උපේක්ෂා උඩුවැරැල්ල –
කිඹුලා කනවා ඉවසිය හැකිය. කොහිල කටු අනනිවා ඉවසන්නට බැරිය. එහෙම කීවේ අපේ මුත්තලා තියුණු උපහාසය දරා ගන්නට බැරි බව කියන්නටය.
ඉරාන කථානායක මොහොමඩ් බගර් ගලිබාෆ්ය. වසර ගණනාවකට පසු අද ලෝක වෙළෙඳපලේ බ්රෙන්ට් වර්ගයේ බොරතෙල් බැරලයක මිල ඩොලර් 120 ඉක්මවා ගිය පසු ට්රම්ප් පරිපාලනය දැඩිව උපහාසයට ලක් කරමින් ගලිබාෆ් සිය එක්ස් ගිනුමේ මෙසේ ලිවේය.
“ මීලඟ නැවතුම ඩොලර් 140…”
ඉරාන නෞකා වළක්වමින් ට්රම්ප් ගෙනයන බාධකයට පිළිතුරු සපයන ඉරානය හෝමුස් සමුද්ර සන්ධිය වසා දැමීමෙන් අනතුරුව ලෝක වෙළෙඳපලේ තෙල් මිල කටකතාවකටත් වෙනස්වන තත්ත්වයක් නිර්මාණය වී ඇත. අද උදෑසන වන විට ගෝලීය මිණුම්දණ්ඩක් වන බ්රෙන්ට් (Brent Crude) වර්ගයේ බොරතෙල් බැරලයක මිල ඇමරිකානු ඩොලර් 126 දක්වා ඉහළ ගිය අතර, එය 2022 වසරෙන් පසු වාර්තා වූ ඉහළම මිල මට්ටමය. පසුව එම මිල ඩොලර් 120 සීමාවට මඳක් පහළින් ස්ථාවර වූයේය.
ඇමරිකානු උපක්රම ගැන ගලිබාෆ් සමච්චල් කරන්නේ මේ පසුබිම දකිමිනි.
ට්රම්ප්ගේ ‘පිපිරෙන තෙල් ළිං’ ප්රකාශයට ප්රතිප්රහාර
පසුගිය ඉරිදා ‘ෆොක්ස් නිව්ස්’ (Fox News) නාලිකාව සමඟ පැවති සම්මුඛ සාකච්ඡාවකදී ජනාධිපති ඩොනල්ඩ් ට්රම්ප් ප්රකාශ කර තිබුණේ, ඇමරිකානු නාවික හමුදාව හෝමුස් සමුද්ර සන්ධිය අවහිර කිරීම හේතුවෙන් ඉරානයට සිය තෙල් අපනයනය කිරීමට නොහැකි වන බවය. එහිදී තෙල් බැහැර කිරීමට නොහැකිව පද්ධතිය තුළ පීඩනය වැඩි වී, ඉරානයේ තෙල් ළිං සහ යටිතල පහසුකම් දින කිහිපයක් ඇතුළත ස්වයංක්රීයව ඇතුළතින් පිපිරී විනාශ වනු ඇති බවට ට්රම්ප් මතයක් ඉදිරිපත් කළේය.
“එය පිපිරී ගිය පසු කිසිදා පෙර තිබූ තත්ත්වයට පත් කළ නොහැකි වනු ඇතැයි” ඔහු එහිදී පවසා තිබුණි.
ගලිබාෆ් සිය ‘X’ ගිණුම හරහා ඊට පිළිතුරු දුන්නේය.
“දින තුනක් ගත වී ඇතත්, කිසිදු තෙල් ළිඳක් පිපිරී ගියේ නැත. අපට මෙය දින 30ක් දක්වා වුවද දීර්ඝ කළ හැකි අතර, මෙහි සිටම එම තෙල් ළිඳ සජීවීව විකාශය (livestream) කළ හැකිය. තෙල් මිල ඩොලර් 120 සීමාවෙන් ඔබ්බට ඉහළ නැංවූ, ‘අවහිර කිරීමේ සිද්ධාන්තය’ (blockade theory) ඉදිරිපත් කරන බෙස්න්ට් වැනි පුද්ගලයන්ගෙන් ඇමරිකානු පරිපාලනයට ලැබෙන මෙවැනි උපදෙස් හුදෙක් ‘කුණු උපදෙස්’ (junk advice) පමණි. මීළඟ නැවතුම: 140 (ඩොලර්) ය. මෙහි ඇති ගැටලුව සිද්ධාන්තය පිළිබඳව නොව, ඔවුන්ගේ මානසිකත්වය පිළිබඳවයි.” ගලිබාෆ් කර්කශ උපහාසකයකින් කීවේය.
3 days in, no well exploded.We could extend to 30 and livestream the well here.
That was the kind of junk advice the US admin gets from people like Bessent who also push the blockade theory and cranked oil up to $120+. Next stop:140. The issue isn’t the theory, it’s the mindset.— محمدباقر قالیباف | MB Ghalibaf (@mb_ghalibaf) April 29, 2026
වෙළඳපොළ හැසිරවීමේ චෝදනා
ඇමරිකානු පරිපාලනය හිතාමතාම යුද බිය පතුරවමින් තෙල් සහ බැඳුම්කර වෙළඳපොළ හසුරුවන බවට ද ගලිබාෆ් චෝදනා කළේය. ජනාධිපති ට්රම්ප් සිය ‘ටෘත් සෝෂල්’ (Truth Social) ගිණුමේ අලුයම තබන පණිවුඩ “යුද ලාභ වාදය ” (War profiteering) හෙවත් යුද්ධයෙන් අයුතු ලාභ ලැබීමේ කොටසක් බවත්, ඒවා හුදෙක් ලාභ අපේක්ෂාවෙන් සඳහා සිදුකරන වෙළඳපොළ හැසිරවීම් බවත් ඔහු පෙන්වා දුන්නේය.
මේ අතර, ඇමරිකාවේ ඉන්ධන මිල දරාගත නොහැකි සේ ඉහළ යමින් ඇත. මේ වනවිට එරටේ සාමාන්ය ගැසොලින් ගැලුමක මිල ඩොලර් 4.30 දක්වා ඉහළ ගොස් ඇත. එය 2022 වසරෙන් පසු එරට වාර්තා වූ ඉහළම මිලය.
යුද්ධය ආරම්භ වූ දා සිට මේ දක්වා ඇමරිකාවේ ඉන්ධන මිල 44% කින් පමණ ඉහළ ගොස් ඇති බව AAA ඉන්ධන මිල දර්ශක වාර්තා පෙන්වා දෙයි. ඇමරිකානු ජනාධිපතිවරයාට බ්රහස්පතින්දා දිනයේදී ඉදිරිපත් කිරීමට නියමිත ඉරානයට එරෙහි නව හමුදා සැලසුම් හේතුවෙන් ඉදිරි දිනවලදී මෙම තත්ත්වය තවදුරටත් උග්ර වනු ඇතැයි ආර්ථික විශ්ලේෂකයෝ බිය පළ කරති.
