මනම්පිටිය නිමල් ජයරත
පසුගිය යලේ ලොකු ලූනු අස්වැන්නට නිසි මිලක් නොමැති වීමෙන් පොළොන්නරුව ඇලහැර ගොවිජනපදයේ ලොකු ලූනු ගොවීහු බරපතල අර්බුදයකට මුහුණ දී සිටිති.
යල කන්නයේ අක්කර 150 කට ආසන්න ප්රමාණයක ලොකු ලූනු වගා සිදුකර තිබෙන අතර ඇළහැර ගොවි ව්යාපාරයේ සරු බිම, නිකපිටිය, ඉකිරිවැව, බටුහේන, ගඟේයාය, යන ගම්මානවල දේශීය ලොකු ලූනු ගොවීන් මෙලෙස අසරණව හිඳිති.
ඇළහැර ගොවි ජනපදයේ සියයට හැත්තෑවක් පමණ ගොවීන් කෘෂිකර්මාන්තය ජීවනෝපායක් කරගෙන තිබේ. ඉන් සියයට තිස්පහක් පමණ ජීවන වෘත්තිය ලෙස කරගෙන ඇත්තේ ලොකු ලූනු වගාව වන අතර මෙවර පවතින මිල ගණන් අනුව තමන්ට දැඩි අලාභ සිදුවන බවද එම ගොවීහු සඳහන් කරති.
ගොවීන් කියා සිටින්නේ රටේ පවතින ආර්ථික තත්ත්වය සමඟ වගාව කිරීමේදී තෙල් පොහොර මිල දැරිය නොහැකි මිලකින් ඉහළ ගොස් තිබීමත්, සෑම කන්නකම අස්වනු නෙලීමේදී ලොකූ ලූනූ මිල පහළ යාමත් සමඟ සාධාරණ මිලක් නොලැබීමෙන් වියදම් වූ මුදලවත් සොයා ගැනීමට නොහැකි බවයි.
අස්වැන්නට ලබා දෙන මිල සම්බන්ධයෙන් ඔවුන් වැඩි දුරටත් කියා සිටින්නේ මෙවැන්නකි.
මීට සතියකට කලින් වෙළඳපොලේ ලොකු ලූනු කිලෝවක් රුපියල් 280 කට අලෙවි වු වුනා. මේ වනවිට කිලෝවක් රුපියල් 210 යි. අස්වැන්නට නිසි සාධාරණ මිලක් නෑ… හැමදාම අස්වැන්න නෙලනකොට මේ ප්රශ්නය එනවා. අපෙන් ලොකු ලූනු කිලෝවක් ලබා ගන්නේ කුනු කොල්ලෙට. දඹුල්ල මාර්කට් එකේ විකුණන්නේ රුපිල් 300 -320 මිලට.
ජනාධිපතිවරයාගේ අවධානය මේ ගැන යොමු වෙනවා නම් ඒක අපේ ප්රාර්ථනාවක්. අස්වැන්නට සාධාරණ මිලක් හොයලා දෙන්න. මේ අපිව ජීවත් කරන රස්සාව.
