මනම්පිටිය නිමල් ජයරත්න –
පොළොන්නරුව මනම්පිටිය ප්රාදේශීය රෝහලෙන් තමන්ට මාස කිහිපයකට නිකුත් කරන ඖෂධ කල් ඉකුත් වී ඇති බව හදවත් රෝගීහු සඳහන් කරති.
මෙලෙස හදවත් රෝගීන් සඳහා ඉකුත් 07 වෙනි දින පැවැති, සායනයේදී මනම්පිටියේ රෝහලෙන් මාස දෙකක් සඳහා ලබාදුන් ඖෂධ අගෝස්තු 31 වෙනි දිනෙන් කල් ඉකුත් වුවද එම ඖෂධ සැප්තැම්බර් මාසයටත් වලංගු බව පවසමින් ඒවා භාවිතා කරන ලෙසට හදවත් රෝගීන්ට ඖෂධ නිකුත් කෙරු මනම්පිටිය රෝහලේ ඖෂධවේදියා විසින් දන්වා ඇති බවද හදවත් රෝගීහු පැවසූහ.
තමන්ට ලබාදුන් ඖෂධ සැප්තැම්බර් මාසයේදී භාවිතා කිරීමට නොහැකි බවත්, එම ඖෂධ කල් ඉකුත් වී ඇ.ති බවට, තමා ඖෂධවේදියාට පැවසීමෙන් අනතුරුව ඒ බව ආණ්ඩුවට දැනුම් දෙන ලෙසට තමාට පැවසූ බව ඉකුත් 07 වෙනිදා හදවත් රෝගයට ප්රතිකාර ගත් නැගෙනහිර මනම්පිටිය ගම්මානයේ පදිංචි 66 වියති තිදරු පියෙකු වන කේ.පි.ජී, ගුණදාස අප සමග සඳහන් කළේය.
මෙලෙස කල් ඉකුත් වූ ඖෂධ 07 වෙනිදා පැවැති සායනයේදි විශාල පිරිසක් ලබාගත් බවත්, මේ පිළිබඳ අදාළ බලධාරීන්ගේ අවධානය යොමුකර අසරණ රෝගීන්ට ප්රමිතියෙන් යුත්, කල් ඉකුත් නොවූ ඖෂධ ලබාදීමට අවශ්ය කටයුතු කරදෙන ලෙසත් හදවත් රෝගීහු අදාළ බලධාරීන්ගෙන් ඉල්ලා සිටියහ.
අප මේ පිළිබඳව මනම්පිටිය ප්රාදේශීය රෝහලේ ප්රධාන වෛද්ය නිලධාරී අසංක දීපාල්ගෙන් දුරකථනයෙන් කළ විමසීමකදී පැවසුවේ, කල් ඉකුත් වු ඖෂධ ලබා දී ඇත්නම් ඒ පිළිබඳ පරීක්ෂණයක් පවත්වන බවත්, එම ඖෂධ ඉවත් කිරීමට කටයුතු කරන බවත්, අදාළ රෝගීන් හට කල් ඉකුත් නොවුන ඖෂධ ලබාදීමට පියවර ගන්නා බවත්.
.
