දිවයින තුළ පනවා ඇති හදිසි නීති තත්ත්වය මින් ඉදිරියට තවදුරටත් දීර්ඝ කිරීමට රජයේ කිසිදු බලාපොරොත්තුවක් නොමැති බව කැබිනට් මාධ්ය ප්රකාශක, වෛද්ය නලින්ද ජයතිස්ස පවසයි.
අද (01) පැවැති කැබිනට් මාධ්ය හමුවට එක්වෙමින් ඔහු මේ රාජ්ය තීන්දුව අනාවරණය කළේය.
පසුගියදා ඇති වූ දිට්වා සුළි කුණාටු තත්ත්වයත් සමඟ විපක්ෂයේ පක්ෂ නායකයින් සමඟ පැවැති සාකච්ඡාවකදී මතු වූ කරුණු පදනම් කරගනිමින් හදිසි නීතිය ප්රකාශයට පත් කිරීමට රජය පියවර ගත් බව හෙතෙම සිහිපත් කළේය.
අනතුරුව රජය හදිසි නීතිය දීර්ඝ කරගත් අවස්ථාවේදී මෙම හදිසි නීති තත්ත්වය උපයෝගී කරගනිමින් ජනතාව, මාධ්යවේදීන් මෙන්ම මාධ්ය ආයතන මර්දනය කරමින් අවැඩක් සිදු කරනු ඇතැයි ඇතැම් පාර්ශවයන් විසින් සමාජය තුළ අනියත බියක් නිර්මාණය කිරීමට උත්සාහ කළ බවද මාධ්ය ප්රකාශකවරයා මෙහිදී පෙන්වා දුන්නේය.
කෙසේ වෙතත්, රජය විසින් හදිසි නීතිය භාවිත කරනු ලැබුවේ සහන සේවා කටයුතු සඳහා පමණක්ම බවත්, ඇතැමුන් බිය වැද්දීමට උත්සාහ කළ පරිදි හදිසි නීතියෙන් කිසිදු වැරදි භාවිතයක් සිදු නොකළ බවත් ඔහු සඳහන් කළේය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
ඒ අනුව, මෙම මාසයේ සිට හදිසි නීතිය තවදුරටත් දීර්ඝ කිරීමට රජය බලාපොරොත්තු නොවන බව වෛද්ය නලින්ද ජයතිස්ස වැඩිදුරටත් ප්රකාශ කර සිටියේය.
