ජපානයේ ඊසානදිග වෙරළ තීරයේ අද (සඳුදා) සිදුවූ ප්රබල භූමිකම්පාවත් සමඟ නිකුත් කර තිබූ සුනාමි අනතුරු ඇඟවීම් පියවර කිහිපයකින් පහත හෙළීමට එරට කාලගුණ විද්යා ඒජන්සිය පියවර ගෙන තිබේ.
භූ කම්පනය සිදුවූ වහාම ප්රබල සුනාමි අනතුරු ඇඟවීම් නිකුත් කළ ද, පසුව ඇතිවූ තත්ත්වයන් නිරීක්ෂණය කිරීමෙන් අනතුරුව මෙම අනතුරු ඇඟවීම් ලිහිල් කර ඇති බව වාර්තා වේ.
ජපාන රජය සාමාන්යයෙන් සුනාමි අවදානම් මට්ටම් තුනක් යටතේ නිවේදන නිකුත් කරයි. එහි අවම මට්ටම වන ‘සුනාමි උපදේශන’ (Tsunami Advisory) මට්ටමේදී මීටරයකට වඩා අඩු උසකින් යුතු රළ අපේක්ෂා කරන අතර, එවැනි අවස්ථාවලදී වෙරළෙන් ඉවත් වන ලෙස ජනතාවට උපදෙස් දෙනු ලැබේ.
දෙවන මට්ටම වන ‘සුනාමි අනතුරු ඇඟවීම්’ (Tsunami Warning) මීටර් 3ක් දක්වා උස රළක් අපේක්ෂාවෙන් නිකුත් කරන අතර එහිදී වෙරළබඩ සහ පහත් බිම්වල වෙසෙන ජනතාව වහාම උස් බිම් වෙත යාම අනිවාර්ය වේ. ඉහළම සහ භයානකම මට්ටම වන ‘ප්රධාන සුනාමි අනතුරු ඇඟවීම්’ (Major Tsunami Warning) මීටර් 3කට වඩා වැඩි උසකින් යුත් රළ කිහිප වතාවක් වෙරළට රඩා පත්විය හැකි අවස්ථාවලදී නිකුත් කෙරේ.
ප්රාදේශීය වේලාවෙන් සවස 17:33 වන විට, ඊසානදිග වෙරළ තීරයට නිකුත් කර තිබූ ඉහළ මට්ටමේ අනතුරු ඇඟවීම් ‘සුනාමි උපදේශන’ මට්ටම දක්වා පහත හෙළා ඇත. කෙසේ වෙතත්, ජපානයේ ජාතික හදිසි අනතුරු ඇඟවීම් යෙදුම වන NERV මගින් තවදුරටත් අවධාරණය කරන්නේ වෙරළට පැමිණීම හෝ ජලාශ අසල ගැවසීම තවමත් ආරක්ෂිත නොවන බවයි. මේ හේතුවෙන් බලධාරීන් පවසන්නේ අනතුර සම්පූර්ණයෙන් පහව ගොස් නොමැති බවයි.
භූ කම්පනය සිදුවූ මුල් අවස්ථාවේදී ජනතාවගේ ආරක්ෂාව වෙනුවෙන් ප්රාන්ත පහක පුද්ගලයන් 156,000කට පමණ තම නිවෙස්වලින් ඉවත් වී ආරක්ෂිත ස්ථාන කරා යන ලෙස රජය නියෝග කර තිබුණි. අනතුරු ඇඟවීම් මට්ටම අඩු කළද, සියලුම නිල නිවේදන අවලංගු කරන තෙක් වෙරළ තීරයෙන් බැහැරව සිටින ලෙස බලධාරීන් ජනතාවගෙන් ඉල්ලා සිටී.
පසු කම්පන හෝ කුඩා රළ පහරවල් මගින් පවා තවමත් හානි සිදුවිය හැකි බැවින්, ප්රාදේශීය නිලධාරීන් ලබාදෙන උපදෙස් අකුරටම පිළිපදින ලෙසත් අවධානයෙන් පසුවන ලෙසත් වෙරළබඩ ජනතාවට දැනුම් දී ඇත.
