-
ත්රස්ත පනත යටතේ රැඳවුම් භාරයේ සිටින සුරේෂ් සලේ විශේෂඥ වෛද්ය මණ්ඩලයකට යොමු කිරීමේ නියෝගය 10 දා!
ත්රස්තවාදය වැළැක්වීමේ පනත යටතේ රඳවාගෙන සිටින රාජ්ය බුද්ධි සේවයේ හිටපු ප්රධානී සුරේෂ් සලේ විශේෂඥ වෛද්ය මණ්ඩලයක් වෙත ඉදිරිපත් කර වාර්තාවක් කැඳවීමට පියවර ගන්නා ලෙස සෞඛ්ය සේවා අධ්යක්ෂ ජෙනරාල්වරයා වෙත නියෝගයක් නිකුත් කරන්නයි නීතිපතිවරයා කළ ඉල්ලීම පිළිබඳ නියෝගය ලබන ජූනි 10 වනදා ප්රකාශයට පත් කරන බව කොළඹ කොටුව මහේස්ත්රාත් අධිකරණය නියම කළේය.
සුරේෂ් සලේ වෙනුවෙන් ඔහුගේ නීතිඥවරුන් ඉදිරිපත් කළ මෝසමක් අද (04) කොළඹ කොටුව මහේස්ත්රාත් අධිකරණය හමුවේ සලකා බැලූ අවස්ථාවේ දී මෙම තීරණය ගැනුණි.
නීතිපති පාර්ශවයේ කරුණු දැක්වීම
නීතිපතිවරයා වෙනුවෙන් පෙනී සිටි අතිරේක සොලිසිටර් ජෙනරාල් දිලීප පීරිස් අධිකරණය හමුවේ කියා සිටියේ සැකකාර හිටපු ජාතික බුද්ධි ප්රධානී විශ්රාමික මේජර් ජෙනරාල් සුරේෂ් සලේ බරපතල රෝගී තත්ත්වයකින් පෙළෙන බවට සාධාරණ කරුණු ඉදිරිපත් වී නොමැති බවය.
මැයි 04 වනදා මොහුව පෝෂණ විශේෂඥ වෛද්යවරයා, අක්ෂි විශේෂඥ වෛද්යවරයා සහ මානසික විශේෂඥ වෛද්යවරයා වෙත යොමු කිරීමට පූර්වගාමී මහේස්ත්රාත්වරයා නියෝග කර තිබුණේ කොළඹ ප්රධාන විශේෂඥ අධිකරණ වෛද්යවරයාට වුවත්, මොහුව විශේෂඥ වෛද්යවරුන් වෙත යොමු කර ඇත්තේ දෙවැනියා බව අධිකරණයේ දී හෙළි විය. මැයි 18 වනදා වෛද්ය වාර්තාව ලැබී තිබියදී මෝසම ඉදිරිපත් කිරීමට සති දෙකක් ප්රමාද වූයේ අභියාචනාධිකරණයේ අනුකම්පාව ලබා ගැනීමේ අරමුණින් බව ද හෙතෙම සඳහන් කළේය.
වෛද්ය වාර්තාව උපුටා දක්වමින් අතිරේක සොලිසිටර් ජෙනරාල්වරයා වැඩිදුරටත් මෙසේ පැවසීය.
“මොහු එසේ මෙසේ පුද්ගලයෙක් නෙමෙයි. 2017-2019 වෙනකම් ස්වයං ඝාතකයෝ 08 දෙනෙක් බැලන්ස් කරපු බුද්ධි නිලධාරියෙක්. මේ වාර්තාවේ තියෙනවා මානසික වෛද්යවරයා මොහුට කරලා තියෙන්නේ කෙටි කාලීන ඇසෙස්මන්ට් එකක් කියලා. ඒ ඇසෙස්මන්ට් එක පුරාවටම මොහු අඬමින් ඉඳලා තියෙන්නේ. කෙටි කාලීන ඇසෙස්මන්ට් එකකින් මේ තරම් දීර්ඝ රෝග විනිශ්චයක් දෙන්න පුළුවන්ද? මොහු පෝෂණවේදියා ළඟ හෝ අක්ෂි වෛද්යවරයා ළඟ අඬලා නෑ. නමුත් මානසික විශේෂඥ වෛද්යවරයා වෙත යොමු කළ වෙලාවේ ඉඳන් අඬලා. රෑට බය හිතෙන හීන පේනවලු. මොහු කරපු අපරාධ මතක් වෙනකොට ඇඬෙනවා ඇති. කරපුවා හීනෙන් පෙනෙනකොට බය වෙනවා ඇති. ඒවට ඉතින් කොහොමත් බෙහෙත් දෙන්න බෑනේ.”
“මොහු මානසික වෛද්යවරයා හමුවේ කියලා තියනවා විමර්ශන නිලධාරීන් නොවන බාහිර පාර්ශවයක් ආවලු. ඇඳුම ගලවන්න කිව්වලු. අත් දෙක ඈත් කරන්න කිව්වලු. මගේ කකුල්වලට ගැහුවලු. එතැනින් පස්සෙ උන දේවල් කියන්න මට ලජ්ජයි ලු.”
ඇයි ස්වාමීනි. ලජ්ජා වෙන්නේ. පොඩි ගෑනු ළමයෙක් ද මොහු. එහෙම උනා නම් කමක් නෑ. සියල්ල ස්වාමීනි වෛද්යවරයා නොමග යවන්න කරලා තියෙන්නේ.
සලේ අධිකරණය හමුවට ඉදිරිපත් කර ඇති වෛද්ය වාර්තාව පිළිගත නොහැකි බව දිලීප පීරිස් අවධාරණය කළේය.
