ඉස්ලාම් දහමට අපහාස වන අයුරින් ප්රකාශයක් සිදුකිරීමේ සිද්ධියකට අදාළව නීතිපතිවරයා විසින් ගොනු කරන ලද අධිචෝදනා පත්රය අද (30) කොළඹ මහාධිකරණයේදී බොදු බල සේනා සංවිධානයේ මහලේකම් පූජ්ය ගලගොඩඅත්තේ ඤාණසාර හිමියන් වෙත භාර දෙන ලදී.
විවෘත අධිකරණයේදී මෙම අධිචෝදනා පත්රය භාරදීමෙන් අනතුරුව, කරුණු සලකා බැලූ මහාධිකරණ විනිසුරුවරයා විත්තිකාර හිමිනම ඇප මත මුදා හැරීමට නියෝග කළේය.
මෙම නඩුවට පාදක වී ඇත්තේ මීට වසර දහයකට පෙර, එනම් 2016 වසරේදී කොළඹ කොම්පඤ්ඤවීදිය නිපොන් හෝටලයේ පැවැති මාධ්ය හමුවකදී ඤාණසාර හිමියන් විසින් කරන ලදැයි කියන ප්රකාශයකි. එහිදී උන්වහන්සේ ඉස්ලාම් දහමට සහ ශුද්ධ වූ කුරානයට නිගරු වන අයුරින් ප්රකාශ නිකුත් කරමින් ආගමික සහජීවනයට බාධා කළ බවට චෝදනා එල්ල වී තිබුණි.
මෙම සිද්ධිය සම්බන්ධයෙන් කොළඹ අපරාධ කොට්ඨාසය මගින් දීර්ඝ විමර්ශනයක් පවත්වා තිබූ අතර නීතිපති උපදෙස් ලබාගැනීම සඳහා වසර 11කට ආසන්න කාලයක් ගතවීම විශේෂත්වයකි.
පසුගිය මාර්තු මාසයේදී කොළඹ අපරාධ කොට්ඨාසය විසින් කොටුව මහේස්ත්රාත් අධිකරණයට දැනුම් දී තිබුණේ මෙම සිද්ධියට අදාළව මහාධිකරණය හමුවේ අධිචෝදනා ගොනු කිරීමට කටයුතු කරන බවය. ඒ අනුව අප්රේල් 23 වනදා මහාධිකරණය හමුවේ අධිචෝදනා ගොනු කෙරුණු අතර, අද දින ඤාණසාර හිමියන් අධිකරණයේ පෙනී සිටීමෙන් පසු මෙම නඩු කටයුතු විධිමත් පරිදි ආරම්භ විය.
පූජ්ය ගලගොඩඅත්තේ ඤාණසාර හිමියන් මීට පෙරද අවස්ථා කිහිපයකදී මෙවැනිම චෝදනාවලට වැරදිකරු වී සිරදඬුවම් නියම වූ අයෙකි.
2016 වසරේදී කුරගල පූජා භූමිය සම්බන්ධයෙන් කළ ප්රකාශයකට අදාළව 2024 මාර්තු මාසයේදී උන්වහන්සේට වසර 4ක බරපතළ වැඩ සහිත සිරදඬුවමක් නියම වූ අතර, පසුව ඊට එරෙහිව කළ අභියාචනයක් හේතුවෙන් ඇප මත මුදා හැරිණි.
එසේම 2016 වසරේ කිරුළපන ප්රදේශයේ පැවැති තවත් මාධ්ය හමුවක් සම්බන්ධයෙන් 2025 ජනවාරි මාසයේදී මාස 9ක සිරදඬුවමක් නියම වුවද, 2025 පෙබරවාරි මාසයේදී නැවතත් ඇප හිමි විය.
වත්මන් නඩු විභාගයද මෙම අතීත සිදුවීම් මාලාවේ තවත් තීරණාත්මක පියවරක් ලෙස සැලකේ.
