-
දිනන්න ලේසි නෑ… දිනුවෙ නැතත් අවසන් මහා තරගයකට සුදුසු ගෞරවාන්විත පරාජයක් හෝ ලබා දෙන්න…
ශ්රී ලංකා දකුණු අප්රිකා සහ ඉන්දියා තුන් කොන් කාන්තා අන්තර් ජාතික එක් දින තරගාවලියේ අවසන් මහා තරගයේ දී ශ්රි ලංකා කණ්ඩායම දැඩි අවදානමකය. කවදාවත් ලකුණු 287ක සීමාව ඉක්මවා නොගිය ශ්රී ලංකා කණ්ඩායමට ලකුණු 342ක දැවැන්ත ඉලක්කයක් හිමි වී ඇත්තේය. කඩුලු 07ක් දැවී ගොස් තිබිණි.
සාමාන්ය වේගය ඕවරයකට ලකුණු 6.84කි. දළ වශයෙන් ලකුණු 7ක සාමාන්යයක් පන්දු ඕවරයක පවත්වා ගැනීම අවශ්යය. පන්දු ඕවර 50ක තරගයක දී මේ ඉලක්කය කිසිසේත් පහසු එකක් නොවේ.
මෙවැනි පීඩනයක් දරා ගන්නට නොහැකි බව ශ්රි ලංකා කණ්ඩායම දකුණු අප්රිකා තරගයේදීත් පෙන්නුවේය. කඩුළු 5ක් ලකුණු 89කට දැවී ගිය අවස්ථාවේ දී දකුණු අප්රිකානු මැද පෙළ ක්රීඩිකා ඇනේරියා ඩැක්සන් ලකුණු 103ක්, චෙලෝ ට්රියොන්, ලකුණු 74ක්, නඩින් ඩි ක්ලේක් ලකුණු 32ක් ලෙස ලබාගෙන ශ්රී ලංකාවට ලබා දුන් ලකුණු 315ක ඉලක්කය හමුවේ ශ්රී ලංකා කණ්ඩායම මානසිකව වැටෙන ආකාරය දුටුවෙමු. ශ්රී ලංකා ක්රීඩිකාවෝ ලකුණු 239කට දැවී යන්නේ ඕවර 42.5ක දී ය.
එකම බලාපොරොත්තුව තරගාවලිය පුරාම ෆේල් වී සිටි චමරි අතපත්තු පසුගිය තරගයේ දී ලකුණු 52ක් සහිතව ලකුණු අතරට පැමිණෙන බව පෙන්වීමය.
පසුගිය තරගය මේ තරගයේ හැඩය ගැන අප තුළ ඇතිකරන සිතිවිල්ල එවැන්නකි.
කාසියේ වාසිය දිනුවේ ඉන්දියානු කණ්ඩායමය. ආරම්භයේ සිට ඔවුහු බොහෝ ඉහළ ලකුණු සංඛ්යාවක් සඳහා පදනම දමා ගන්නා ආකාරය පෙන්වා දුන්හ. මුල්ම කඩුල්ල බිඳෙන්නේ ලකුණු 70 දී ය. ඒ ඉනෝකා රණවීරගේ පන්දුවක් හමුවේ පියුමි වත්සලා රැකගත් උඩපන්දුවක් හමුවේ ප්රතිකා රාවල් ලකුණු 30කට දැවී යාමෙනි.
එතැන් සිට ඉන්දීය කණ්ඩායමේ රූපත් රැජන ස්ම්රිට් මන්දානා විසින් එල්ල කළ බිහිසුණු ප්රහාරය ශ්රී ලංකා පන්දු යවන්නියන් විඩාවට පත් කළේය. ඇය පන්දු 101ක් තුළ ලකුණු 116ක් ලැබුවාය. මේ ඇය රැස් කළේ ඇයගේ 11 වැනි ශතකයය. ඊට හතරේ පහර 15කි. හයේ පහර 02කි. මන්දනා සහ හර්ලින් ඩිඕල් අතර දෙවැනි කඩුල්ල සඳහා ලකුණු 120ක සබඳතාවයක් ගොඩනැගෙනු බලාගෙන සිටියෙමු. දෙවැනි කඩුල්ල බිඳ වැටෙන්නේ ලකුණු 190 දී ය.
විශේෂත්වය වන්නේ ඉන්දීය පිතිකාරිනියන් සියල්ල සිය යුතුකම විශිෂ්ට ලෙස ඉටු කිරීමය. හර්ලින් ඩිඕල් ලකුණු 47කි. හතරේ පහර 4ක් ඊට එක් විය. නායිකා හර්මන්ප්රීත් කවුරු පන්දු 30ක දී හතරේ පහර 4ක් සමග ලකුණු 41කි. ජෙමීමා රොඩ්රිගෝස් පන්දු 29ක කි හතරේ පහර 4ක් සමග ලකුණු 44කි.
පන්දු යැවීමේ දී මල්කි මදාරා කඩුළු 02ක්, දෙව්මි විහන්ගා කඩුළු 02ක්, ඉනෝකා රණවීර කඩුල්ලක් ලැබූහ.
පිළිගත යුත්තේ මේ අවසන් මහා තරගය ජයග්රහණය පහසු නොවන බවය. අඩුම තරමින් අවසන් මහා තරගයකට සුදුසු තරගකාරීත්වයක් සහිතව මේ තරගයට ශ්රී ලංකා පිතිකාරිණියන් ප්රවේශවනු දැක්ම අපේ ප්රාර්ථනාවය.