“ ස්වාමීනි. මොහුට ඔස්කාර් සම්මානයකින් දමලා ගහන්න ඕන. ඉහෙන් බහින ලෙඩක් නෑ මොහුට. මේ වාර්තාවෙ තියනවා ස්වාමීනි ඔහුමයි කියලා තියෙන්නේ ඔහුට අමතක වෙනවා කියලා. මොහුට කොහොමත් අමතක වෙන ලෙඩක් තියනවා. මොහුගේ ජංගම දුරකථනයෙ පාස් වර්ඩ් එක මොහුට මතක නෑ. ලැප් ටොප් එකේ පාස් වර්ඩ් එක මතක නෑ. මොහු කියලා තිබ්බා ඔහුට කතා කරන්න කාටවත් ප්රවේශයක් දෙන්නේ නෑ කියලා.
ස්වාමීනි. හැම සතියකම සිකුරාදා දින මොහුගේ බිරියට පුතාට කතා කරන්න අවස්ථාව දෙනවා. අම්මට කතා කරන්න අවශ්යයයි කියලා අම්මටත් කතා කරන්න අවස්ථාව දීලා විමර්ශන නිලධාරීන්.
ඒ විතරක් ද ස්වාමීනී… මොහුට ගීන් ටී, පැටිස්, එග් රයිස්, ටොෆී, කොකා කෝලා, ෆිෂ් ඔයිල් ටැබ්ලට්, විටමින් සී වගේ දේවල් කන්න බොන්න දීලා තියනවා. ඒ විතරක් ද ස්වාමීනී. කණ සුද්ද කළෙත් මොහුගේ අපරාධ පරීක්ෂණ දෙපාර්තමේන්තුවට ආවට පස්සේ. කන් ඇහෙන්නේ නැතිව හිටියේ. මොහුව අක්ෂි දන්ත දියවැඩියා සම්බන්ධ රෝග පරීක්ෂාවකට යොමු කළා. ගෙදර ඉද්දිවත් මෙහෙම බෙහෙත් කළේ නැතිව ඇති. නමුත් මේවා කියන්නේ නෑ මොහු. “
සැකකරුගේ පාර්ශවයේ කරුණු දැක්වීම
හිටපු ජාතික බුද්ධි ප්රධානී විශ්රාමික මේජර් ජෙනරාල් සුරේෂ් සලෙයි වෙනුවෙන් පෙනී සිටි ජනාධිපති නීතිඥ ශවීන්ද්ර ප්රනාන්දු පැවසුවේ සිය සේවා දායකයා අපරාධ පරීක්ෂණ දෙපාර්තමේන්තුව භාරයේ සිටිය දී කෲර වද හිංසාවට භාජනය වී ඇති බවය.
“ ස්වාමීනි. මගේ සේවාදායකයා පූර්වගාමී මහේස්ත්රාත්වරයාගේ නියෝග අනුව කොළම අධිකරණ වෛධය නිලධාරියාගේ මාර්ගයෙන් විශේෂඥ වෛද්යවරු තිදෙනෙකුට යොමු කර තිබෙනවා. පෝෂණවේදියෙකුට, අක්ෂි විශේෂඥ වෛද්යවරයෙකුට, විශේෂඥ මානසික වෛද්යවරයෙකුට. මේ මානසික වෛද්ය වාර්තාවේ තැන් හතක මගේ සේවාදායකයා කෲර වද හිංසාවට ලක් වී ඇති බව කියනවා.”
“ මගේ සේවාදායකයා විමර්ශන නිලධාරීන් නොවන වෙනත් බාහිර පාර්ශවයක් විසින් වද හිංසාවට ලක් කරලා තියනවා. ඔහුට ඇඳුම් ගලවන්න කියලා, අත් ඈත් කරන්න කියලා, ඔහුගේ කකුල්වලට පහර දීලා. ඔහුට එතනින් එහාට වෙචිච් දේවල් කියන්න බෑ ලැජ්ජයි කියනවා. අපරාධ පරීක්ෂණ දෙපාර්තමේන්තුව භාරයේ සිටිය දී මේ සියල්ල වෙන්නේ. මෙහි වගකීම සම්පූර්ණයෙන්ම අපරාධ පරීක්ෂණ දෙපාර්තමේන්තුව භාර ගත යුතුයි.”
ජනාධිපති නීතිඥවරයා කියා සිටියේ සලෙයි රඳවා සිටින ස්ථානයේ සිට ප්රතිකාර කිරීමට නොහැකි බව වෛද්යවරුන් ප්රකාශ කළ බවය. ජනාධිපති නීතිඥ ශවීන්ද්ර ප්රනාන්දු මෙසේ පැවසුවේය.
“ස්ථිර වශයෙන්ම ඔහු වද හිසංවාට ලක් වෙලා කියලා වෛද්ය වාර්තාවෙන්ම පැහදැලි වෙනවා. ඔහු ඉන්න පරිසය නුසුදුසු තත්ත්වයක පවතින නිසා වෛද්යවරු ඔහුට ප්රතිකාර ලබා දීමට ආරම්භ කරන්න බෑ කියනවා. මොහි සිය දිවි නසා ගැනීමේ අවදානමක ඉන්නේ කියලා වෛද්ය වාර්තාවෙ කියනවා. එම නිසා මේ සම්බන්ධව සුදුසු නියෝගයක් ලබා දෙන්න කියලා මා අධිකරණයෙන් ඉල්ලා සිටිනවා.”
කරුණු සලකා බැලූ මහේස්ත්රාත්වරයා සැකකරුගේ පාර්ශවයේ ඉල්ලීම් සම්බන්ධවවන නියෝගය ජුනි මස 10 වැනිදා පස්වරු 2ට නිකුත් කිරීමට නියෝග කළේය.
