ලංකා ඊ නිවුස් වෙබ් අඩවියේ කර්තෘ සඳරුවන් සේනාධීර කටුනායක ගුවන් තොටුපලේ දී අත් අඩංගුවට ගැනීම නෛතික හා සදාචාරාත්මක ගැටලුවක් මතු කරන බවත් දැනට බ්රිතාන්ය පුරවැසිභාවය ලබා සිටින ඔහු මෙරටට පැමිණියේ වලංගු වීසා බලපත්රයක් මත බවත් මාධ්ය සේවක වෘත්තිය සමිති සම්මේලනයේ (FMETU) ජනමාධ්ය ඇමතිවරයා වෙත ලිඛිතව දන්වා තිබේ.
තම මාධ්ය වෘත්තිය නිසා ජීවිත තර්ජනවලට ලක්ව වසර 16කට අධික කාලයක් විදේශගතව ජීවත් වීමට සිදු වූ, ‘ලංකා ඊ නිව්ස්’ වෙබ් අඩවියේ කර්තෘ, මාධ්යවේදී සඳරුවන් සේනාධීර අද (11) දින දිවයිනට පැමිණි අවස්ථාවේදී කටුනායක ගුවන් තොටුපොළේදී අත්අඩංගුවට ගැනීමට පාදක වරෙන්තුව නිකුත් වී ඇත්තේ 2016 නොවැම්බර් 25 වැනිදා එවකට ගම්පහ මහේස්ත්රාත් කාවින්ද්යා නානායක්කාර විසින් බව පෙන්වා දෙන එම සංගමය ඊට පාදක වී ඇත්තේ 2009 වසරේ මාධ්යවේදී උපාලි තෙන්නකෝන් මහතාට පහරදීමේ සිද්ධියට අදාළ මහේස්ත්රාත් පරීක්ෂණයක් බව අනාවරණය කරයි. .්
මාධ්ය සේවක වෘත්තීය සමිති සම්මේලනය පෙන්වා දෙන්නේ උක්ත මහේස්ත්රාත් විමර්ශනය මේ වන විට ක්රියාත්මක නොවන අතර, එම පරීක්ෂණ අවසන් කොට මහාධිකරණයේ අධිචෝදනා පවා ගොනු කර ඇති බවය.
එවැනි පසුබිමක පැරණි මහේස්ත්රාත් වරෙන්තුවක් තවමත් ක්රියාත්මක වීම බරපතල ගැටලුවක් බව එම සංගමය අවධාරණය කරයි.
අදාළ වරෙන්තුව නිකුත් කළ මහේස්ත්රාත්වරියගේ ක්රියා කලාපය ලංකා ඊ නිව්ස් වෙබ් අඩවිය විසින් ඊට පෙර දැඩි ලෙස විවේචනයට ලක් කර තිබුණු බව පෙන්වා දෙන සංගමය මෙම වරෙන්තුව සම්බන්ධව ගැටලු සහගත තත්ත්වයක් පවතින ආකාරය පෙන්වා දෙයි.
සඳරුවන් සේනාධීර අද පස්වරුවේ ලන්ඩන් නුවර සිට ලංකාවට පැමිණි අවස්ථාවේ දී කටුනායක ගුවන්තොටුපල ආගමන විගමන නිලධාරීන් විසින් රඳවා තබාගෙන පසුව අත් අඩංගුවට ගෙන තිබිණි.
ජනමාධ්ය ඇමතිවරයාගෙන් මේ ප්රශ්නය සම්බන්ධව සාධාරණ මැදිහත්වීමක් අපේක්ෂාවෙන් මාධ්ය සේවක වෘත්තිය සමිති සම්මේලනයේ (FMETU) සෞඛ්ය සහ ජනමාධ්ය ඇමතිවරයා වෙත යොමුකළ නිවේදනය පහත දැක්වේ.
