සාමකාමී විරෝධතා කරුවන් වෙත හමුදා බලය අයුතු ලෙස යොදාගැනීමේ කිසිදු සූදානමක් නැතැයි ආරක්ෂක ලේකම් විශ්රාමික ජෙනරාල් කමල් ගුණරත්න අවධාරණය කරයි.
ආරක්ෂක ලේකම්වරයා උපුටා දක්වමින් ආරක්ෂක අමාත්යාංශය පවසන්නේ ප්රජාතන්ත්රවාදී ජනතා උද්ඝෝෂණ වැලැක්වීමට කිසිසේත්ම හමුදා භටයින් යොදා නොගන්නා බවය.
ෆීල්ඩ් මාර්ෂල් සරත් ෆොන්සේකා සිය මුහුණුපොතෙහි ආරක්ෂක ලේකම්වරයාට සහ ආරක්ෂක මාණ්ඩලික ප්රධානී සහ යුද හමුදාපතිවරයා අමතා තබා තිබූ සටහනට ප්රතිචාර දක්වමින් ආරක්ෂක අමාත්යාංශය මෙම නිවේදනය නිකුත් කර ඇත.
නිවේදනයේ දැක්වෙන්නෙ ප්රචන්ඩකාරී අවස්ථාවක දී රටේ ආරක්ෂාව වෙනුවෙන් ආණ්ඩුක්රම ව්යවස්ථාව ආරක්ෂා කිරීමට සහ සියලු ශ්රී ලාංකිකයින් අතර සාමය සහ සහජීවනය ඇති කිරීමට පොලිසිය සහායක් ඉල්ලා සිටින අවස්ථාවකදී පමණක් පොලිසියේ ඉල්ලීම පරිදි හමුදා සහාය ලබා දෙන බවය.
සාමකාමී ලෙස විරෝධතාවයේ යෙදෙන පුද්ගලයින් අතරට බුද්ධි අංශ සාමාජිකයින් යවා ඔවුන් මගින් යම් කලකෝලාහල තත්වයක් ඇති කර හෝ බෝම්බ පිපිරීමක් වැනි යමක් සිදුකර හුවා දක්වමින් ඔවුන් විසුරුවා හැරීමට ත්රිවිධ හමුදාවේ පියවරක් ඇතැයි සමාජ මාධ්යයේ පලවන වාර්තාවල කිසිදු සත්යතාවයක් නොමැති බව ද ආරක්ෂක ලේකම් කමල් ගුණරත්න උපුටා දක්වමින් ආරක්ෂක අමාත්යාංශය කියයි.
නිවේදනයේ වැඩිදුරටත් දැක්වෙන්නේ යුද හමුදාව රටට සහ ජනතාවට ආදරය කරන විනය ගරුක හමුදාවක් බවය.
සාමකාමී විරෝධතාවලට මුවාවී රාජ්ය දේපල හෝ පෞද්ගලික දේපල විනාශ කරන්නනට සහ ඒ සඳහා නායකත්වය දෙන පුද්ගලයින්ට එරෙහිව නීතිමය ක්රියාමාර්ග පොලිසිය විසින් ගනු ලබන බව ද ආරක්ෂක අමාත්යාංශය අවධාරණය කරයි.
