ශානි අබේසේකර විශ්රාම ගොස් සිටිය දී යළි වසරක සේවා කාලයක් සඳහා කොන්ත්රාත් පදනම මත කැඳවනු ලැබුවේ දේශපාලනික අර්ථයකින් නොව ජනතාව වෙනුවෙන් ගත් ඉතාම යහපත් තීන්දුවක් ලෙස බව අද කැබිනට් ප්රකාශක විජිත හේරත් අද (15) පැවසුවේය.
මේ වනවිට එම පත්වීම විවිධ පාර්ශවල චෝදනාවට ලක්වීම සම්බන්ධව මාධ්යවේදියෙක් නැගූ පැනයට පිළිතුරු දෙමින් විජිත හේරත් කීවේ විමර්ශන විශාල ප්රමාණයක් මෙහෙයවමින් එම තොරතුරු දත්ත සහිතව සිටි නිලධාරියෙක් ලෙස යළි ඔහු එම තනතුර වෙත ටික කාලයකට රැගෙන ඒම සිදුකළේ ජනතාවගේ පැත්තෙන් කල්පනා කරමින් බවය.
“ඔහු ඉතා දක්ෂ නිලධාරියෙක්… ඔවු වැනි නිලධාරියෙකුගේ මැදිහත්විම අත්යවශ්ය වෙනවා පාස්කු ප්රහාරය වගේ සිදුවීම පරීක්ෂණ කරන්න. ”
“ඒ වගේම පහුගිය කාලෙ තිබුණ බරපතල අපරාධ සම්බන්ධව ඔහු පරීක්ෂණ කරමින් තිබුණා. 2019 ජනාධිපතිවරණයෙන් දවස් 03කට පස්සේ පළවෙනි ගොදුර බවට පත් වුනේ ඔහු. අනෙක් පැත්තෙන් පැහැදිලිව එතන දි ඔහු පළිගැනීමකට ලක් වුන නිලධාරියෙක්.”
“ඔහු මේ රටේ ජනතාව වෙනුවෙන් ඉතාම සාධාරණව අපක්ෂපාතීව කටයුතු කළ කෙනෙක්. ඔහු සතුව ඉතාම විශාල තොරතුරු දත්ත සහ හැකියාවන් ප්රමාණයක් තිබෙනවා. ”
“එවැනි කෙනෙකුගේ සේවය ලබා ගැනීම රටට ජනතාවට විශාල වාසියක් වෙනවා. ඉතින් එවැනි අර්ථයකින් තමයි අපි ඔහුව එම පරීක්ෂණ කටයුතු සඳහා පත් කරනු ලැබුවේ. “
