අපරාධ පරීක්ෂණ දෙපාර්තමේන්තුව (CID) විසින් අත්අඩංගුවට ගනු ලැබූ, වැඩ තහනමට ලක්ව සිටින බන්ධනාගාර කොමසාරිස් ජනරාල් තුෂාර උපුල්දෙණිය අත්අඩංගුවට ගැනීම සහ වැඩ තහනම් කිරීමේදී නිසි ක්රියා පටිපාටිය අනුගමනය කර නොමැති බව ශ්රී ලංකා මානව හිමිකම් කොමිෂන් සභාව නිගමනය කර ඇතැයි බීබීසී වාර්තා කරයි. කොමිසම උපුටා දක්වමින් එම ප්රවෘත්ති සේවය වාර්තා කරන්නේ මේ අත් අඩංගුවට ගැනීම හරහා ඔහුගේ මූලික අයිතිවාසිකම් උල්ලංඝනය වී ඇති බවය.
අත්අඩංගුවට ගැනීම සහ පසුබිම
2025 වසරේ වෙසක් පෝය දින අනුරාධපුර බන්ධනාගාරයේ සිරකරුවෙකු නිදහස් කිරීමේ සිද්ධියක් සම්බන්ධයෙන් ජනාධිපති ලේකම් කාර්යාලය කළ පැමිණිල්ලකට අනුව, තුෂාර උපුල්දෙණිය පසුගිය වසරේ ජූනි 09 වනදා අත්අඩංගුවට ගැනිණි. ජනාධිපති සමාව යටතේ නිදහස් කළ බව කියැවෙන මෙම පුද්ගලයා නිදහස් කර තිබුනේ ජනාධිපතිවරයා විසින් ජනාධිපති සමාවට අදාලව අනුමත කල ලයිස්තුවට පිටිනි. පසුව රක්ෂිත බන්ධනාගාරගත කෙරුණු ඔහුට, 2025 ජූලි මස දැඩි ඇප කොන්දේසි මත අධිකරණයෙන් ඇප හිමි විය.
තම ස්වාමිපුරුෂයා අත්අඩංගුවට ගැනීම සහ සේවයෙන් ඉවත් කිරීම අත්තනෝමතික සහ නීති විරෝධී බව පවසමින් ඔහුගේ බිරිඳ විසින් මානව හිමිකම් කොමිසමට කළ පැමිණිල්ලකට අනුව මෙම විභාගය පැවැත්විණි.
කොමිසමේ නිරීක්ෂණ සහ නිගමන
පිටු 21කින් යුත් සිය නිර්දේශ වාර්තාව නිකුත් කරමින් මානව හිමිකම් කොමිසම සඳහන් කර ඇත්තේ, වින්දිතයාට කරුණු දැක්වීමට අවස්ථාවක් නොදී අනවශ්ය කඩිනමකින් ක්රියා කිරීම තුළින් අත්තනෝමතිකභාවයක් සිදුව ඇති බවයි.
- ආණ්ඩුක්රම ව්යවස්ථාවේ 12 වන ව්යවස්ථාව (නීතිය ඉදිරියේ සමාන ආරක්ෂාව ලැබීමේ අයිතිය) උල්ලංඝනය වී ඇත.
- අත්අඩංගුවට ගැනීමේදී අනුගමනය කළ යුතු 13 (1) ව්යවස්ථාව ද උල්ලංඝනය වී ඇති බව කොමිසම පෙන්වා දෙයි.
වහාම ක්රියාත්මක කළ යුතු නිර්දේශ
ශ්රී ලංකා මානව හිමිකම් කොමිෂන් සභාවේ සභාපති, විශ්රාමික ශ්රේෂ්ඨාධිකරණ විනිසුරු එල්.ටී.බී. දෙහිදෙණිය සහ කොමසාරිස් නිමල් ජී. පුංචිහේවාගේ අත්සනින් නිකුත් කළ නිර්දේශ මාලාව 2026 අප්රේල් 30 වනදාට පෙර ක්රියාත්මක කළ යුතු බවට නියෝග කර ඇත.
- පොලිස්පති සහ මහජන ආරක්ෂක ලේකම්: පළමු වගඋත්තරකරු වන CID අධ්යක්ෂවරයාගේ ක්රියාකලාපය පිළිබඳ පරීක්ෂා කර සුදුසු පියවර ගත යුතුය.
- චක්රලේඛ නිකුත් කිරීම: අත්අඩංගුවට ගැනීම්වලදී ව්යවස්ථාපිත ප්රතිපාදන දැඩි ලෙස අනුගමනය කරන ලෙස සියලු නිලධාරීන් දැනුවත් කළ යුතුය.
- අධිකරණ අමාත්යාංශ ලේකම්: වැඩ තහනම් කිරීමේ ක්රියාවලියේදී සිදු වූ අගතිය සැලකිල්ලට ගෙන වින්දිතයා සම්බන්ධයෙන් සුදුසු පියවරක් ගත යුතුය.
මෙම නිර්දේශ සම්බන්ධයෙන් ගනු ලැබූ පියවර ඇතුළත් වාර්තාවක් අප්රේල් මස අවසන් වීමට පෙර කොමිසම වෙත ඉදිරිපත් කළ යුතු බවට ද වැඩිදුරටත් දැනුම් දී තිබේ.
