ළමා රෝග විශේෂඥ වෛද්ය හැරිස් පතිරගේ විසින් රචිත දරු සුව දිරිය කෘතිය එළිදක්වා තිබේ. බටහිර වෛද්ය විද්යාවට පමණක් සීමා නොවී පෙරදිග අපේ උරුමයන් සහ දේශීය දැනුම් පද්ධතිය සොයා ගිය ගවේෂණාත්මක ප්රයත්නයක ප්රතිඵලයක් ලෙස, මෙම කෘතිය හැඳින්විය හැකිය.
එමගින් දරුවන්ට මෙන්ම වැඩිහිටියන්ට ද බලපාන රෝග තත්වයන්, පිළිකා දියවැඩියාව, අධික රුධිර පීඩනය,හෘදයාබාධ ආදී බෝ නොවන රෝග, තාක්ෂණික මෙවලම්වල අතුරු විපාක, ආහාර පාන රටාවේ ගැටලු ,වසංගත ඇතුළු බෝවන රෝග, මාර්ග අනතුරු සහ මගී සුරක්ෂිතතාවය ඇතුළු ප්රශ්න ගණනාවක් පිළිබඳව විග්රහයන් ඇතුළත්ව ඇත.
හෙළ දේශීය දැනුම් පද්ධතිය හා නවීන බටහිර විද්යාත්මක දැනුම එක්කරන සන්ධිස්ථානයක් ලෙසද මෙම ග්රන්ථය අර්ථ දැක්විය හැකිය.
වසර තිස් දෙකකට වැඩි කාලයක් ශ්රී ලංකාවේ අති දුෂ්කර ප්රදේශවල සහ රිජ්වේ ආර්යා ළමා රෝහල ඇතුළු ප්රධාන රෝහල්වල ගණනාවකම වෛද්යවරයෙකු සහ විශේෂඥ වෛද්යවරයකු ලෙස කටයුතු කළ ළමා රෝග විශේෂඥ වෛද්ය හැරිස් පතිරගේ සිය කුළුඳුල් කෘතිය ලෙස මෙම ග්රන්ථය සම්පාදනය කොට ඇත.
රෝග පිළිබඳ විවරණයක් මෙන්ම රෝගවලින් වළක්වා ගැනීම පිළිබඳවත් ඒ සඳහා තම ජීවන රටාව සකස් කළ යුතු ආකාරය පිළිබඳවත් තොරතුරු රාශියක් මෙම ග්රන්ථය තුළ අන්තර්ගතව තිබේ.
දරුවන්ගේ නිරෝගීතාවය වෙනුවෙන් දෙමව්පියන්ට මාර්ගෝපදේශක සංග්රහයක් වශයෙන් එළි දක්වා ඇති මෙම ග්රන්ථය, පාසල් දරුවන්ටත් ගුරුවරුන්ටත්, වෛද්ය සිසුන් ,වෛද්යවරුන් සහ සෞඛ්ය ක්ෂේත්රයේ සේවය කරන බොහෝ දෙනාටත් අත් පොතක් වශයෙන් භාවිතා කළ හැකි ග්රන්ථයක් බව සඳහන් කළ යුතුය.
