ශ්රියානි විජේසිංහ –
දැනට පවතින රාජ්ය වෛද්ය පීඨවල ඇති බරපතල ගැටලු නිරාකරණය නොකර වෛද්ය අධ්යාපනය අවිධිමත් සහ සිමා රහිත ලෙස ව්යාප්ත කිරීමට රජය ගෙන යන වැඩපිළිවෙළ හේතුවෙන් අනාගතයේදී බරපතල ප්රතිවිපාකයන්ට මුහුණ දීමට සිදුවනු ඇති බව කොළඹ විශ්ව විද්යාලයේ වෛද්ය පීඨ ආචාර්ය සංගමය රජයට අනතුරු අඟවයි.
සෞඛ්ය ක්ෂේත්රය සම්බන්ධයෙන් ජාතික ප්රතිපත්තියක් නොමැති වීම නිසා නිසි පුරෝකථනයකින් තොරව, ලාභ ලැබීමේ අරමුණු මත, වාර්ෂිකව සිසුන් 500ක් බඳවා ගන්නා වෛද්ය විද්යාලයක් අනුමත කරමින් සහ ශික්ෂණ රෝහල ලෙස හෝමාගම මූලික රෝහල අනුයුක්ත කරමින් පලවූ කැබිනට් පත්රිකාව පාදක කර ගනිමින් වෛද්ය පීඨ ආචාර්ය සංගමය මෙම නිවේදනය නිකුත් කර ඇත.
මෙම කැබිනට් තීරණය වෛද්ය අධ්යාපනයේ මූලික මූලධර්මවලට පවා පටහැනි වනවා පමණක් නොව, වෛද්ය අධ්යාපනයේ අවම ප්රමිතීන් ද බරපතළ ලෙස උල්ලංඝනය කිරීමක් බව ආචාර්ය සංගමය අවධාරණය කරයි.
වෛද්ය අධ්යාපනයේ අවම ප්රමිතීන්ට අනුව සිසුන් 100ක කණ්ඩායමක් පුහුණු කිරීම සඳහා ඇඳන් 700කින් යුත් රෝහල් සංකීර්ණයක් අවශ්ය වන බවත් . දැනට හෝමාගම මූලික රෝහලට ඇති ඇඳන් සංඛ්යාව 475ක් පමණ වන අතර, එම රෝහල දැනටමත් ශ්රී ජයවර්ධනපුර වෛද්ය පීඨයේ සිසුන් විසින් සායනික පුහුණුවීම් සඳහා භාවිතා කරනු ලබන බවත් පෙන්වාදේ.
වසරකට සිසුන් 500ක් බඳවා ගන්නා තවත් වෛද්ය විද්යාලයක පුහුණු අවශ්යතා සපුරාලීමට හෝමාගම මූලික රෝහලට නොහැකි බවත් මෙම පියවර ශ්රී ජයවර්ධනපුර වෛද්ය ශිෂ්යයන්ගේ පුහුණු අයිතිවාසිකම් උල්ලංඝණය කිරීමක් බවත් අචාර්ය සමංගමය අවදාරණය කරයි.
රාජ්ය වෛද්ය පීඨවල දැනට පවතින අර්බුද නොවිසඳා, වෛද්ය අධ්යාපනයේ ගුණාත්මක බව නොසලකා හැර, පුද්ගලික වෛද්ය විද්යාල ව්යාප්තිය කෙරෙහි පමණක් අවධානය යොමු කිරීම වර්තමාන වෛද්ය සිසුන්ට සහ ආචාර්ය මණ්ඩලයට කරන බලවත් අසාධාරණයක් වන අතර මෙම අවිධිමත් හා වගකීමකින් තොර ව්යාප්තිය, දැනට පවතින, ජාත්යන්තරව පිළිගත් වෛද්ය අධ්යාපන ක්රමය බිඳවැටීමට තුඩු දෙනු ඇති බව ද ඔවුහු පෙන්වාදෙති.
ලෝක වෛද්ය අධ්යාපන සම්මේලනයේ (WFME) විධානය යටතේ ක්රියාත්මක වන ශ්රී ලංකා වෛද්ය සභාව (SLMC) විසින් නියම කර ඇති වෛද්ය අධ්යාපනයේ අවම ප්රමිතීන් කිසිදු තත්වයක් යටතේ පහත හෙලීම නොකළ යුතු යැයි කොළඹ විශ්ව විද්යාලීය වෛද්ය පීඨ ආචාර්ය සංගමය අවධාරණය කරයි.
වෛද්ය අධ්යාපනය සම්බන්ධයෙන් විශ්වවිද්යාලවල ස්වාධීනත්වය උල්ලංඝනය නොකළ යුතුය, අලුතින් පිහිටුවන ලද රාජ්ය වෛද්ය පීඨවල යටිතල පහසුකම් හා මානව සම්පත්වල බරපතළ අඩුපාඩු වහාම ක්රියාත්මක වන පරිදි නිවැරදි කළ යුතුය, යන්න ඔවුන්ගේ තීරණය වේ.
ඉදිරි වසර 5 සිට 10 දක්වා කාලය සඳහා නව වෛද්යවරුන් සහ විශේෂඥයින්ගේ අපේක්ෂිත අවශ්යතාවය සැලකිල්ලට ගනිමින් වෛද්ය අධ්යාපනය සඳහා ජාතික ප්රතිපත්තියක් සකස් කළ යුතු බව ආචාර්ය සංගමය පවසයි.
දැනට පවතින රාජ්ය වෛද්ය පීඨවල බරපතල ගැටලු නිරාකරණය කරන තුරු, රාජ්ය හෝ පෞද්ගලික වශයෙන් නව වෛද්ය පීඨ ස්ථාපිත නොකළ යුතු බව ඔවුන්ගේ මතය වන්නේය.
වෛද්ය අධ්යාපනයට අදාළ බරපතළ ගැටලු විසඳීමට කඩිනම් පියවර ගන්නා ලෙසත්, රාජ්ය වෛද්ය පීඨවල පැවැත්ම අනතුරේ හෙළන අහිතකර ක්රියාමාර්ගවලින් වළකින ලෙසත් කොළඹ විශ්වවිද්යාලයීය වෛද්ය පීඨ ආචාර්ය සංගමය රජයෙන් ඉල්ලා සිටියි.
