ගමන් – අයෝමි ශානිකා
මේ අතෝරක් නැති සටහන් අතර නෙත ගැටුණු කිහිපයකි. මේ වැගිරෙමින් අත්තේ ඇය ක්ෂේත්රයත්ට සිය රසික පර්ෂදයටත් ඉතිරි කර ගිය ආදරය ය
