ආණ්ඩුක්රම ව්යවස්ථාවේ 20වැනි සංශෝධනය අහෝසි කර 19 බලගන්වනවා නම් ඉන් පසු ගොඩනන්වන අන්තර්කාලීන ආණ්ඩුවක අගමැතිකම භාර ගැනීමට තමන් සූදානම් බව හිටපු අගමැති එක්සත් ජාතික පක්ෂ නායක රනිල් වික්රමසිංහ ප්රකාශ කර තිබේ.
ඔහු මේ බව පවසා ඇත්තේ අන්තර්කාලීන ආණ්ඩුවේ අගමැතිකම භාරගන්නා ලෙස ඒ සඳහා සැලසුම් කරන හිටපු ජ්යෙෂ්ඨ ඇමතිවරුන් පිරිසක් කළ ඉල්ලීමට ප්රතිචාර දක්වමිනි.
වාර්තාවන ආකාරයට ඒ සිදුවීම මෙසේය.
ආණ්ඩුවේ හිටපු ඇමතිවරු පිරිසක් හා රනිල් වික්රමසිංහ අතර පසුගිය සතියේ අවස්ථා දෙකක දී අන්තර්වාර පාලනයක අගමැතිකම භාරගැනීම සම්බන්ධව රනිල් වික්රමසිංහ සමග සාකච්ඡා කර ඇත.
ජාත්යාන්තර සබඳතා ප්රයෝජනයට ගෙන වර්තමානයේ රට පත්ව ඇති තත්ත්වයෙන් ගොඩගැනීම කළ හැක්කේ රනිල් වික්රමසිංහට බව පෙන්වා දී ඇති හිටපු ඇමතිවරු ඒ සඳහා අවශ්ය ඕනෑම සහයෝගයක් ලබා දෙන බව ප්රකාශ කර තිබේ.
පසුගිය කාල පරිච්ඡේදය තුළ පාර්ලිමේන්තුව තුළත් ඉන් පිටතත් රනිල් වික්රමසිංහ කටයුතු කළ ආකරය පැසසුමට ලක් කර ඇති ඇමතිවරු නොපමාව අන්තර්කාලීන ආණඩුවේ අගමැතිකම භාර ගන්නා බවට රට හමුවේ ප්රකාශයක් කරන ලෙස ඉල්ලා තිබේ.
මෙහිදී හිටපු ඇමතිවරුන්ගේ එම ඉල්ලීමට ස්තුති කර ඇති රනිල් වික්රමසිංහ පවසා ඇත්තේ අන්තර්කාලීන ආණ්ඩුවක අගමැතිකම භාර ගැනීමේ යෝජනාව ආණ්ඩුවේ සිටින පසුපෙළ මන්ත්රීවරුන් මෙන්ම විපක්ෂයේ මන්ත්රීවරුන්ගෙන් ද තමන්ට ලැබී තිබුණු බවය.
අන්තර්කාලීන ආණ්ඩුවේ අගමැතිකම භාරගෙන රට ගොඩනැගීමේ අභියෝගය භාර ගැනීමට තමන් සූදානම් බව මෙහිදී ප්රකාශ කර ඇති රනිල් වික්රමසිංහ ඒ සඳහා 20වැනි ව්යවස්ථා සංශෝධනය අහෝසි කර 19 වැනි සංශෝධනය බලාත්මක කිරීම අවශ්ය බව පෙන්වා දී ඇත.
ආණ්ඩුක්රම ව්යවස්ථාවේ 19 වැනි සංශෝධනය මගින් විධායක ජනාධිපතිවරයාගේ බලතල සීමා කර රට ප්රජාතන්ත්රවාදී රාමුවකට යොමු කළ ද 20 වැනි සංශෝධනය යටතේ එය වෙනස් කළ නිසා ජනාධිපතිවරයා යටතේ අසීමිත බලයක් ගොනුවී ඇති බැවින් එවැනි පසුබිමක අගමැතිකම භාර ගැනීමෙන් වත්මන් අර්බුදයට විසඳුම් සෙවීමේ අභියෝගය ජයගත නොහැකි බව රනිල් වික්රමසිංහ ප්රකාශ කර තිබේ.
